Agahigo i Nyanza? Umukecuru bikekwa ko yari afite imyaka 121 yitabye Imana

Yanditswe na Ishimwe Israel
Kuya 24 Mutarama 2020 saa 10:02
Yasuwe :
0 0

Mu nkuru Mukasakufi Mariya yabariye abamukomokaho yavugaga ko yavutse mbere y’umwaka wa 1900. Ntiyigeze ahabwa indangamuntu yerekana itariki y’amavuko ariko hari ibimenyetso bigaragaza ko ashobora kuba yaratabarutse afite imyaka 121.

Uyu mukecuru yitabye Imana ku wa 20 Mutarama 2020 azize urupfu rw’ikirago. Yasezeweho bwa nyuma ku mugoroba wo kuri uyu wa 22 Mutarama.

Mukasakufi yavukiye mu yahoze yitwa Komini Masango mu Kabagari [muri Nyanza ya none) mu 1899. Yashyingiwe mu 1930 n’uwitwa Rugondo rwa Kabilizi ka Nyamwasa wa Muyoboke wo kwa Jeni rya Rurenge ukomoka ku Mwami wa nyuma w’Abasinga bayoboye mu Majyepfo y’u Rwanda akomotse mu Ndorwa. Uyu yishwe muri Jenoside yakorewe Abatutsi mu 1994.

Yari atuye mu Mudugudu wa Nyabyiyoni mu Kagali ka Kadaho mu Murenge wa Cyabakamyi mu Karere ka Nyanza ho mu Majyepfo y’u Rwanda.

Mbanda Steven uri mu buzukuru ba Mukasakufi yabwiye IGIHE ko nyirakuru yakundaga kubabwira inkuru z’igihe yaboneye izuba hambere mu bihe by’umwaduko w’abazungu.

Ati “Yari akivuga, aganira! Avuga ko yavutse mbere y’uko Kiliziya ya mbere y’i Save yubakwa mu 1900. Kiliziya yashinzwe ari umwana. Yanavugaga ko icyo gihe abazungu bari bamaze igihe gito bageze mu Rwanda.’’

Umuzungu wa mbere wageze mu Rwanda ni Umudage Von Goetzen wakiriwe n’Umwami Rwabugiri mu 1874 mu gihe ku wa 8 Gashyantare 1900 aribwo Kiliziya y’i Save yashinzwe iyoborwa bwa mbere na Padiri Brard abaturage bitaga “TEREBURA’’.

Mbanda yavuze ko nyirakuru “yavutse nyuma y’umwaduko w’abazungu ariko mbere y’iyubakwa rya Kiliziya ya mbere mu Rwanda.’’

Uyu mukecuru ngo yanavutse nyuma gato y’isozwa ry’intambara yo ku Rucunshu yabereye muri Komini ya Nyamabuye mu yahoze ari Perefegitura ya Gitarama mu 1896.

Yabaye hagati y’abari ku gice cy’Umugabekazi Kanjogera washakaga ko himikwa umuhungu we Musinga n’abari bashyigikiye Mibambwe Rutarindwa wari wimitswe na Kigeli IV Rwabugiri akaza no kwicwa.

Mbanda usanzwe ari mu bayobozi ba Kaminuza y’Abalayiki b’Abadiventisiti (UNILAK), akaba yaranayoboye Akarere ka Nyanza nyuma ya Jenoside yakorewe Abatutsi yabajije Mukasakufi niba azi intambara y’Ababiligi n’Abadage amubwira ko yabereye i Gitwe mu 1916 kandi icyo gihe yari umukobwa mukuru utakiragira inyana, ari wa wundi wambara akikwiza.

Ati “Mu mateka ye yavugaga ko yari ataraba umukobwa mukuru ariko yari amaze kuba inkumi.’’

Mukasakufi yashatse atararambagijwe kuko yashatse akuze cyane, bamushakira umugabo barushinga. Yari imfura mu muryango w’abana icumi, bose bazize urupfu rw’ikirago aba ariwe usigara.

Muri Jenoside yari afite abana batanu, babiri bari muri Uganda baguye ahitwa Luweero mu Ntambara ya Obote na Museveni, abandi batatu bishwe muri Jenoside.

Mbanda yavuze ko “Yari ashaje cyane kuko hari igihe twabonaga yapfuye ariko akongera akiyuburura akagenda. Yari amaze guhabwa amasakaramentu y’ugusigwa kw’abarwayi nk’inshuro eshanu ariko akongera akabaho.’’

Mu buzima bwa Mukasakufi ntiyigeze arwara ngo ajye kwa muganga. Imirire ye yibandaga ku mafunguro y’umwimerere arimo imyumbati, ibijumba, amata n’imboga rwatsi.

Yari amaze imyaka nk’ine nta murimo ukomeye akora kuko yari asigaye agendera mu kagare.

Mu magambo ye yakunze kuvuga mu minsi ye ya nyuma ngo ‘icyatumye arama ni ukugira ngo azabanze abone Abanyarwanda babanye neza kandi bakundanye.’ Yashimaga ubuyobozi ko bwatumye inzozi ze zibaye impamo.

Mukasakufi biramutse byemejwe yaba ariwe muntu mukuru wari uriho ku Isi kuko ku wa 2 Mutarama 2020 aribwo umukecuru Kane Tanaka utuye mu gace ka Fukuoka mu Majyepfo y’u Buyapani, yakorewe ibirori byo kwizihiza isabukuru y’imyaka 117 amaze abonye izuba, nk’ufite agahigo ko kuba ari we muntu ukuze kurusha abandi.

Tanaka yavutse mu 1903, mu 1922 ashyingiranwa na Hideo Tanaka babyarana abana bane, baza no kwakira uwa gatanu mu muryango wabo biyemeza kumurera.

Mukasakufi yari incike kuko abana be batatu bari mu Rwanda bishwe muri Jenoside yakorewe Abatutsi mu 1994, bapfanye n’abuzukuru 16 n’abuzukuruza barindwi. Yasize abuzukuru bane n’abuzukuruza 20 n’ubuvivi butatu.

Umunyamabanga Nshingwabikorwa w’Umurenge wa Cyabakamyi, Nkurikiyumukiza JMV, yabwiye IGIHE ko uyu mukecuru yari amuzi ndetse ko yari akuze cyane.

Ati “Yari mukuru byo. Ikindi twashatse kumujyana no muri za nzu zicumbikira incike za Jenoside arabyanga asaba kwigumira ku ivuko. Gusa twamufashaga.”

Yavuze ko uyu mukecuru ko nta ndangamuntu ya kera yagiraga. Imyaka yari yanditse mu bitabo, ni uko yavutse mu 1912 kandi ko nabyo byakozwe mu buryo bwo kugenekereza, gusa ashimangira ko bakunze kubwirwa ko afite imyaka igeze ku 120.

Ati “Mu kwibaruza yaragenekerezaga, twanditse 1912, ni kwa kundi ubaza umuntu inzara yari ihari icyo gihe n’ibindi bya kera. Ariko hari mwenewabo wari unajijutse wayoboraga Komine Nyabisindu Jenoside ikirangira, nawe yambwiye ko yari afite imyaka 121. Twe mu ikoranabuhanga dushyiramo ko yavutse 1912, njye nasanze bandika uwo mwaka, ni yo yafashirizwagaho muri leta.”

Bibaye ari ukuri, uyu mukecuru yaba ariwe muntu wari ku Isi ukuze kurusha abandi ku buryo yagakwiye kuba yanditse mu bitabo bya Guinness des records nk'umuntu wanditse amateka
Aha abazukuru be bari bamusuye bari kumwifuriza Noheli
Bivugwa ko iyi foto yafashwe mu 2018 ubwo abuzukuru be bari mu birori byo kwizihiza isabukuru ye y'imyaka 119

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .