Mugiraneza uyobora REG yatowe nk’umuyobozi w’ikigo w’umwaka muri Afurika

00:00:00 IGIHE NETWORK

KINYARWANDA

ENGLISH

FRANCAIS

Mugiraneza uyobora REG yatowe nk’umuyobozi w’ikigo w’umwaka muri Afurika

Yanditswe na Mugabo Jean d’Amour

Kuya 3 April 2017 saa 11:10

Yasuwe :

Yavuzweho:

Ikinyamakuru cyo mu gihugu cy’Ubwongereza cyitwa “The African Leadership Magazine” cyibanda ku miyoborere muri Afurika, cyatoye Umuyobozi Mukuru wa Sosiyete ishinzwe Ingufu mu Rwanda (REG), Jean Bosco Mugiraneza, nk’umuyobozi mukuru w’ikigo w’umwaka wa 2016 muri Afurika.

Mu butumwa bageneye REG, iki kinyamakuru cyavuze ko cyamuhisemo nk’umuyobozi w’umwaka kigendeye ku nshingano cyiyemeje zo guteza imbere no gushyigikira imicungire myiza, indangagaciro ndetse n’umusaruro ibigo bitanga ku rwego rw’umugabane w’Afurika mu guteza imbere ingufu n’ibikorwa remezo.

Iki gihembo azagishyikirizwa ku mugaragaro mu nama yiga ku bikorwaremezo n’ingufu muri Afurika izabere i London mu Bwongereza kuwa 7 Mata 2017.

Mu butumwa The African Leadership Magazine yageneye Mugiraneza, bugira buti “Twahisemo kuba ari wowe tugenera iki gihembo cy’Umuyobozi Mukuru (CEO) w’umwaka kubera ko twasanze uri umwe mu bayobozi b’intangarugero kandi barangajwe imbere n’iterambere. Iki gihembo uzagishyikirizwa imbere y’inshuti, abafatanyabikorwa, n’itangazamakuru mpuzamahanga ndetse n’abandi bayobozi bakomeye ku rwego rwa Afurika.”

Iki gihembo kuva cyashyirwaho, kimaze guhabwa abantu barimo Hifikepunye Pohamba wahoze ari Perezida wa Namibia, Jakaya Kikwete wahoze ari Perezida wa Tanzania, Dr Ernest Bai Koroma, Perezida wa Sierra Leone; Ellen Johnson Sirleaf, Perezida wa Liberia; John Kufour wahoze ari Perezida wa Ghana; Dr Mo Ibrahim washinze umuryango utanga ibihembo by’imiyoborere “Ibrahim Prize for Leadership”; Xavier Luc-Duval, Minisitiri w’Intebe wungirije akaba na Minisitiri w’Imari mu Birwa bya Maurice, ndetse na Mohammed Dewji, Umuyobozi wa MeTL Group muri Tanzania.

REG imaze kwigaragaza ku rwego rw’Akarere nk’ikigo cy’indashyikirwa, n’umwaka ushize yagenewe igihembo kubera guteza imbere urwego rw’ingufu cyiswe “East Africa’s Most Impactful Energy Development Corporation of the Year Award”. Iki yagiherewe mu muhango wo gutanga ibihembo ku bigo bishinzwe ingufu ku rwego rw’Afurika kuwa 24 Kamena 2016 wateguwe nabwo n’iki kinyamakuru.