00:00:00 IGIHE NETWORK KN KINYARWANDA EN ENGLISH FR FRANCAIS

Umufaransa wa mbere ushinjwa gupfobya no guhakana Jenoside yakorewe Abatutsi yahamagawe mu rukiko

Yanditswe na Karirima A. Ngarambe
Kuya 26 Gashyantare 2021 saa 11:26
Yasuwe :
0 0

Natacha Polony yabaye Umufaransa wa mbere wahamagajwe n’urukiko kubera icyaha akurikiranyweho cyo gupfobya no guhakana Jenoside yakorewe Abatutsi mu 1994.

Kuri uyu wa Gatanu, tariki ya 26 Gashyantare 2021, ni bwo Urukiko Nshinjabyaha rwa Paris rwahamagaye bwa mbere Umunyamakuru Natacha Polony ukurikiranyweho ibyaha byo guhakana no gupfobya Jenoside yakorewe Abatutsi.

Uyu mugore uyobora ikinyamakuru Marianne yarezwe nyuma y’amagambo yavugiye kuri Radio France Inter ku wa 18 Werurwe 2018.

Icyo gihe yagize ati ‘‘Au Rwanda en 1994, il n’y avait pas d’un côté, les gentils et de l’autre les méchants...c’était des salauds contre d’autres salauds’’ ; ibi mu kinyarwanda bisobanuye ko “Mu Rwanda mu 1994 ubwo hakorwaga Jenoside, bose bari kimwe, bari bamwe, mu mpande zombi nta wari umuntu mwiza undi ngo abe mubi, bose bari amasarigoma arwana akicana.”

Aya magambo yahagurukije abaharanira inyungu z’abacitse ku icumu rya Jenoside, barega umunyamakuru mu rukiko.

Iburana ry’uyu munsi ryihariwe no gusuzuma no kurangiza inzitizi ziri mu rubanza mbere yo kugena umunsi iburana rizakomeza mu mizi (audience de fixation).

Me Gisagara Richard uhagarariye Umuryango w’Abanyarwanda baba mu Bufaransa, CRF, muri urwo rubanza yasobanuye icyashingiweho hatangwa ikirego.

Yagize ati “Ibyemezo byafashwe nyuma yaho amashyirahamwe atandukanye arimo Ibuka-France, CRF, umuryango uhuza Abanyarwanda batuye mu Bufaransa n’abandi, basanze ibyo Natacha Polony yavuze kuri radio atari ibyo kwihorera, bandikiye ubuyobozi bwa Radio hamaganwa ayo magambo cyane ko byabayeho mu gihe cyo kwitegura kwibuka Jenoside yakorewe Abatutsi.’’

Yavuze ko ari ibintu byiza ko ubutabera butangiriye ku muntu nka Natacha Polony kuko ni umunyamakuru uzwi cyane mu Bufaransa.

Yakomeje ati “Ni we itegeko rihereyeho mu kuburanisha, urubanza rukazakomeza tariki ya 26 Gicurasi 2021, kuko inzitizi zose zakuweho biremezwa nibyo kwishimira nkuko nabivuze hejuru bikaba ari ubwa mbere iri tegeko rihana uguhakana no gupfobya rikoreshwa kuva ryashyirwaho muri 2017.’’

Ni itegeko ryashyizweho nyuma y’igihe CRF yamaze iburana na Leta y’u Bufaransa itanga ubusabe bw’uko guhakana Jenoside yakorewe Abatutsi byaba icyaha, bica mu nkiko zitandukanye, urw’ubujurire, urusesa imanza, urukiko rushinzwe kurinda iremezo ry’Itegeko Nshinga.

Me Gisagara yavuze ko u Bufaransa ntibwashakaga ko gupfobya Jenoside yakorewe Abatutsi byafatwa nk’icyaha.

Yakomeje ati “Twaje gutsinda ubwo urukiko rukuru rushinzwe kurinda iremezo ry’Itegeko Nshinga rutegeka Leta y’u Bufaransa gushyiraho iryo tegeko ariryo rigiye gukurikizwa mu rubanza rw’Umunyamakuru Natacha Polony.

Uru rubanza rwabaye nyuma yaho guhera muri Mutarama 2017 u Bufaransa bwemeje itegeko rihana umuntu uhamijwe icyaha cyo guhakana no gupfobya Jenoside yakorewe Abatutsi.

Ikiganiro IGIHE yagiranye na Me Gisagara

Umunyamakuru Natacha Polony yabaye Umufaransa wa mbere wahamagajwe n’urukiko kubera icyaha akurikiranyweho cyo gupfobya no guhakana Jenoside yakorewe Abatutsi mu 1994
Me Gisagara Richard ni we uhagarariye Umuryango w'Abanyarwanda baba mu Bufaransa, CRF, muri uru rubanza

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .