Abanyarwanda baba muri Turikiya bizihije umunsi w’Intwari, batora abayobozi bashya

Yanditswe na IGIHE
Kuya 5 Gashyantare 2020 saa 09:31
Yasuwe :
0 0

Umuryango w’abanyarwanda baba muri Turikiya, guhera kuwa 31 Mutarama kugeza kuwa 2 Gashyantare 2020 bateraniye mu mujyi wa Duzce uherereye mu birometero 25o uvuye mu murwa mukuru Ankara, mu nteko rusange ngarukamwaka bizihiza umunsi w’Intwari, baboneraho no gutora abayobozi bashya.

Ni igikorwa cyateguwe na Ambasade y’ u Rwanda muri Turikiya, umuryango w’abanyarwanda baba muri icyo gihugu na Kaminuza ya Duzce.

Iyo nama yitabiriwe n’abanyarwanda 149 biganjemo abanyeshuri n’abandi banyarwanda baba muri Chypre.

Ambasaderi w’u Rwanda muri Turikiya, Williams Nkurunziza yaboneyeho umwanya wo kuganira n’ubuyobozi bwa Kaminuza ya Duzce, ibiganiro byabo byibanda cyane ku bufatanye mu buhinzi n’ibijyanye n’amashyamba.

Bahuye tariki 31 Mutarama aho impande zombi zaganiriye ku buryo haba ubufatanye mu by’ubushakashatsi mu bijyanye n’ibihingwa by’ibinyamisogwe yerera mu butaka bijya kumera nk’ubunyobwa.

Umuyobozi w’iyo kaminuza, Prof. Dr. Nigar Demircan Cakar yavuze ko azohereza abarimu b’inzobere mu by’ubutaka n’amashyamba, bakaza gukora ubushakashatsi mu Rwanda kugira ngo barebe ko hari ibihingwa byera muri Duzce byakwera no mu Rwanda.

Yavuze ko kandi azohereza inzobere mu by’amashyamba n’inzobere mu by’inyoni gukora ubushakashatsi mu mashyamba atandukanye mu Rwanda, ku miti gakondo n’inyoni zo mu Rwanda.

Kaminuza ya Duzce izwiho kuba imwe mu zikomeye muri Turikiya mu bijyanye n’amashyamba, ubuhinzi ndetse n’ubuvuzi.

Abanyarwanda baba muri Turikiya baboneyeho n’umwanya wo kwifatanya n’abayobozi ba Kaminuza ya Duzce mu muganda, aho bateye ibiti mu gace kitiriwe Rwandan Park imbere muri Kaminuza.

Muri Kaminuza ya Duzce higa abanyarwanda 30 mu bijyanye n’ubuvuzi, ububanyi mpuzamahanga n’ibindi.

Kuwa 1 Gashyantare, Abanyarwanda baba muri Turikiya n’inshuti z’u Rwanda bifatanyije kwizihiza umunsi w’Intwari, haba irushanwa ry’umupira w’amaguru ryitiriwe ubutwari aho ikipe y’u Rwanda yatwaye igikombe itsinze ikipe ya Kaminuza ya Duzce.

Herekanywe kandi filime The 600 igaragaza ubutwari bw’abasirikare b’Inkotanyi bari mu ngoro y’Inteko Ishinga Amategeko ubwo Jenoside yatangiraga, bagatanga umusanzu ukomeye mu kuyihagarika.

Ambasaderi Nkurunziza yavuze ko ari iby’ingenzi ko abanyarwanda bafatanya mu kurinda ibyagezweho, bafasha Guverinoma muri gahunda zigamije iterambere n’imibereho myiza.

Yasabye urubyiruko kwigira ku butwari bw’intwari z’u Rwanda, zatanze ubuzima bwazo mu kwitangira kubohora u Rwanda.

Kuri uwo munsi kandi hakozwe inteko rusange y’umuryango w’abanyarwanda baba mu mahanga, ishami rya Turikiya, bareba ibyagezweho umwaka ushize n’ibyitezwe uyu mwaka.

Hakozwe amatora hatorwa komite nshya , Salim Niyigena atorerwa kuba umuhuzabikorwa,, umwungirijwe aba Faustin Rutayisire, David GATARI atorerwa kuba umunyamabanga, ushinzwe uburinganire yabaye Latifa Vanessa KARANGWA, ushinzwe umutungo aba Honorine MIZERO mu gihe Aisha UWASE yatorewe ishami rya siporo n’urubyiruko.

Mu nteko rusange, abanyarwanda baba muri Turikiya batoye Komite nshya, banafata ingamba z'ibizakorwa uyu mwaka
Abanyarwanda baba muri Turikiya bifatanyije n'inshuti z'u Rwanda bizihiza umunsi w'intwari
Abanyarwanda baba muri Turikiya baboneyeho umwanya wo kwishimira ibyagezweho umwaka ushize
Mu irushanwa ryitiriwe ubutwari, ikipe y'u Rwanda yatsinze iya Kaminuza ya Duzce ibitego 6-3

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza