U Buholandi: Itsinda ry’abanyarwanda mu rugendo shuri ku bikorwa by’ubuhinzi bugezweho

Yanditswe na Karirima A. Ngarambe
Kuya 11 Gashyantare 2020 saa 03:25
Yasuwe :
0 0

Guhera tariki ya 3 kugeza tariki ya 9 Gashyantare 2020, Itsinda rigizwe n’abantu 15 bavuye mu Rwanda, bagiriye urugendo shuri mu gihugu cy’u Buholandi rugamije guteza imbere ubuhinzi bw’u Rwanda.

Abagize iryo tsinda baturutse muri Minisiteri y’Ubuhinzi n’Ubworozi, Ikigo cy’Igihugu gishinzwe ubuhinzi n’ubworozi (RAB) no muri Minisiteri y’Uburezi.

Urugendo shuri rukaba rwari rugamije kureba no kugereranya uko gahunda z’u Rwanda zo gusangira amakuru, ubumenyi n’ubuhanga mu buhinzi zihagaze ugereranyije n’izo muri Leta y’u Buholandi mu buhinzi kugira ngo habeho ubufatanye bwo guhindura no kujyana n’imikorere igezweho mu bigo byigenga, ibya Leta, mu burezi hagendewe ku byo u Buholandi bwagezeho mu mu mikoranire y’inzego z’iterambere muri gahunda bwise ‘Triple Helix’.

Ubu buryo bw’imikorere (The Triple Helix Model of Innovation), ni uburyo bw’imikoranire bukoreshwa mu bashakashatsi muri za Kaminuza no mu bindi bigo bitandukanye, byaba ibya Leta y’u Buholandi cyangwa ibyigenga, mu rwego rwo guteza imbere ubukungu n’imibereho myiza y’abaturage.

Iri tsinda ryavuye mu Rwanda ryashoboye kandi kwibonera uburyo mbarutso u Buholandi bwashoboye guhindura imikorere n’imikoranire ku buryo izo serivisi zo gutanga ubumenyi n’amakuru mu buhinzi byavuye mu maboko ya leta bikajya mu maboko y’abikorera mu buryo bwa tekiniki burambye kandi bwihagije mu ngengo y’imari.

Ni uburyo mbarutso buboneye buzafasha kunoza gahunda ya Minagri yitwa ‘Twigire Muhinzi’, igamije kuzakoreshwa mu kwagura ibikorwa by’iterambere mu buhinzi bwitwa ‘Customized Agriculture Extension System (CAES)’ mu Cyongereza.

Mu buryo bwimbitse rero iyi gahunda yari igamije kurebera hamwe uburyo habaho ubufatanye hagati y’ibihugu byombi mu bihe biri imbere, kongera imbaraga mu buvugizi mu bijyanye na gahunda z’ubuhinzi no gukomeza kongera ibibura ngo habeho ubumenyi bwifuzwa ku banyeshuri bajya kwiga mu Buholandi ibijyanye n’ubuhinzi.

Abanyarwanda bagize iri tsinda bagize umwanya kandi wo gusura ahantu hatandukanye, ibiro bikuru bya Minisiteri y’ubuhinzi mu Buholandi, Kaminuza y’Ubuhinzi ya Wageningen n’iya Van Hall Larenstein, Ikigo cy’ubworozi cya Deventer, Ikigo mpuzamahanga cy’ibirayi (World Potato City) mu mujyi wa Emmeloord, aha hakaba hazwi ko hera ibirayi cyane.

Basuye kandi ishuri tekiniki ry’ubworozi (Dairy Campus) mu ntara ya Friesland izwi ku rwego mpuzamahanga mu kwigisha uburyo bugezweho bwo korora kijyambere hakoreshejwe ikoranabuhanga nka za mudasobwa.

Iyi gahunda yashobotse ku bufatanye bwa Minagri, Ambasade y’u Buholandi mu Rwanda, RDB, RAB, RVO, NUFFIC n’Ambasade y’u Rwanda mu Buholandi.

Itsinda ryavuye mu Rwanda kandi ryakiriwe na Ambasaderi w’u Rwanda mu Buholandi Jean Pierre Karabaranga n’abakozi ba Ambassade, banahura n’abanyeshuri b’Abanyarwanda biga mu Buholandi by’umwihariko abarimo bakurikira amasomo mu bijyanye n’Ubuhinzi.

Baganiriye uko ibyo urugendo shuri rwagenze n’uburyo bazajya babihererekanyaho amakuru buri muntu ku rwego rwe ngo bigirire u Rwanda akamaro.

Uru rugendo shuri rwitezweho ubufatanye mu guteza imbere ubuhinzi bw'u Rwanda
Amb. Karabaranga n'Itsinda rigizwe n‘abantu 15 bavuye mu Rwanda bagiye mu rugendo shuri mu gihugu cy‘u Buholandi

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .