Iradukunda Patrick yahawe ‘Diplôme Itukura’ ifite agaciro gahanitse mu Burusiya

Yanditswe na Ishimwe Israel
Kuya 4 Kanama 2020 saa 08:58
Yasuwe :
0 0

Iradukunda Patrick yabonye Impamyabumenyi y’Icyiciro cya Kabiri cya Kaminuza iri mu zubashywe mu Burusiya, iba ifite ibara ritukura mu kugaragaza itandukaniro ryayo n’izindi.

Uyu musore umaze imyaka itandatu mu Burusiya ari mu banyeshuri babiri b’Abanyarwanda basoje amasomo yabo mu bijyanye n’Ubugeni (Architecture) muri People’s Friendship University of Russia izwi nka RUDN iherereye mu Mujyi wa Moscow.

Iradukunda yize amashuri abanza mu Ishuri ribanza rya Kacyiru ya I. Ay’Icyiciro rusange ayiga mu bigo birimo Don Bosco cy’i Kabarondo na APAPER Kacyiru aho yasoreje mu 2010.

Amashuri yisumbuye yayasoreje muri Saint Joseph Integrated Technical Secondary School i Nyamirambo mu 2013, aho yize ibijyanye n’Ubwubatsi. Yavuye mu Rwanda ajya kwiga hanze mu Burusiya aho yasoje amasomo mu 2020, akanahakura diplôme y’ikirenga.

Mu kiganiro yahaye IGIHE, Iradukunda yavuze ko yashimishijwe no kubona amanota meza mu rugendo rutari rworoshye.

Yagize ati “Mu barangije Architecture turi Abanyarwanda babiri. Nagize amahirwe yo kubona diplôme ya mbere gusa nubwo mugenzi wanjye atayabonye iya mbere ariko nishimira uburyo yabyitwayemo kuko ntibyari byoroshye.’’

Iradukunda yahawe Red diploma cyangwa se krasini diplome (красный диплом), izina yitwa mu Kirusiya, iri mu ibara ritukura ari nabyo biyiha agaciro gahambaye muri iki gihugu no hanze yacyo.

Uyihabwa aba yagize amanota yo hejuru mu masomo yose ku buryo nibura amanota make agomba kuba 86% gusa biba byiza atagiye munsi ya 95%.

Yakomeje agira ati “Iyo agiye munsi y’ayo manota, batanga diplôme isanzwe ariyo iba ifite ibara ry’ubururu cyangwa irindi ritari umutuku.’’

Nyuma yo gusoza amasomo ye, uyu musore arateganya kugaruka mu Rwanda ibintu nibisubira ku murongo ngo atange umusanzu we mu guteza imbere igihugu yubakiye ku bumenyi yakuye mu mahanga.

Ati “Yego nzagaruka mu Rwanda kuko niho iwacu rwose. Uburyo bwo kubyaza umusaruro ni bwinshi, icyo numva cy’ingenzi ni ugufatanya n’Abanyarwanda bose mu buryo duhindura igihugu cyacu cyiza kandi kurushaho kuruta uko kimeze uno munsi. Ibintu byose ni ugukorera hamwe no gufatanya ni nabyo byatumye ibihugu byinshi bikomeye bitera imbere.’’

Mu ntego afite harimo uko yarushaho kwimakaza ikorwa ry’ibishushanyo mbonera mu buryo bw’inyubako ariko mu buryo bugaragaza umuco w’igihugu.

Yakomeje ati “Akenshi ibyo bikorwa biba bigomba kuba nk’ibimenyetso by’umuco cyangwa nk’ibikorwa by’ubuhanzi, umuco n’amateka w’ahantu. Bituma umujyi ugira umwihariko tukabona Moscow ku buryo utayitiranya na Paris cyangwa New York.’’

Iradukunda nyuma yo kureba icyerekezo cy’u Rwanda arateganya ko nagera mu gihugu azakora igikorwa remezo cy’inyubako ishobora kwakira abantu 10000 ishobora kwerekanirwamo imikino iranga umuco.

Ati “Mu bihugu byateye imbere ho birakorwa ariko nanjye natekereje uko twakubaka nk’inzu igaragaza ahakinirwa amakinamico aho kuyumva gusa. Ni inzu ifite ibikorwa byose, birimo kugaragaza amateka y’umuco Nyarwanda, iri mu gihe kigezweho. Ni igikorwa cyagaragaza igihugu ku rwego mpuzamahanga.’’

Uyu mushinga kandi ateganya no kuwujyanisha no gutanga ubufasha mu kwita ku nzu ndangamurage zo mu Rwanda hibandwa cyane ku bikoresho bizubatse ku buryo umuco n’amateka yazo atacika niyo hashira imyaka 1000.

Iradukunda avuga ko yawutekereje awusanishije n’uruzitiro rw’umutuku rugize inyubako Perezida w’u Burusiya, Vladimir Putin akoreramo narwo rwavuguruwe mu myaka ya kera hakaba ari hamwe mu hantu hihariye kandi hafite amateka akomeye y’Abarusiya.

People’s Friendship University of Russia iri ku mwanya wa 18 muri kaminuza zikomeye mu Burusiya, ikaza ku mwanya wa 1829 ku Isi. Yareze n’abandi Banyarwanda batandukanye barimo Minisitiri w’Ibidukikije, Dr. Mujawamariya Jeanne d’Arc na Faustin Kagame usanzwe ari Umujyanama mu Biro by’Umukuru w’Igihugu mu bijyanye n’Itangazamakuru n’Itumanaho.

Iradukunda Patrick yabonye Impamyabumenyi y’Icyiciro cya Kabiri cya Kaminuza iri mu zubashywe mu Burusiya
Iradukunda Patrick amaze imyaka itandatu aba mu Burusiya aho yize ibijyanye na Architecture
Iradukunda arateganya kugaruka mu Rwanda gutanga umusanzu mu kubaka igihugu yifashishije ubumenyi yakuye mu Burusiya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .