00:00:00 IGIHE NETWORK KN KINYARWANDA EN ENGLISH FR FRANCAIS

Kwibuka27: Abanyarwanda baba mu Bushinwa bahawe umukoro ngo Jenoside itazongera

Yanditswe na IGIHE
Kuya 7 Mata 2021 saa 08:33
Yasuwe :
0 0

Abanyarwanda batuye mu Bushinwa n’abadipolomate bahagarariye imiryango mpuzamahanga itandukanye, bibutse ku nshuro ya 27 Jenoside yakorewe Abatutsi mu 1994, kuri uyu wa Gatatu tariki 7 Mata 2021.

Iki gikorwa cyabereye ku Cyicaro cya Ambasade y’u Rwanda i Beijing. Cyaranzwe no gucana urumuri rw’icyizere nk’ikimenyetso cy’uko Abanyarwanda bavuye mu mwijima w’icuraburindi bakajya mu mucyo utanga icyizere. Abacyitabiriye banafashe umunota wo kwibuka bazirikana inzirakarengane zahitanwe na Jenoside.

Abari bitabiriye uwo muhango barebye filime mbarankuru ivuga ku byo u Rwanda rwanyuzemo mu gihe cya Jenoside ndetse na filime mbarankuru kuri Jenoside yakorewe Abayahudi.

Umujyanama muri Ambasade y’u Rwanda mu Bushinwa, Virgile Rwanyagatare, yavuze ko kwibuka ari ugusubiza agaciro abakambuwe ndetse ko bifasha kubyutsa umutima w’igihugu watakaye ubwo Abanyarwanda bicaga bagenzi babo.

Ati “Kwibuka Jenoside ni kimwe mu bikorwa bikomeye byo kugarura roho y’igihugu cyacu. Ni kimwe mu byafashije u Rwanda guhangana n’abashakaga kurusubiza inyuma, ahubwo rutangira urugendo rushya rwo kwiyubaka mu mahoro n’umutekano, ubuyobozi bwiza ndetse no mu iterambere ry’ubukungu.”

Rwanyagatare yagarutse ku kuntu amahanga yatereranye u Rwanda mu gihe Abatutsi barimo bicwa, aho Umuryango w’Abibumbye wavanye mu Rwanda ingabo zawo zari zishinzwe kubungabunga amahoro, aho kuzisaba guhagarika ubwicanyi.

Yakomeje agira ati “Nubwo ariko byagenze gutyo, ubu amahanga arajwe inshinga no kurwanya Jenoside nubwo hakiri byinshi byo gukora birimo no kurwanya abahakana Jenoside yakorewe Abatutsi mu 1994 […] abayihakana ni abakoze Jenoside n’ababashyigikiye, abashakashatsi n’abanyamakuru bafite aho bahuriye bya hafi n’abakoze amahano mu Rwanda.”

Habintwari D’Artagnan warokotse jenoside yakorewe Abatutsi, yatanze ubuhamya bw’ibyo yabayemo, agaruka ku kuntu jenoside yamutwaye abo mu muryango we harimo na papa we ndetse n’abana batanu bavukanaga.

Yatanze inama agira ati “Ni iby’ingenzi nk’ikiremwamuntu muri rusange kumenya ko Isi dutuyemo uyu munsi ari iyacu, ariko ejo izaba itakiri iyacu gusa tukibuka ko izaba ari iy’abana bacu. Ndatekereza ko iki ari igihe cyo gutekereza ku murage dushaka guha abana bacu.”

Uhagarariye Umuryango w’Abibumbye mu Bushinwa, Siddharth Chatterjee, na we wari witabiriye uyu muhango yunamiye abishwe muri Jenoside yakorewe Abatutsi.

Ati “Mu izina rya Loni mu Bushinwa, nunamiye abagabo, abagore n’abana bishwe muri Jenoside yakorewe Abatutsi mu Rwanda ndetse nifatanyije n’abayirokotse babuze ababo.”

Abandi bayobozi bitabiriye uwo muhango harimo uhagarariye Minisiteri y’Ububanyi n’Amahanga ndetse n’uwari uhagarariye Umuryango w’Abibumbye.

Umujyanama muri Ambasade y’u Rwanda mu Bushinwa, Virgile Rwanyagatare, yavuze ko kwibuka ari ugusubiza agaciro abakambuwe
Bacanye urumuri rw'icyizere nk'ikimenyetso cy'icyizere kuri ejo hazaza h'u Rwanda
Guverinoma y'u Bushinwa yifatanyije n'u Rwanda kwibuka ku nshuro ya 27 Jenoside yakorewe Abatutsi
Siddharth Chatterjee uhagarariye Umuryango w'Abibumbye mu Bushinwa yari yitabiriye uwo muhango yunamira inzirakarengane zishwe muri Jenoside yakorewe Abatutsi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .