Liège: Abanyarwanda bashinze ishuri rifasha abana babo kwiga Ikinyarwanda n’umuco

Yanditswe na Karirima A. Ngarambe
Kuya 18 Gashyantare 2020 saa 08:16
Yasuwe :
0 0

Abanyarwanda batuye, bakorera n’abiga mu mahanga, bakomeje kwagura u Rwanda babicishije mu bikorwa bitandukanye. Abo mu mujyi wa Liège mu Bubiligi bashinze ishuri bise Umuco, ryitezweo gufasha abana babo kwiga neza Ikinyarwanda n’umuco nyarwanda.

Tariki ya 16 Gashyantare IGIHE yanyarukiye mu mujyi wa Liège ahari abanyarwanda batari bake bagize Diaspora nyarwanda, DRB-Rugari Liège, itembera mu ishiri ‘Umuco’.

Iryo shuri ryatangiye mu mpera z‘umwaka ushize wa 2019, bagamije kwishakamo ibisubizo no gufasha abana babo guhorana indangagaciro z’umuco nyarwanda.

Twagirimana uyobora DRB-Rugari-Liège yavuze ko igikorwa batangiye kizafasha abana b’abanyarwanda bari mu mahanga kunga ubumwe no gusigasira umuco nyarwanda.

Ati “Twagerageje kwishakamo uburyo ngo dushyireho iri shuri aho abana bacu bazajya bahurira bakiga Ikinyarwanda, umuco w‘aho bakomoka, rikababera kandi ihuriro ryo kumenyana, kunga ubumwe no gusabana mu gihe bari no kwiga ibijyanye n‘imbyino, indirimbo n‘imihamirizo kuko nabyo n‘igice cy‘amasomo biga.”

Twagirimana yavuze ko iyo abana bigishijwe ayo masomo barushaho gusobanukirwa amateka y’u Rwanda no kuvuga neza Ikinyarwanda.

Ati “Kugira ngo tubigereho habayeho ko ababyeyi babigiramo uruhare batanga umusanzu, ariwo uvamo ibikoresho by‘imfashanyigisho, ubwishingizi bw‘aho dukorera hagize habaye impanuka n‘ibindi. Iki gikorwa gihuza abana n‘ababyeyi babo, usanga bahahurira bagakina igisoro, bakaganira mbese n‘ihuriro n‘ishuri kuri twese.”

Uyu muyobozi avuga ko icyabagoye ari ukubona abarimu bafite ubumenyi bwifuzwaga kandi bagakorera ubushake, gusa ngo baje kubabona.

Muri iryo shuri harimo ibyiciro bitatu. Abana bafite kuva ku myaka itatu kugeza kuri itandatu biga ukwabo, abo kuva kuri irindwi kugeza ku myaka icumi bakajya ukwabo no kuva kva kuri cumi ukazamura.

Bahabwa amasomo kabiri cyangwa gatatu mu kwezi kuko biga icyumeru kimwe bagasimbuka ikindi bityo bityo.

Isaha ya mbere biga Ikinyarwanda, isaha ikurikiyeho bakiga kubyina bya kinyarwanda n‘ibijyanye n‘umuco n’amateka y‘u Rwanda.

Umwe mu babyeyi bagize ubuyobozi bwa DRB Rugari Liege, Sakumi Sylvie yagize ati “ Ikintu gishimishije cyane ni ukubona ukuntu abana babikunze bitabira batinuba. Iyo umwana wanjye akoze nk‘agakosa nkamubwira ko muhanisha kutaza mu ishuri Umuco, ubwo ntiyongera gukosa kuko kuri bo gusiba ibyo byiza babonye ntibishoboka.”

Yakomeje agira ati “Hari n‘abana bakubwira bati ko icyumweru kitagera ngo tujye mu Rwanda kuko kuri bo kuza kwiga mu ishuri Umuco ni ukuza mu Rwanda, ibi byose rero biratunezaza cyane bikaduha imbaraga zo gukomeza.”

Umwana witwa Timothée Kwizera ufite imyaka icumi yavuze ko kumenya Ikinyarwanda kuri we ari inyungu.

Ati “Ndanezerewe cyane kuko kwiga Ikinyarwanda ni ikintu nemereye bene wacu bari mu Rwanda, ko ngomba kukimenya ngo njye nganira nabo kandi iyo nje aha mpura n‘abandi banyarwanda tukamenyana.”

Ishuri Umuco gahunda yaryo ni ugutangira saa kumi kugeza saa kumi n’ebyiri z’umugoroba.

Twagirimana yifuza ko amashuri nk‘aya bishobotse buri duce twa DRB Rugari mu Bubiligi twabikora nk‘umuhigo kuko asanga bifasha ababyeyi n’abana.

Abana bateguriwe ibitabo byiza by'Ikinyarwanda
Abana bigishwa umuco nyarwanda, bagasakuza bagaca n'imigani
Bahabwa umwanya wo gusobanurirana ibyo bize
Abana bigishwa n'abarimu b'inzobere kandi babifitiye ubushake
Kwigishwa umuco n'Ikinyarwanda babifata nk'inyungu ikomeye kuri bo
Abarimu batandukanye bafasha abana b'abanyarwanda kwiga umuco n'ururimi rw'igihugu cyabo
Abana bafashwa gusobanukirwa neza ibyo bigishwa
Aya masomo ahabwa abana bose babishaka bafite ababyeyi bakomoka mu Rwanda
Aha abana bigishwaga kubuguza
Kubuguza ni umwe mu mikino ya kera y'abanyarwanda
Bahabwa umwanya wo kwitoza kubyina kinyarwanda
Higishwa abana b'ingeri zose
Bashakiwe ibitabo bigezweho by'Ikinyarwanda
Uyu ari kwifasha kubuguza nk'umwe mu mikino yo hambere y'abanyarwanda
Abarimu bakoresha uburyo butandukanye ngo abana bamenye neza ibyo bigishijwe
Abana bahabwa umwanya bakagaragaza ubuhanga hakurikijwe ibyo bamaze kwiga
Eric Twagirimana uyobora DRB-Rugari - Liege mu kiganiro na Karirima wa IGIHE
Eric Twagirimana uyobora DRB-Rugari - Liege

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .