Ku munsi wa nyuma w’irushanwa ngarukamwaka ry’amagare rizenguruka Cameroun ryitiriwe umugore wa Perezida Paul Biya; Nsengimana Jean Bosco yanikiriye bagenzi be bava Sangmélima bajya Yaoundé ku ntera ya kilometero 169 akoresheje amasaha 4:09’42".

Nsengimama w’imyaka 22 wegukanye “Tour du Rwanda” umwaka ushize, akinira ikipe ya Stradalli - Bike Aid mu Budage, yakurikiwe n’Umufaransa, Simon Guglielmi w’imyaka 19 amusize umunota n’amasegonda ane.

Mugisha Samuel w’imyaka 18 wari witabiriye iri siganwa bwa mbere yasoje ari ku mwanya wa kane, Tuyishimire Ephrem aba uwa 15, Nathan Byukusenge yasoje ari uwa 21 akurikiwe na Karegeya Jeremie waje ku mwanya wa 22.

Ku wa Gatandatu tariki 15 Ukwakira 2016, Nathan Byukusenge yari yabaye uwa Kabiri bava Ngolbang bajya Meyomessala ku ntera ya kilometero 131 asizwe amasegonda ane na sahbaoui Soufiane wo muri Maroc. Mugisha Samuel yabaye uwa karindwi, Nsengimana Jean Bosco aza ari uwa 11, Karegeya Jeremie aba uwa 15 naho Tuyishimire Ephrem aba uwa 19 mu bakinnyi 42 babashije kurangiza icyo cyiciro.

Ku rutonde rusange, Abanyarwanda bose basoje mu bakinnyi 20 ba mbere barimo Nsengimana Jean Bosco ku mwanya wa 11, Nathan Byukusenge ku wa 13, Karegeya Jeremie ku wa 14, Mugisha Samuel ku wa 18 naho Tuyishimire Ephrem asoza ku mwanya wa 19.

Muri rusange muri aya marushanwa, ikipe y’u Rwanda yasoje iri ku mwanya wa kabiri ikurikiye SNH Vélo Club yo muri Cameroun.

Nsengimana yabaye umunyarwanda wa mbere wegukanye agace (etape) muri Grand Prix Chantal Biya

Nsengimana Jean Bosco yabaye uwa mbere mu gace ka nyuma k'irushanwa

Mu gusiganwa ahaterera, Nsengimana yabaye uwa kabiri

Mu irushanwa ryose Nsengimana yasoje ku mwanya wa 11

Ikipe y'u Rwanda yasoje irushanwa iri ku mwanya wa kabiri