U Bwongereza: Abanyarwanda bizihije Umunsi w’Intwari, banerekwa filimi The 600

Yanditswe na Uwase Joie Clarisse
Kuya 10 Gashyantare 2020 saa 03:39
Yasuwe :
0 0

Abanyarwanda batuye mu Bwongereza bifatanyije n’inshuti zabo mu birori byo kwizihiza Umunsi w’Intwari byanerekaniwemo filimi The 600 igaragaza uko Inkotanyi zarwanye urugamba rwo guhagarika Jenoside yakorewe Abatutsi mu 1994.

Ibi birori byizihirijwe mu ishuri rya Harrow riri mu bigo by’amateka mu Bwami bw’u Bwongereza ku wa Gatandatu w’icyumweru gishize. Iryo shuri ryatangiye 1572 ryizwemo n’abarimo Winston Churchill wabaye Minisitiri w’Intebe w’u Bwongereza (1940-1945), Hussein bin Talal wabaye Umwami wa Jordania hagati ya tariki ya 11 Kanama 1952 kugeza mu 1999 n’Umuyobozi w’Ikirenga (Emir) wa Qatar, Sheikh Taimim bin Hamad Al Thani.

Ni igikorwa cyitabiriwe n’abasaga 300 batuye mu Bwongereza harimo abanyeshuri, inshuti z’u Rwanda, abagize gahunda ya Commonwealth Future Programme n’abandi.

Ambasaderi w’u Rwanda mu Bwongereza, Karitanyi Yamina, yashimiye abaje kwifatanya n’Abanyarwanda muri uwo muhango.

Mu ijambo rye yikije ku kuvuga ibigwi ingabo zitangiye u Rwanda asaba abashyitsi kutayoborwa n’umuhate gusa ahubwo n’urukundo rw’igihugu n’abaturage barwo.

Kalemera Kalisa Jonathan umwe mu Banyarwanda bamaze igihe mu Bwongereza yatanze ikiganiro kigaragaza ishusho y’uburyo ubutwari bushobora kutaba urugamba rw’amasasu gusa. Yavuze ko ubutwari ari “gukorera abandi.’’

Yatanze urugero rw’umusore witwa Emmanuel Niringiyimana wamenyekanye kubera ko yakoresheje amaboko ye yubaka umuhanda uhuza Gashari na Murambi mu Karere ka Karongi mu Ntara y’Uburengerazuba.

Yagize ati “Yabikoreye abandi atari we ubwe.”

Yasabye kandi abitabiriye iki gikorwa kuba intwari aho bari hose no mu byo bakora byose abaha urugero rwo kwigira ku Nkotanyi zageze kuri byinshi nubwo zitari zifite ubushobozi.

Abitabiriye iki gikorwa beretswe filimi “The 600: Soldiers’ Story”. Iyi filimi igaragaza uburyo Batayo ya Gatatu y’Ingabo zahoze ari iza FPR-Inkotanyi yari mu nyubako y’Inteko Ishinga Amategeko yahoze yitwa CND, yarokoye Abatutsi benshi muri Jenoside yakorewe Abatutsi mu 1994 kandi ingabo zari ziyigize zararutwaga ubwinshi n’abasirikare ba Leta yateguye Jenoside.

Yanditswe inakorwa na Richard Hall ukomoka muri Leta Zunze Ubumwe za Amerika, muri Great Blue Productions. Uyu yatwaye igihembo cya Emmy Award, akaba atunganya ibiganiro bya za televiziyo i Los Angeles. Hall amaze imyaka 25 akora uyu mwuga wo gutunganya filime.

Gutunganya iyi filimi yabifashijwemo na A Wize Media y’i Kigali ya Annette Uwizeye ari nayo ihagarariye iyo filime.

Uyu mwaka insanganyamatsiko yagiraga iti ‘‘Ubutwari mu Banyarwanda, agaciro kacu.’’ukaba usanzwe wizihizwa tariki ya 1 Gashyantare.

Intwari z’u Rwanda ziri mu byiciro bitatu ari byo Imanzi igizwe n’Umusirikare utazwi na General Major Fred Gisa Rwigema; Imena zirimo Umwami Mutara wa III Rudahigwa, Rwagasana Michel, Agathe Uwiringiyimana, Niyitegeka Félicité n’Abanyeshuri b’Inyange. Icyiciro cya gatatu n’Ingenzi ariko nta ntwari n’imwe irashyirwamo.

Ambasaderi Yamini Kayitani yabwiye abitabiriye umuhango ko bagomba kuyoborwa n'urukundo rw'igihugu cyabo
Kalemera Kalisa Jonathan umaze igihe mu Bwongereza yatanze ikiganiro ku gisobanuro cy'ubutwari
Umunsi w'Intwari mu Bwongereza witabiriwe n'abantu batandukanye baturutse mu mfuruka zose z'icyo gihugu
Richard Hall ukomoka muri Leta Zunze Ubumwe za Amerika ari mu batunganyije filimi The 600
Abanyarwanda baba mu Bwongereza bizihije Umunsi w’Intwari, banerekwa filimi The 600 ivuga ku butwari bw'Inkotanyi
Abatanze ibiganiro bishimiye ubutumwa bw'ingenzi byari bibikubiyemo
Abanyamahanga basobanuriwe amateka y'u Rwanda
Abanyarwanda batuye mu Bwongereza bafata ifoto y'urwibutso nyuma yo kwizihiza Umunsi w'Intwari
Abanyarwanda batuye mu Bwongereza bishimiye ko umunsi wagenze neza
Urubyiruko rwitabiriye iki gikorwa ari rwinshi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza