00:00:00 IGIHE NETWORK KN KINYARWANDA EN ENGLISH FR FRANCAIS

Ambasaderi Mukangira yasabye urubyiruko kutagira ubwoba imbere y’abahakana Jenoside yakorewe Abatutsi

Yanditswe na IGIHE
Kuya 10 Mata 2021 saa 12:43
Yasuwe :
0 0

Abanyarwanda n’inshuti z’u Rwanda baba mu Buhinde, Bangladesh, Sri Lanka, Maldives na Nepal bibutse ku nshuro ya 27 Jenoside yakorewe Abatutsi.

Tariki 8 Mata 2021, abanyarwanda baba mu bihugu by’u Buhinde, Bangladesh, Sri Lanka, Maldives na Nepal bifatanyije n’inshuti z’u Rwanda kwibuka ku nshuro ya 27 Jenoside yakorewe Abatutsi.

Ni umuhango wabaye hakoreshejwe uburyo bw’ikoranabuhanga mu kwirinda icyorezo cya Covid-19, ariko hari n’Abanyarwanda bake bahuriye mu cyumba cy’inama cya Ambasade y’u Rwanda mu Buhinde bifatanya na Ambasaderi n’abadipolomate muri uwo muhango wo Kwibuka.

Umuhango wo Kwibuka watangijwe n’ijambo rya Ambasaderi Jacqueline Mukangira, wateruye ashimira Ingabo zahoze ari iza RPA (Rwanda Patriotic Army) zari ziyobowe na Perezida wa Repubulika Paul Kagame, zikaba zararokoye abicwaga, zigahagarika Jenoside yakorewe Abatutsi, zigaha Abanyarwanda igihugu kizira ivangura n’akarengane.

Yakomeje avuga ku mateka ya Jenoside, asobanura ubugome bw’indengakamere abicanyi bishemo abahigwaga, ahumuriza abarokotse Jenoside ndetse ashima ibikorwa Leta y’Ubumwe bw’Abanyarwanda yakomeje gukora mu kuramira abarokotse no kubaka u Rwanda ruzira amacakubiri kandi rushyize imbere Ubumwe bw’Abanyarwanda.

Ambasaderi kandi yakanguriye urubyiruko ruri mu bihugu ahagarariyemo u Rwanda kwirinda uwabazanamo amacakubiri uwo ari we wese, abasaba kuzajya bamugaragaza hakiri kare.

Yasabye urubyiruko kandi kujya bavuguruza abakwiza ibinyoma kuri Jenoside yakorewe Abatutsi, bifashishije ubumenyi bakura mu bitabo, ibinyamakuru, imbuga nkoranyambaga ndetse n’ibiganiro nk’ibyo bahawe n’impuguke kuri Jenoside zirimo Dr Bideri Diogene na Habonimana Charles.

Yifashishije ijambo rya Perezida wa Repubulika ku munsi wo gutangiza Icyunamo ku nshuro ya 27, ati “Niba ababeshya kuri Jenoside badatinya kuvuga ibinyoma, kuki twe tuzi ukuri twagira isoni zo kugaragaza ukuri?

Yongeyeho ko urubyiruko rukwiye kwitandukanya n’ikibi, ati “Rubyiruko rwacu, niba mubona ukuri, kuki matakuvuga? Kuki murebera ikinyoma kigahabwa intebe?”

Mu kuvuga ku Rwanda rw’ubu agereranya na Leta yakoze Jenoside, Ambasaderi Jacqueline Mukangira yabwiye urubyiruko ko rufite igihugu cyiza.

Ati “Mwakuriye mu Rwanda rwiza rwimakaza urukundo, ubumwe no kurwanya akarengane. Ntimuzi ivangura rihawe intebe na Leta, ritanya abenegihugu rishingiye ku moko n’uturere. Muramenye rero hatazagira ubabeshya akabashyiramo amacakubiri aca ukubiri n’Ubunyarwanda. Ntimuzamwemerere, muzamwamaganire kure, kuko amacakubiri nta kindi kiyavamo uretse urupfu, kumena amaraso, kubangamira uburenganzira bwa muntu n’ibindi bitari byiza”.

Umujyanama Mukuru mu by’amategeko muri Kimisiyo y’Igihugu yo kurwanya Jenoside (CNLG), Dr. Bideri Diogene, yaganirije abitabiriye uwo muhango ku “Itegurwa n’Ishyirwa mu bikorwa ry’umugambi wa Jenoside yakorewe Abatutsi”.

Dr. Bideri yavuze ku bihe byaranze ivangura mu Rwanda guhera ibihe by’amashyaka yashingiraga ku bwoko, agaruka cyane ku yazanye amacakubiri ariyo APROSOMA ya Gitera Joseph, ari na we wazanye icyo yise “Amategeko icumi y’Abahutu”, iyo nyandiko y’urwango ikaba yaragaruwe na Ngeze Hassan mbere ya Jenoside gato, mu kinyamakuru cye cy’intagondwa cyitwaga ‘Kangura’ cyakangurigaga Abahutu kwica Abatutsi.

Dr Bideri kandi yavuze ko inzego za gisirikare n’iz’iperereza z’u Bufaransa n’u Bubiligi zari zizi ko Leta ya Habyarimana yarimo gutegura Jenoside yo kumara Abatutsi.

Yavuze ubuhamya bwa Birara Jean wahoze ari Umuyobozi wa Banki Nkuru y’u Rwanda, wigeze kuvuga ko Jenerali Deogratias Nsabimana wari umugaba w’ingabo ku bwa Habyarimana, yamubwiye ko Leta ya Habyarimana yari yarateguye lisiti y’Abatutsi bazicwa mu gihugu.

Habimana Charles wanditse igitabo cyitwa “Moi, le dernier Tutsi” kivuga ku mateka ya Jenoside yakorewe Abatutsi iwabo aho akomoka i Kangoma na Mayunzwe, yagarutse ku “Ihakana n’ipfobya rya Jenoside yakorewe Abatutsi mu Rwanda mu 1994, rikorerwa hanze y’u Rwanda n’uruhare rw’urubyiruko rw’Abanyarwanda mu kubirwanya”.

Habimana yavuze ku mateka ya Jenoside yakorewe Abatutsi, ariko yibanda ku isesengura riganisha ku bitangazwa n’abapfobya Jenoside n’amayeri bakoresha mu mugambi wabo ukubiye mu cyiciro gisoza ibiranga Jenoside na gahunda zitegurwa zikanashyirwa mu bikorwa n’abayikoze n’abayihakana, aribyo ‘guhakana no gupfobya Jenoside’.

Yavuze ko abahakana bakanapfobya bafite uburyo bahana ijambo-banga (password) ku mbuga nkoranyambaga bakoresha, ku buryo abo ku migabane itandukanye bakoresha urubuga rumwe ukaba wakeka ko ari umuntu umwe nyamara ari benshi barukoreraho, amanywa n’ijoro, iminsi yose.

Yavuze ku bantu batandukanye baha ubufasha n’inkunga y’ibitekerezo abakoze Jenoside, abayihakana n’abayipfobya, barimo ba Judi Rever, ba Philip Reyntjens n’abandi badutse vuba nka Michela Wrong, ndetse n’ibinyamakuru nka BBC.

Habimana Charles yabwiye urubyiruko ko bakwiye kwiga bagasobanukirwa, bagasoma amateka ya Jenoside, bakagira ubumenyi buzatuma bashobora kuvuguruza abahakana bakanapfobya Jenoside yakorewe Abatutsi.

Mu bika bitandukanye, uwo muhango waranzwe n’indirimbo zivuga kuri Jenoside yakorewe Abatutsi, zaririmbwaga imbonankubone n’umuhanzi Rwamihare Jean de Dieu, uzwi ku kabyiniriro ka Bonhomme.

Ambasaderi Jacqueline Mukangira yashimiye abitabiriye uwo muhango, ashimira Leta y’u Rwanda ikomeje kubanisha Abanyarwanda mu gihugu kizira ivangura, yongera kubwira urubyiruko ko rukwiye gushira ubwoba rugahangana n’abahakana bakanapfobya Jenoside yakorewe Abatutsi.

Ambasaderi w’u Rwanda mu Buhinde, Jacqueline Mukangira yasabye urubyiruko gushirika ubwoba bakarwanya abahakana n'abapfobya Jenoside yakorewe Abatutsi
Abanyarwanda batandukanye n'inshuti z'u Rwanda mu Buhinde babashije gukurikirana umuhango wo kwibuka bifashishije ikoranabuhanga
Abanyarwanda bake bahuriye mu cyumba cy’inama cya Ambasade y’u Rwanda mu Buhinde bifatanya na Ambasaderi n’abadipolomate muri uwo muhango wo Kwibuka.
Hifashishijwe ikoranabuhanga mu rwego rwo kwirinda icyorezo cya Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .