Abanyamideri bagiye kwifashishwa mu kwereka umuco nyarwanda abitabiriye inama ya AU

Yanditswe na Ferdinand Maniraguha
Kuya 12 Nyakanga 2016 saa 09:31
Yasuwe :
0 0

Kuva tariki ya 10 kugeza kuir 18 Nyakanga, ibihugu byose bigize Umuryango wa Afurika yunze Ubumwe biteraniye i Kigali mu nama ya 27 y’uwo muryango. Ni inama izagirira akamaro Abanyarwanda baba abacuruzi, abanyamahoteli n’abandi bafite ibyo bakwereka abo banyamahanga.

Kuri PSF (Urugaga rw’abikorera mu Rwanda) kwakira inama ni ibuye rimwe ryatewe ariko ishaka ko ryica inyoni ebyiri.

Uretse kuba ari amahirwe ku bukungu bw’u Rwanda kwakira inama nk’iyo, PSF itangaza ko ari n’umwanya mwiza wo kwereka amahanga ibyiza by’umuco nyarwanda cyane cyane herekanwa ibihakorerwa.

Niyo mpamvu yateguye igitaramo cyo kumurika imideri, herekanwa Umuco nyarwanda, ndeste no kuratira ibikorerwa mu Rwanda abantu basaga 3500 bitabiriye iyo nama.

Yosam Kiiza, Umuyobozi ushinzwe Umutungo muri PSF yatangarije IGIHE ko bazifashisha abamurika imideri by’umwuga kugirango bereke amahanga ibikorerwa mu Rwanda, banabamurikira Umuco Nyarwanda hagamijwe guteza imbere inganda nyarwanda ndetse n’izo muri Afurika muri rusange.

Kiiza yakomeje avuga ko muri iki gihe cy’inama, PSF ifite inshingano eshatu nk’umufatanyabikorwa wa Leta, aho imwe muri zo ari iyo kwerekana ibikorwa n’inganda z’imyenda, ibyo bikazakorwa hifashishijwe igitaramo cyiswe “Fashion Dusk”, cyo kumurika imideri.

Yagize ati “Dufite abamurika imideri by’umwuga haba mu Rwanda, muri Afurika ndetse n’ahandi, kandi dufite inganda zikora imyenda ndetse n’abahanga mu by’imyambarire (Fashion). Bazamurika imideri hagamijwe gushishikariza Abanyarwanda n’Abanyafurika kuyoboka ibikorerwa imbere mu gihugu ndetse no kuri uyu mugabane.”

Iki gitaramo kizaba mu gihe u Rwanda n’ibihugu bya Afurika y’Iburasirazuba biri mu nkubiri yo kwigaranzura guhora bisohora amafaranga menshi hanze hajya kugurwa imyenda n’ibindi bikoresho byakoreshejwe mu mahanga, kandi no muri ibyo bihugu imbere hari ubushobozi bwo kubyikorera kandi bikaza ari umwimerere, aho kujya kugura hanze ahubwo nabyo bikagurishayo.

Icyo gitaramo cyo kumurika imideli giteganyijwe kuwa Kane tariki ya 14 Nyakanga 2016, kizabera muri Hotel Umubano guhera saa kumi n’ebyiri.

Uretse kumurika imideri, PSF inamurika ibikorerwa mu Rwanda ndetse no muri Afurika, aho abari mu nama iyo basohotse babasha gusura bakihera ijisho ibikorwa bitandukanye bimurikirwa kuri Kigali Convention Center.

Indi nshingano y’Urugaga rw’abikorera mu gihe cy’inama y’Umuryango wa Afurika Yunze Ubumwe ni ukuyobora abanyamahanga n’abandi bose bayitabiriye, aho hanakozwe agatabo kiswe ‘Experience Kigali’, kerekana imiterere y’imihanda mu Mujyi wa Kigali, amahoteli, utubari inzu zo kwidagaduriramo ninjoro (Night Clubs), inzu zo gufatiramo amafunguro n’ibindi bitatse Umurwa mukuru w’u Rwanda.

Imyenda ikorwa n'Abanyafurika niyo izibandwaho muri Fashion Dusk
Byagaragaye ko n'Abanyafurika bakora imyenda myiza kandi ijyanye n'umuco waho
Imyenda ikoze mu bitenge ikoreshwa henshi muri Afurika no mu Rwanda irakunzwe cyane
Umunyarwandakazi agaragara neza mu myenda nyafurika

Amafoto:Luqman Mahoro


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza