’Humusation’, uburyo bushobora gutuma uwapfuye ahindurwamo ifumbire aho gushyingurwa

Yanditswe na IGIHE
Kuya 10 Ugushyingo 2019 saa 10:44
Yasuwe :
0 0

Ni uburyo bwamaze kwemezwa ahantu hake cyane, nko muri Leta ya Washington muri Amerika, umuturage ashobora kwihitiramo ko napfa, aho gushyingurwa cyangwa ngo umubiri we utwikwe, washyirwa ahantu ugakurwamo ifumbire.

Ubu buryo bwiswe "humusation" ntiburemerwa ahantu henshi, ariko impirimbanyi hirya no hino zikomeje gusaba ko bukomorerwa nubwo butavugwaho rumwe.

Bamwe babufata nk’ubujyanye n’igihe kurusha gutwika umurambo byangiza ikirere kubera ingufu zifashishwa muri icyo gikorwa, cyangwa gushyingura umuntu akubakirwa imva, bisaba amikoro menshi kandi bigakoresha ubutaka, ndetse ngo byangiza n’ibidukikije nk’imigezi igihe umubiri washangutse wivanze n’amazi.

Mu Bubililigi hari umuryango ukomeje guhirimbanira ko ubwo buryo bwakwemezwa nk’ubwa gatatu bushobora gukoreshwa mu guherekeza abapfuye, nyuma yo gushyingura mu butaka no gutwika imirambo.

Umuyobozi wawo, Francis Busigny, avuga ko ubu "buryo bwo guha icyubahiro abacu bapfuye ni ugusubira mu gitaka hatabayeho kongera kwanduza ukundi nyuma y’uko ubuzima butuvuyemo, no gushimira bwa nyuma binyuze mu gutuma igiti gikura."

Mu buryo ubwo buryo busobanurwa, umuntu azajya apfa aherekezwe bisanzwe, umubiri utegurirwe ahantu hihariye, harundwe ibyatsi mbinshi bicagaguye, bimwe abiryameho ibindi babimworose, ku buryo umubiri ugumana dogere 60-70 zituma umubiri ushanguka ukivanga na bya byatsi utanutse, bikabyara ifumbire ihambaye.

Ibyo ngo biterwa n’uko utunyabuzima dushobora gutuma ikintu cyaba igikomoka ku nyamaswa cyangwa ikimera kibasha gushanguka, tuba nibura muri sentimetero 10-15 za mbere ku butaka, kandi ngo twangiza n’ikinyabutabire cyose cyaba cyaragiye mu mubiri we akiri muzima.

Ibyo byose bikorwa umubiri utagombye kunuka, ku buryo abahanga babifata nk’uburyo bugezweho bwo kwita ku bidukikije.

Nibyemezwa, biteganywa ko ku marimbi hazaba hari igice cyagenwe abantu bashobora kuzana umurambo ukahamara umwaka nk’igihe kibarwa ko umubiri waba wamaze kuvamo ifumbire, ndetse ababishatse bagahita bahatera igiti, ya fumbire ikagikuza, bikabyara agashyamba k’urwibutso ku bahashyize ababo.

Ni ikintu ariko kugeza magingo aya kitavugwaho rumwe, kuko amategeko y’ibihugu byinshi agena ko umuntu agomba kubahwa yaba ari muzima cyangwa yapfuye, ndetse n’aho bemera ko umurambo utwikwa, n’umuyonga usigaye ugira uburyo ufatwano. Bizasaba ko hahindurwa byinshi.

Gusa mu gihe uyu mushinga hari abavuga ko batindijwe gusa n’uko wemezwa mu mategeko ngo batangire guhindura abantu ifumbire y’ibindi bimera, hari n’abavuga ko bidakwiye, kuko umuntu wapfuye nta kintu abangamira kurusha umuzima.

Ni uburyo bukomeje gushimagizwa nk’ubuzatanga umusanzu mu kurengera ibidukikije, bamwe bakabigereranya nk’uburyo butuma umuntu asubira mu gitaka mu buryo bwa nyabwo, kuko nk’abemera Imana bavuga ko ari cyo muntu yaremwemo.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza