00:00:00 IGIHE NETWORK KN KINYARWANDA EN ENGLISH FR FRANCAIS

Ambasaderi Stanislas Kamanzi yagaragaje kwibuka nk’ingabo ikingira u Rwanda abashaka kuruca intege

Yanditswe na IGIHE
Kuya 18 Mata 2021 saa 05:10
Yasuwe :
0 0

Kuri uyu wa Gatandatu tariki 17 Mata 2021, Abanyarwanda baba mu bihugu bya Nigeria, Burkina Faso, Niger na Chad, bifatanyije na Ambasade y’u Rwanda muri Nigeria mu gikorwa cyo kwibuka ku nshuro ya 27 Jenoside yo muri Mata 1994 yakorewe Abatutsi.

Ni igikorwa cyabaye hifashishijwe ikoranabuhanga kubera ibihe isi irimo by’icyorezo cya Covid-19. Icyo gikorwa cyitabiriwe n’abanyarwanda basaga 70 batuye muri Nigeria, Burkina Faso, Niger na Chad.

Ambasaderi w’u Rwanda muri Nigeria, Stanislas Kamanzi, yashimiye abitabiriye iki gikorwa, kuko biri muri gahunda yo gukomeza ibikorwa byo kwibuka biteganyijwe mu minsi ijana uhereye tariki ya 7 Mata.

Yagize ati “ Turakomeza guha icyubahiro inzirakarengane zishwe zizira ko ari Abatutsi. Turakomeza kandi kuzirikana ububi bwa Jenoside n’ingengabitekerezo yayo, ari nako twiyemeza kuyirwanya buri wese ku giti cye, mu miryango yacu ndetse n’aho tubarizwa hose, haba mu mirimo yacu ya buri munsi ndetse n’aho dutuye.”

Ambasaderi Kamanzi yavuze kandi ko ari inshingano y’abanyarwanda bose gukomeza kurwanya abahakana n’abakwirakwiza ingengabitekerezo ya Jenoside, cyane cyane mu kumenyekanisha mu buryo busesuye ingingo zikubiye mu Mwanzuro w’Inama Nkuru y’Umuryango w’Abibumbye wo ku 21 Mata 2020 watowe n’ibihugu byose, wemeje ko umunsi wa 7 Mata uharirwa kuzirikana kuri Jenoside yo muri 1994 yakorewe Abatutsi, kuko ari bumwe mu buryo bukomeye bwo guca intege abayihakana n’abayipfobya.

Yagize ati “Muri ibi bihe byo kwibuka dusabwa gukomeza kuzirikana igihango cy’ubumwe dufitanye ubuziraherezo nk’abanyarwanda. Niyo ngabo twikingiza ku bashaka gukomeza kuduca intege no gutambamira intambwe tugezeho mu kubaka igihugu twisangamo twese kandi gifite agaciro”.

Senateri Prof. Jean Pierre Dusingizemungu, inzobere mu bushakashatsi burebana na Jenoside yakorewe Abatutsi, yatanze ikiganiro cye cyibanze ku ngingo yo kwibuka nk’umusingi ukomeye wo kwiyubaka no kubaka Igihugu.

Yibanze cyane cyane ku mateka yaranze jenoside n’ukuntu abanyarwanda bagiye bayikuramo buhoro buhoro, binyuze mu kwishakamo ibisubizo.

Senateri Dusingizemungu yibukije abitabiriye uwo muhango, ko kwibuka ari igikorwa cyo guhumuriza abacitse ku icumu rya Jenoside yakorewe Abatutsi.

Hashize ibyumweru bibiri u Rwanda rwinjiye mu minsi ijana yo kwibuka Jenoside yakorewe Abatutsi, yatangiye tariki 7 Mata 1994. Muri uyu mwaka, u Rwanda ruribuka ku nshuro ya 27.

Ambasaderi Stanislas Kamanzi yagaragaje kwibuka ari ingabo ikingira u Rwanda abashaka kuruca intege
Hacanwe urumuri rw'icyizere mu kwerekana ko u Rwanda rufite ejo hazaza heza
Prof Dusingizemungu yavuze ko kwibuka ari igikorwa cyo guhumuriza abacitse ku icumu rya Jenoside yakorewe Abatutsi
Uyu muhango wabaye hifashishijwe ikoranabuhanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .