Wari uziko umugabo na we ashobora kugira ibimenyetso nk’iby’umugore we utwite

Yanditswe na Iradukunda Serge
Kuya 10 Mutarama 2020 saa 11:19
Yasuwe :
0 0

Abahanga mu buvuzi bagaragaje ko impinduka n’ibimenyetso biranga umugore utwite bishobora no kugera ku mugabo we.

Gutwita bigendana n’impinduka mu mubiri zishobora gutera umugore kugira ibimenyetso birimo; iseseme, kubabara mu nda, ikirungurira, ihindagurika mu bushake bwo kurya, isereri, kubabara umugongo, kubyimba amaguru n’ibindi.

Ibi bimenyetso ntibigarukira ku bigaragara inyuma gusa kuko no mu mitekerereze umugore utwite ashobora guhangayika, kugira agahinda, gusinzira nabi ndetse no kutagira ubushake bwo gukora imibonano mpuzabitsina.

Iyo ibi bimenyetso birenze umugore utwite ahubwo bikagera no ku mugabo iki gihe ibi byitwa ‘Couvade Syndrome’ mu cyongereza.

Umugore wo muri Leta zunze Ubumwe za Amerika witwa Kristen ubwo yari atwite yagezweho n’ibi bimenyetso bikunze kuranga abagore batwite, gusa icyamutunguye ni ukubona umugabo we Silas nawe agenda ahinduka mu myitwarire ndetse akarushaho kugaragaza ibimenyetso bisa neza neza n’ibye.

Muri iki gihe Silas yatangiye kubyibuha, guhurwa ibiryo bimwe na bimwe, kugira isesemi ndetse no kuruka. Nubwo Kristen yabanje kubikerensa kuko atumvaga ibyo ari byo, byaje gufata indi ntera ndetse umugabo araremba kumurusha.

Muri iki gihe nibwo nyuma yo kugana muganga bamenye ko umugabo we ikibazo afite ari Couvade Syndrome.

Umwanditsi w’igitabo ‘The Daddy shift’ kivuga byimbitse kuri iki kibazo, Jeremy Adam Smith, yavuze ko zimwe mu mpamvu zishobora gutera umugabo kugira iki kibazo ari uko mu gihe umugore we atwite nawe hari ibihinduka mu misemburo ye.

Ati “Mu myaka 20 ishize abahanga bagiye bavumbura ibintu bishya mu bijyanye n’uburyo umubiri w’umugabo uhinduka iyo babaye ababyeyi. Urugero umusemburo wa Testosterone uragabanuka, uwa Prolactin, ujyana no konsa ukiyongera ndetse n’undi wa Cortisol ufasha ababyeyi kwita ku byo abana bakeneye, mu buryo bwinshi umubiri w’umubyeyi w’umugore n’uw’umugabo irihuza mu gihe baba bagiye kuba ababyeyi”.

Abahanga bavuga ko iki kibazo gikunze nanone kugaragara ku bagabo bafite abagore babyara bibagoye, kuko baba babahangayikiye cyane igihe bongeye gutwita.

Imibare yerekana ko kimwe cya kabiri cy’abagabo bafite abagore batwite nabo batangira kuzana no kwiyumvamo bimwe mu bimenyetso nk’iby’umugore utwite birimo, kuruka, kugira isesemi, kugira isereri, udasinzira neza ndetse no kubyibuha.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .