00:00:00 IGIHE NETWORK KN KINYARWANDA EN ENGLISH FR FRANCAIS

Dr Diane Gashumba yatanze impapuro zo guhagararira u Rwanda muri Danemark

Yanditswe na Karirima A. Ngarambe
Kuya 21 January 2022 saa 07:42
Yasuwe :

Ambasaderi Dr Diane Gashumba yashyikirije Umwamikazi Margrethe II impapuro zimwemerera guhagararira u Rwanda muri Danemark.

Ni umuhango wabaye kuri uyu wa Gatanu tariki ya 21 Mutarama 2022.

Mu biganiro bagiranye, Umwamikazi yashimye uko u Rwanda rwongeye kwiyubaka nyuma ya Jenoside yakorewe Abatutsi.

Yagize ati “Danemark izakomeza guteza imbere umubano mwiza uri hagati y’ibihugu byombi.”

Ambasaderi Gashumba yagejeje ku Mwamikazi Margrethe II intashyo za Perezida Paul Kagame, anamusobanurira muri make ibyafashije u Rwanda kwiyubaka mu myaka isaga 28 ishize.

Ambasaderi Gashumba yagarutse kuri politike y’u Rwanda yo gushyira umuturage ku isonga no guharanira imibereho myiza kuri buri wese, ntawe uhejwe.

Yakomeje avuga ko byagezweho kubera icyizere abaturage bafitiye ubuyobozi ndetse n’imikoranire myiza n’abafatanyabikorwa. Ibyo ni nabyo byatumye u Rwanda rubasha no guhangana n’ubukana bw’icyorezo cya Covid19, aho ubu rwageze ku gipimo cya 40% rukingira nk’intego Ishami ry’Umuryango w’Abibumbye ryita ku buzima (OMS) ryari ryihaye mu 2021.

Ambasaderi Gashumba yakomeje ashimira Danemark ubufatanye bukomeje ku ntambwe ishimishije mu guteza imbere ishoramari n’ubuhahirane hagati y’ibihugu byombi.

Mu kiganiro kigufi na IGIHE, Amb. Gashumba yagize ati "Uyu muhango uba ufite agaciro kanini, kuko niwo mwanya Ambasaderi ashyikiriza Ubutumwa bwa Perezida wa Repubulika y’u Rwanda, Paul Kagame uwo bugenewe. Gushyikiriza Umwamikazi wa Danemark urwandiko rumpesha uburenganzira bwo guhagararira u Rwanda muri Danemark, ari nabwo mpita nemererwa gutangirayo inshingano nahawe n’Umukuru w’Igihugu, ni iby’agaciro gakomeye."

Yongeyeho ko yakoreshe uyu mwanya mu gusobanurira Umwamikazi wa Danemark aho u Rwanda rugeze mu rugendo rw’iterambere, ati "Wari n’umwanya wihariye wo kumenyesha Umwamikazi aho u Rwanda rugeze rwiyubaka, no gushimangira nyine umubano w’ibihugu byombi kuko burya guhura imbonankubone muganira byinshi."

Yashimiye Danemark uburyo ikurikirana mu butabera abakekwaho uruhare muri Jenoside yakorewe Abatutsi bahatuye, aho kugeza ubu babiri bari boherejwe mu Rwanda mu myaka yashize kugira ngo bagezwe imbere y’Ubutabera.

Muri iki gikorwa cyabereye mu Mujyi wa Copenhagen, Amb. Gashumba yahuye n’abayobozi batandukanye muri Ministeri y’Ububanyi n’amahanga ya Danemark, harimo n’Umunyamabanga wa Leta ushinzwe Iterambere, Madamu Lotte Machon, baganira uko hakongerwa ibikorwa by’ubufatanye mu by’ubukungu na dipolomasi.

Madamu Machon yashimye u Rwanda uko rwateje imbere ihame ry’uburinganire, rukaba ruri mu bihugu bya mbere ku Isi bifite umubare munini w’abari n’abategarugori bari mu nzego zifata ibyemezo.

Ambasaderi Gashumba afite icyicaro muri Suède akaba areberera inyungu z’u Rwanda no mu bihugu biherereye mu Majyaruguru y’u Burayi harimo Danemark, Norvège, Finland na Iceland.

Umwamikazi Margrethe II yashimiye u Rwanda uburyo rwabashije kwiteza imbere nyuma ya Jenoside yakorewe Abatutsi
Ambasaderi Gashumba yijeje ubufatanye bw'u Rwanda na Denmark mu guteza imbere umubano usanzweho

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .