00:00:00 IGIHE NETWORK KN KINYARWANDA EN ENGLISH FR FRANCAIS

USA: Abanyarwanda batuye muri San Antonio bateguye ubusabane bugamije kumenyekanisha u Rwanda

Yanditswe na IGIHE
Kuya 18 January 2022 saa 10:26
Yasuwe :

Umuryango w’abanyarwanda baba muri Leta Zunze Ubumwe za Amerika mu mujyi wa San Antonio muri Leta ya Texas, bagiye guhurira mu busabane buzabahuza bakarushaho gukangurira abatazi u Rwanda kurusura ndetse no kurushoramo imari.

Ni igikorwa bateguye bafatanyije n’umuryango ushingiye ku mahame ya Martin Luther King witwa DreamVoice, ukaba ari umuryango uhuza indi miryango itandukanye ituye mu mujyi wa San Antonio .

Uzaba umwanya wo kwereka abandi ibikorwa byabo birimo gusangiza abandi iterambere ry’igihugu cyabo mu rwego rw’uko n’abandi bakwifuza kuza muri icyo gihugu mu bukerarugendo cyangwa se gushoramo imari.

Uyu muryango wa DreamVoice ugira kandi igikorwa wita Dream Week kiba mu kwezi kwa mbere ari nako kwezi kwibukwamo Dr. Martin Luther King waharaniye ubwigenge bw’abirabira muri Amerika.

Umuyobozi w’Umuryango w’Abanyarwanda baba muri Leta ya Texas mu mujyi wa San Antonio, Moses Rudasunikwa yabwiye One Nation Radio ko intego y’iki gikorwa ari ukurushaho kumenyekanisha u Rwanda ku bataruzi.

Yagize ati “ Umuryango w’abanyarwanda baba muri San Antonio twamaze kuba abafatanyabikorwa ba DreamVoice dore ko buri uko bazajya bategura Dream Week natwe tuzajya tugira umwanya w’iki gikorwa. Intego yacu muri iki gikorwa ni ugukangurira abanyamahanga gusura igihugu cyacu tubereka uburanga n’ubwiza bwacyo ndetse no gukangurira abashoramari gushora imari mu gihugu cyacu.”

“Dufite intego ko abatuye uyu mujyi wa San Antonio ; mu nkengero zawo by’umwihariko muri Leta ya Texas abatazi igihugu cyacu bose bamenya u Rwanda bakarusura, bakanushoramo imari.”

Ni igikorwa kizamara iminsi ibiri kandi cyizitabirwa n’abanyarwanda ndetse n’abanyamahanga batandukanye.

Kuwa Gatanu tariki 21 Mutarama 2022 guhera saa kumi n’ebyiri kugera saa mbiri n’igice z’ijoro ku isaha ya San Antonio hateganijwe ikiganiro kizaba gifite insanganyamatsiko igira iti ” u Rwanda rwo mu bihe byashize n’u Rwanda rw’ubu; intambwe rumaze gutera mu ivuka ryarwo no mu mikurire yarwo”.

Ni ikiganiro kizitabirwa na Ambasaderi w’u Rwanda muri Leta Zunze Ubumwe za Amerika, Mathilde Mukantabana ndetse n’abandi batumirwa bafite ubunararibonye ku Rwanda barimo Abanyamahanga ndetse n’abanyarwanda.

Kuwa Gatandatu tariki 22 Mutarama 2022; hateganyijwe igitaramo kizaba guhera saa kumi n’ebyiri kugeza saa sita z’ijoro ku isaha ya San Antonio kizaba kiganjemo kwerekana umuco ndetse n’umurage w’u Rwanda ku barukomokamo ndetse n’iterambere ry’ubukungu u Rwanda rumaze kugeraho.

Moses Rudasunikwa yasabye abanyarwanda batuye muri uyu mujyi bazabishobora kuzitabira iki gikorwa ari benshi kuko kirimo amahirwe yo kwerekana umuco w’igihugu cyabo bakabwira abanyamerika n’izindi nshuti z’u Rwanda abo ari bo.

Ba Rwiyemezamirimo kandi nabo barakangurirwa kuza kumurika ibikorwa byabo ku batabizi kuko nabo kuri bo ari andi mahirwe.

Ku batazashobora kwitabira iki gikorwa bashobora kuzagikurikira mu buryo bw’ikoranabuhanga kuri Radio ya Diaspora One Nation Radio no kuri shene yayo ya Youtube.

Umuyobozi w’Umuryango w’Abanyarwanda baba muri Leta ya Texas mu mujyi wa San Antonio, Moses Rudasunikwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .