00:00:00 IGIHE NETWORK KN KINYARWANDA EN ENGLISH FR FRANCAIS

’Grosbeak weaver’, ubwoko bw’isandi igira urusaku rukabije

Yanditswe na Nzabonimpa Jean Baptiste
Kuya 9 Kamena 2021 saa 07:15
Yasuwe :
0 0

Inyoni zo mu muryango w’isandi zizwiho kugira imiterere itangaje cyane uhereye ku buryo zubakamo ibyari bikomeye, urusaku rukabije no kuba mu itsinda rimwe cyane cyane iyo bigeze mu gihe cyo kororoka.

Nubwo bimeze bityo, kuri Grosbeak weaver hariho akantu k’itandukaniro kuko ntabwo zikunda kwegerana n’izindi sandi zisanzwe. Ikindi ni uko mu gihe isandi zisanzwe zifata igiti kinini akaba arimo zubaka ibyari, Grosbeak weaver yubaka ibyari mu byatsi by’umuberanya n’urufunzo kikoresheje ubuhanga butangaje.

Imiterere ya Grosbeak weaver

Grosbeak weaver iyo ari ikigabo iba isa n’ikijuju, ikagira umunwa wirabura n’akadomo k’umweru mu gahanga no ku mababa. Iyo ari ikigore iba ifite umunwa utirabura cyane kandi ku nda hariho amabara atandukanye.

Aho ziboneka

Amoko menshi y’isandi harimo na Grosbeak weaver akunda kuba muri Afurika nubwo hari make ashobora kuboneka ku mugabane wa Aziya.

Ku mugabane wa Afurika, kuva mu Majyepfo y’ubutayu bwa Sahara kugera mu Majyepfo y’umugabane wa Afurika ushobora kuhasanga amoko atandukanye y’isandi.

Mu Rwanda izi nyoni zirahaboneka ndetse no mu bice bitandukanye by’Umujyi wa Kigali zihaboneka ari nyinshi. Twavuga nko ku kiraro gihuza Nyabisindu na Kibagabaga, Nyarutarama kwa Nyagahene, Nyabugogo ukimara kwambuka ikiraro ujya mu Gatsata, i Masaka ku Nyange Industries, mu gishanga kiri Mwendo n’ahandi hatandukanye.

Grosbeak weaver itungwa n’iki?

Iyi nyoni mbere na mbere itungwa n’udusimba duto harimo imiswa. Na none irya inkeri n’izindi mbuto. Ishobora no kurya iz’ibihwagari. Iyo zikuze zishobora kurya ibikeri n’ibinyamunjonjorerwa.

Uko Grosbeak weaver yororoka

Grosbeak weaver y’ikigabo igira ibigore byinshi. Ikigabo kimwe gishobora kubangurira ibigore bitandatu. Gikora bishoboka kikita ku gace ibigore byateyemo amagi kugira ngo hatagira ubundi bwoko bw’inyoni buza guhungabanya umutekano.

Iyo ikigore kimaze kubangurirwa gitera amagi atatu. Ikigore cyonyine ni cyo gifata inshingano yo kurarira amagi mu gihe cy’iminsi 14-16. Imishwi iyo imaze kuvuka igaburirwa na nyina gusa ibanje kuyihekenyera byamara kunoga igacira mu kanwa kabyo kugeza bikuze. Gusa muri icyo gihe ikigabo gishobora kugaburira imishwi ikiri mu cyari nubwo bidakunze kubaho. Imishwi iyo imaze iminsi 18-20 iba imaze kumera amababa ku buryo uyibonye wamenyako ari iya Grosbeak weaver.

Ibyari bya Grosbeak weaver hari izindi nyoni ziza gushakamo amagi cyangwa imishwi ngo zibirye. Harimo ikibiribiri, icyiyoni na Nile monitor. Umuryango Mpuzamahanga wita ku bidukikije ushyira izi nyoni ku rutonde rw’izitabangamiwe.

Grosbeak weaver ni inyoni zidakunda kwegerana n’izindi sandi zisanzwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .