Ibi ahanini bishingira ku byitwa ubuhanuzi akora, kimwe n’abandi bapasiteri muri iki gihe, buvuga buhamya ibintu bizabaho, ariko abantu bagategereza amaso agahera mu kirere.
Bishop Rugagi ni Umuyobozi w’Itorero Abacunguwe. Mu ntangiriro za 2018 yakoze igikorwa cyanenzwe na benshi, yagaragaye ahanurira imbere y’igiseke cy’amaturo.
Uwamugeraga imbere amaze gutura, yamubazaga icyo yifuza. Icyo gihe yavuze ko atanze imiturirwa, imodoka zigezweho nka Land Cruiser n’ibindi by’agaciro.
Benshi barabinenze, babyita ubuyobe no gutekera abantu imitwe kugira ngo abone amafaranga yo kugura imodoka zigezweho n’ibindi kuko uwo yahanuriraga yabaga amaze gushyira amafaranga muri icyo giseke.
Ntakibarizwa mu Rwanda ubu kuko asigaye atuye muri Canada. Itorero rye n’intama yari ayoboye zaratatanye, bamwe basubiye mu matorero bahozemo ariko abamunambyeho bakurikira inyigisho ze kuri Televiziyo ya TV7 yasize ashinze isigaye ikorera kuri Youtube.
Yongeye kumvikana na none mu mvugo yanenzwe bikomeye, ko agiye gukiza abantu Coronavirus binyuze mu masengesho.
Mu butumwa bwanyuze kuri TV7, yavuze ko Imana iri kumwiyereka kuri COVID-19.
Yakomeje ati “Nawe nuyirwara, iyo nimero iri kuri televiziyo yawe, uyihamagare. Ndakubwira nti uramutse upfuye, uzatangaze ngo ndi umuhanuzi w’ibinyoma. Uzatinye icyo ntangaje ku mugaragaro. Sindi umupfumu uragura aho bihisha. Ndavuga ku mugaragaro Isi yose ibibona.’’
Yavuze ko hari abamuhamagaye bafite COVID-19 n’abatumye abavandimwe babo gushaka ababasengera ndetse ngo hari uwo mu Bubiligi, Texas na Afurika y’Epfo bakize.
Ati “Ndashima Imana, ubutumwa ndabufite bw’abakize COVID-19. Ni ibitangaza byabaye ku buzima bwawe. Abo ni bo nibuka ubutumwa mwanyoherereje, Imana ishimwe ko mwohereje izindi zivuga ko mwakize icyo cyago cyateye Isi. Icyo nicyo gitangaza, ndababwiye ngo banywe amazi ashyushye. Mwizere Yesu, nyuma yo kuyanywa kira icyo cyago cyawe.’’
Si ubwa mbere avuga amagambo nk’aya, ariko ibyo yavuze bigahera mu mvugo gusa. Nko mu ntangiriro za 2018 yagarutsweho cyane nyuma yo kuvuga ko Umunyana Shanitah azaba Miss Rwanda 2018, bikarangira atabigezeho.
Byatumye abantu bamuha urw’amenyo, aba iciro ry’imigani ndetse ushatse kugaragaza umuntu uvuga ibinyoma akabyita ‘Gushanita’.
- Indi nkuru wasoma: Bishop Rugagi yishyuje abo yakopye udutabo, anasaba abakirisitu gutanga amaturo batavungura
Bishop Rugagi abinyujije kuri @Tv7Channel yagarutse asatura COVID-19 yugarije Isi! Uyu munyabitangaza arazwi cyane mu Rwanda. Ni uwa mbere wigaragaje, abandi bararuciye bararumira. @AkayezuJa @JanvierPopote @IGIHE @GateteGilbert2 mwamwumvise se?#GumaMuRugo #DuhashyeCOVID-19 pic.twitter.com/yEb3F4qHle
— Ishimwe Israel (@ishimweisrael) April 22, 2020
Uyumugabo kombona agiye gutuma akazi katorohera @RwandaHealth kuko aratuma ubwandu bwiyongera mu gihugu abantu banga kwivuza
— Eng Pacifique, (@PacifiqueNZIGI) April 22, 2020
Va ku ibandi.Ubu ko yagurutse se?
— Munyansanga Chryso (@MunyansangaChr) April 22, 2020
Uyu mutekamitwe ari muyahe? Bomboclaat!
— Andrew K. Rwamorwimbunda 🇷🇼 (@rwamorwimbunda) April 22, 2020
Hhh... Ngo nuyirwara uzamuhamagare looo arabeshya uzahamagare 114. None ngo uramutse upfuye uzavuge ngo numuhanuzi w'ibinyoma! None wabivuga ute kdi wapfuye... RUGAGI weeeee.... Ntabwo turinjiji bigezaho twaguhamagara pe
— bados amani (@AmaniBados) April 22, 2020
TANGA IGITEKEREZO