Abayobozi ba Diaspora Nyarwanda muri Amerika bahawe imihigo yo kwesa

Yanditswe na IGIHE
Kuya 12 Gashyantare 2020 saa 10:31
Yasuwe :
0 0

Ku nshuro ya mbere mu mateka abayobozi ba Diaspora Nyarwanda muri Leta Zunze Ubumwe za Amerika basinye imihigo y’ibyo bagomba gukora mu mwaka wa 2020- 2021 ku isonga birimo guteza imbere ibikorerwa mu Rwanda no guhangana n’abapfobya Jenoside yakorewe Abatutsi.

Iyi mihigo yasinyiwe mu mwiherero ngarukamwaka wahuje abayobozi 27 ba za diaspora bahuriye Washington DC. Wigiwemo ibyateza imbere umuryango Nyarwanda n’uruhare rw’abo mu mahanga mu guteza imbere igihugu cyababyaye binajyanye n’icyerekerezo 2050.

Perezida w’Umuryango w’Abanyarwanda baba muri Amerika yashimiye abayobozi n’abafatanyabikorwa babo bitabiriye uwo mwiherero wabaga ku nshuro ya gatandatu.

Babwiwe ko mu byo biyemeje umwaka ushize byo kongeraho RCA nshya eshanu mu rwego rwo kwegera Umunyarwanda ahari hose muri Amerika bawurengejeho bakaba uyu mwaka bawutangiye barashyizeho zirindwi.

Yagize ati “Intambwe twateye ntisubira inyuma kandi tuzakomeza kwegera Umunyarwanda aho ari hose muri gahunda izagera muri leta 50.’’

Ambasaderi w’u Rwanda muri Leta Zunze Ubumwe za Amerika, Mukantabana Mathilde, yashimiye abayobozi ibikorwa byiza bakora mu kugaragaza isura nziza y’u Rwanda.

Yabasabye gushyira hamwe kugira ngo biyubake kandi banigira hamwe icyateza imbere u Rwanda.

Ambasaderi Mukantabana yijeje ubufatanye bwa Ambasade mu gihe cyose bazayiyambaza.

Minisitiri w’Ubutegetsi bw’Igihugu, Prof Anastase Shyaka, yibukije abayobozi ba Diaspora Nyarwanda ko aribo bahanzwe amaso nk’abareberera inyungu z’intara ya gatandatu y’u Rwanda.

Yakomeje ati “Nimwe ba meya na ba guverineri mu ntara ya gatandatu. Mufite inshingano zo kumenya neza umubare w’abaturage mufite bityo bikabafasha gufata ingamba zifatika no kwesa imihigo mukoresheje imibare n’ibipimo bifatika.’’

Yabibukije ko bakwiye gushyira Ubunyarwanda muri byose kugira ngo binabafashe kugaruza intama zatakaye.

Muri uyu mwiherero hanabaye ibiganiro byagaragarijwemo intambwe imiryango y’Abanyarwanda baba mu mahanga (RCA) bagezeho biyubaka, uko bateza imbere ishoramari n’izindi gahunda zigamije guteza imbere ubukungu bw’u Rwanda n’imibereho y’abaturage.

Abawitabiriye bemeje ko mu mwaka wa 2020-2021 imihigo yahurijweho izatangirwa raporo kuri Minisiteri y’Ubutegetsi bw’Igihugu.

Mu mihigo yasinyiwe harimo kugaragaza ubumwe n’ubwiyunge muri za RCA no gushyira Ubunyarwanda imbere mu rwego rwo gucyura intama zatakaye, kurwanya abifuriza u Rwanda nabi n’abapfobya Jenoside yakorewe Abatutsi; kongera imbaraga mu gukangurira Abanyamerika gusura u Rwanda binyuze muri gahunda yo kumenyekanisha ibyiza birurimo ‘Visit Rwanda’, aha buri RCA izajya igaragaza ibyiza by’u Rwanda binyuze mu mamurikagurisha y’ubukerarugendo abera mu mijyi 27 ya Amerika; gushakira isoko ibicuruzwa bya Made In Rwanda mu isoko rya Amerika; kubaka ubucuti hagati y’imijyi batuyemo n’iyo mu Rwanda ndetse no kwigisha umuco, ururimi, imbyino n’indangagaciro Nyarwanda.

Buri muyobozi yasabwe kuzatanga raporo y’ibyakozwe nyuma y’umwaka. Uyu mwiherero wasojwe abayobozi bifatanya n’Abanyarwanda n’inshuti zabo mu gusengera u Rwanda no kururagiza Imana.

Minisitiri w’Ubutegetsi bw’Igihugu, Prof Anastase Shyaka, yasabye Abanyarwanda baba mu mahanga guhorana u Rwanda ku mutima
Hatanzwe ibiganiro bitandukanye ku gukunda igihugu
Abitabiriye umwiherero na bo batanze ibitekerezo bizafasha kwesa imihigo yatanzwe
Ni umwiherero witabiriwe n'abantu batandukanye baturutse muri Leta zinyuranye muri Amerika
Abayobozi ba Diaspora Nyarwanda muri Leta Zunze Ubumwe za Amerika bahawe imihigo yo kwesa mu mwaka wa 2020-2021
Abayobozi bitabiriye iki gikorwa bafashe ifoto y'urwibutso nyuma y'umwiherero

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .