00:00:00 IGIHE NETWORK KN KINYARWANDA EN ENGLISH FR FRANCAIS

Sobanukirwa byimbitse "Turbulence", umuyaga ukunze kwibasira indege

Yanditswe na Zigiranyirazo Bajecteur
Kuya 23 May 2022 saa 01:41
Yasuwe :

Akenshi abantu bajya bakurikira amakuru ajyanye n’iby’indege, batekereza ko “Turbulence” ari uburyo umuyaga uhuha ukaba wakwiroha mu zuru ry’indege.

Suart Walt wamaze imyaka 30 mu kazi ko gutwara indege, yashyize umucyo ku mpamvu zitera “Turbulence”.

Suart agaragaza ko umuyaga ushobora kuza uturutse mu byerekezo bitandukanye kandi bitarindira kuba hari ibihu byinshi kuko biba bishobora no kubaho mu gihe ikirere gikeye.

Atanga ishusho y’uburyo bw’ingenzi bushobora kubamo “Turbulence” n’ingaruka bishobora kugira ku ndege anakomoza ku cyo umuntu yakora kugira ngo urugendo rwe rwogoga ikirere rurusheho kumunogera atagowe cyane cyangwa ngo aburiremo ubuzima.

Turbulence ibaho mu buryo bune, harimo ububa mu gihe ikirere gikeye cyane iyo hari ubukonje (Clear-Turbulence), iterwa n’ubushyuhe (Thermal Turbulence), ishobora guturuka ku mihindagurikire y’umuvuduko w’umuyaga (Mechanical Turbulence).

Hanabaho ikunze guterwa n’umuyaga uturutse inyuma y’indege (Wake Turbulence) ikaba inazwiho kubaho cyane mu gihe indege ihaguruka cyangwa se iyo igiye kugwa.

Turbulence iba mu gihe ikirere gikeye, iyo urebeye mu idirishya uba ubona byose ari amahoro, ikirere gifite umucyo ariko hakaza umuyaga ushobora no kugendera ku muvuduko wo hejuru cyane.

Iyo wisanze utunguwe n’icyo kibazo kandi wabonaga hakeye, ushobora kugerageza kugabanya ubutumburuke wagenderagaho kugira ngo ugabanye guhura n’izo nzitizi.

Suart avuga ko bidakunze kumara umwanya munini kandi ko iyo umupilote ahise agerageza kuzamura indege cyangwa kuyimanuraho akava ku butumburuke yagenderagaho, bimubashisha guhita yigobotora vuba icyo kibazo.

Thermal Turbulence yo isobanurwa nk’ikinyuranyo cya Clear-Turbulence gusa kwiyongera k’ubushyuhe bikaba intandaro ituma bibaho.

Ubwo bushyuhe bushobora gutanga ibicu bizwi ku izina rya "cumulonimbus" bikunze kujyanirana n’ikubita ry’inkuba. Aha akenshi ngo biba byiza iyo umupilote agerageje kugendera hejuru yabyo.

Mu gihe bibayeho indege ikisanga muri ibyo bicu, ni byiza ko umupilote ayitwara asa nk’ugenda ayimanura yongera ayizamura nk’uburyo ifi igendamo iyo iri mu mazi kuko bifasha gutuma ibyo bicu bisa n’ibifite amabuye, bitakwangiza moteri y’indege nubwo bituma abagenzi bumva bameze nk’abari kurira imisozi.

Suart ahumuriza abagenzi ko badakwiye guhagarika imitima igihe babonye indege iri kugendera mu bicu, kubera ko byose atari ko bishobora guteza ikibazo ndetse hari n’ibyo indege iba ishobora gucamo umugenzi ntanabimenye.

Akomoza kuri Mechanical Turbulence yavuze ko ishobora guturuka ku mihindagurikire y’umuvuduko w’umuyaga uturutse mu biti cyangwa ku misozi, inyubako ndende cyangwa ku misozi imeze nk’urutare.

Iyi miyaga iyo ije, umupilote aba yumva isa n’iterura indege iyijyana hejuru ikongera igasa n’igarutse hasi ndetse muri iki gihe, agerageza guhanahana amakuru n’abo ku butaka bagenzura iby’indege n’ikirere hakarebwa niba kwegera ku butumburuke bwo hasi cyangwa ubwo hejuru byagira icyo bifasha maze bikaba ari byo bikorwa.

Wake Turbulence yo, ni imiyaga indege ihura na yo mu gihe igiye kugwa ku kibuga, ikabangama cyane ku gice cy’amababa y’indege ku buryo ashobora gukomeza akaragwa n’umuyaga igihe cy’iminota igera kuri ibiri kandi atari ubushake bw’umupilote. Biba binashobora guhungabanya indege ku buryo ibura uburinganire, keretse ku ndege ziremereye cyane.

Abagenzi batinya cyane iyi miyaga bahurira na yo mu ngendo, bagirwa inama yo kuba menge mu myanya bicaramo, birinda kwicara ku myanya iherereye hejuru y’amababa y’indege, bakicara ahagana mu gice cy’imbere kuko ari ho babasha kumva batekanye ugereranyije no kwicara mu gice cy’inyuma.

Banagirwa inama yo kwambara umukandara neza kuko baba batazi igihe iyi miyaga ishobora gutunguranira icyakora kandi ngo byababera byiza baramutse bahisemo gukora ingendo hakiri mu gitondo kuko ikirere gikunze kuba kigituje.

Turbulence ikunze gutuma indege igenda imeze nk'iri kunyura mu mikuku

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .