Abanyarwanda baba mu Bubiligi bashyiriweho uburyo bwo kunganira Mutuelle de Santé

Yanditswe na Bukuru JC
Kuya 5 Gashyantare 2020 saa 05:08
Yasuwe :
0 0

Ambasade y’u Rwanda mu Bubiligi yashyiriyeho abanyarwanda n’inshuti zabo baba muri iki gihugu na Luxembourg, uburyo bwo kunganira gahunda ya leta y’ubwisungane mu kwivuza ‘Mutuelle de Santé’.

Gushyiraho konti muri banki izajya ishyirwaho inkunga yo kunganira Mituweli, bikozwe nyuma y’icyifuzo cyatangiwe mu nama y’Igihugu y’Umushyikirano ya 17 yabaye kuwa 19-20 Ukuboza 2019.

Ku munsi wa kabiri w’iyi nama, Safari Christine wo mu Ntara ya Diaspora y’u Buholandi, yagaragaje ko hari uburyo abanyarwanda baba muri Diaspora, bashyigikira gahunda za leta ariko bigakorwa mu kajagari cyangwa mu buryo bwo gutatanya ingufu.

Yagize ati “Hari ukuntu dufasha muri Mituelle de santé, tukabikora mu matsinda nkabona bisa nk’aho birimo akavuyo kandi biba birimo amafaranga menshi, nkaba nibaza niba twakorerwa ikigega kikaba ikigega cya Diaspora noneho ayo mafaranga ya za mituweli dukura hirya no hino tukayashyira muri icyo kigega kigafasha abantu batishoboye”.

Iki cyifuzo cye cyafashweho umwanzuro muri iyi nama kuko uwa munani mu yayifatiwemo uvuga ku ‘Gushyiraho uburyo bwo gufasha Abanyarwanda baba mu mahanga kunganira ishyirwa mu bikorwa rya gahunda za Leta zinyuranye harimo Ubwisungane mu Kwivuza (Mutuelle de Santé) no gukoresha ubumenyi bafite mu ngeri zitandukanye iyo baje mu kiruhuko mu Rwanda’.

Itangazo ryashyizweho umukono na Ambasaderi w’u Rwanda mu Bubiligi, Amandin Rugira rivuga ko hashyizweho konti iri mu izina rya RSSB-CBHI, nimero yayo ni 440207884 iri muri Banki ya KCB Bank.

Iri tangazo rivuga ko “Ambasade y’u Rwanda i Bruxelles, irahamagarira abanyarwanda n’inshuti z’u Rwanda batuye mu Bubiligi na Luxembourg, kwitabira iki gikorwa cy’ingenzi ku bavandimwe bacu babikeneye”.

Guhera muri uyu mwaka w’ingengo y’imari Guverinoma yongereye amafaranga ishyira mu bwisungane mu kwivuza ‘Mutuelle de santé’.

Ikigo cy’Ubwiteganyirize mu Rwanda (Rwanda Social Security Board-RSSB) kivuga ko iyi nyongera ingana na miliyari 10 z’amafaranga y’u Rwanda, izafasha muri gahunda yo kugeza ubuvuzi kuri bose.

Imibare ya RSSB igaragaza ko ingano y’imisanzu y’abanyamuryango ba mutuelle de santé harimo nayo leta yabageneraga ari milyari 32.8, mu gihe ayo bakoresha angana na miliyari 47.4 ibintu byatumaga bagira igihombo cya miliyari 14.6 buri mwaka.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza