Itsinda ry’Abanyarwanda baba mu mahanga basuye Intara y’Amajyaruguru

Yanditswe na Karirima A. Ngarambe
Kuya 12 Mutarama 2020 saa 10:07
Yasuwe :
0 0

Abanyarwanda batuye mu bihugu bitandukanye byo ku isi bakiriwe n’ubuyobozi bw’Intara y’Amajyaruguru, baraganira baranasabana.

Kuwa Gatanu tariki ya 10 Mutarama 2020, nibwo Guverineri w’Intara y’Amajyaruguru, Gatabazi Jean Marie Vianney yakiriye Itsinda rya Diaspora Nyarwanda rigizwe n’abantu barenga 30 baba mu bihugu bitandukanye byo ku Isi.

Mu kiganiro yagiranye na IGIHE Guverineri Gatabazi yavuze ko kwakira abo banyarwanda ari mu rwego rwo kubereka iyo Ntara, bakamenya n’ibyiza bitatse igihugu cyabo.

Yagize ati “Birimo n’inyungu ku mpande zombie kuko bamenya igihugu cyabo n’ibyiza bigitatse, bakaruhuka mu mutwe kuko abenshi baba bamaze igihe bakora aho muri ibyo bihugu bataruhuka. Natwe batubera abavugizi mu nshuti zabo, imiryango yabo bazanye nayo mu modoka, barara mu mahoteli bagasiga bazamuye akarere mu bukungu, ni bintu byiza cyane tuzakomeza.”

Gatabazi yavuze ko banaganiriye ku mahirwe atandukanye ari mu Ntara y’Amajyaruguru ashobora gushorwamo imari, akabyazwa umusaruro.

Guverineri Gatabazi yanabasabye gukomeza gushyira imbaraga mu kwegera urubyiruko no kugerageza kubohora abana bo mu miryango yinangiye idashaka guhinduka, bakava i buzimu bakajya ibuntu.

Yongeye kubasaba gukomeza urukundo bafitiye Igihugu cy’u Rwanda no gukomeza guharanira icyateza imbere umuturage mugenzi wabo, bitabira gushora imari mu bikorwa bitandukanye birimo ubuhinzi, ubukerarugendo, amahoteli, uburezi, ikoranabuhanga n’ibindi.

Yabashimiye uburyo bagiye bategura za Rwanda Days bashyizemo imbaraga bigatuma Perezida Paul Kagame ahacana umucyo, abasaba gukomeza guharanira ko umunyarwanda aho ari hose yarangwa n’imyitwarire myiza, imigenzereze n’imibanire ihesha agaciro Igihugu bityo bikazakomeza gutuma amahanga yose yifuza kuza mu Rwanda.

Umuyobozi w’ungirije Perezida w’ishyirahamwe ry’Abanyarwanda batuye mu Mahanga RDGN (Rwandan Diaspora Global Netwerk), Thomas Ntagozera yavuze ko nubwo baba mu mahanga, umutima wabo uhora mu Rwanda.

Ati “Tuba mu mahanga ariko umutima wacu uba mu Rwanda. Turashimira Minisiteri y’Ububanyi n’Amahanga uko yadushyiriyeho urwego rutugenewe by’umwihariko rukamenya amakuru yacu. Uko tuje twakirwa neza, tugasobanurirwa ibyo twifuza kumenya.”

Yashimiye ubuyobozi bw’Intara y’Amajyaruguru uburyo bakirwa dore ko bamaze kuyisura inshuro eshatu.

Abo banyarwanda mu gihe bamaze bari mu Ntara y’Amajyaruguru, basuye ishuri rya Gisirikare rya Nyakinama, basuye Ishuri rikuru ry’Imyuga n’Ubyumenyingiro rya Musanze banareba n’ibindi bikorwa by’iterambere muri iyo Ntara.

Guverineri Gatabazi yashimiye abanyarwanda baba mu mahanga uko bitabiriye ubwutumire bwe
Guverineri Gatabazi (ibumoso), Thomas Ntagozera na Nkaka Damien ubwo bari mu Ntara y'Amajyaruguru
Gatabazi yasobanuriye abanyarwanda baba mu mahanga, amahirwe ari mu Ntara ayobora ashobora gushorwamo imari
Abanyarwanda baba mu mahanga babonye umwanya uhagije wo kuganira n'ubuyobozi bw'Intara y'Amajyaruguru
Thomas Ntagozera yavuze ko nubwo baba mu mahanga, umutima wabo uhora mu Rwanda
Umuyobozi ushinzwe Ibikorwa by’Abanyarwanda baba mu Mahanga muri Minisiteri y’Ububanyi n’Amahanga, Maziyateke Sandrine aganiriza abitabiriye uwo muhuro
Umwe mu Banyarwanda batuye mu Mahanga atanga ibitekerezo
Abanyarwanda baba mu mahanga biyemeje gukomeza kuba ba amabasaderi beza b'u Rwanda aho batuye

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .