Kigali International Fashion Week igiye kubera mu bihugu bitatu i Burayi

Yanditswe na Dusabimana Aimable
Kuya 9 Ukwakira 2017 saa 09:15
Yasuwe :
1 0

Ibirori ngarukamwaka bya Kigali Fashion Week byagejejwe ku yindi ntera n’ababitegura mu bufatanye n’ikigo cya BerexInvest Corporation, bigiye gutangira kubera i Burayi nyuma y’imyaka irindwi bitangijwe mu Rwanda.

Ibi birori byaherukaga kubera i Kigali muri Gicurasi uyu mwaka, aho byamaze iminsi itatu biba, hakerekanwa imodoka, imyambaro isanzwe n’itamenyerewe ndetse n’ibindi bikorwa bitandukanye bigaragaza umwihariko n’intera ibijyanye no kumurika imideli bimaze kugeraho mu Rwanda.

Mu kiganiro n’itangazamakuru, Umuyobozi wa Kigali Fashion Week, John Bunyeshuri, yatangaje ko umwaka wa 2018 uzasiga isura nshya n’iterambere ridasanzwe ku bakora n’abamurika imideli b’Abanyarwanda biturutse ku mushinga udasanzwe bafite wo gutangira kubafasha kumenyekanisha ibikorwa mu mahanga.

Yagize ati "Nk’uko twambara Gucci, Nike n’indi myenda tukumva turabyishimiye cyane, kuki abanyamahanga nabo batakwambara amashati n’imyenda byanditseho ’Made in Rwanda?’" Yongeyeho ati "Ibirori bya Kigali Fashion Week tugiye kubigeza ahashimishije kurushaho, turifuza ko n’Abanyarwanda bakora imideli bamenyekana ku Isi n’ibyo bakora bikarenga imbibi."

Yavuze ko byibuze abakora imideli bagera ku icumi mu Rwanda bazahabwa amahirwe yo kumurika ibikorwa byabo mu birori bya Kigali International Fashion Week bizabera mu bihugu bitatu i Burayi ndetse n’abamurika imideli bagera kuri 16 akaba ari bo bamaze kwemererwa guhabwa amahirwe yo kugaragaza impano zabo.

Ku ikubitiro, ibirori bya Kigali International Fashion Week bizabera i Berlin mu Budage kuva ku itariki 12 kugeza kuri 14 Mutarama 2017, bizerekeza i Amsterdam mu Buholandi kuva ku wa 26 kugeza ku wa 28 Mutarama, hanyuma mu i Bruxelles mu Bubiligi habere ibisoza urugendo muri uwo mwaka i Burayi kuva ku itariki 19 kugeza kuri 25 Werurwe 2017.

Dieudonne Ntasinzira, Umuyobozi wa BerexInvest Corporation ikorera mu Bubiligi, yasinye amasezerano y’ubufatanyabikorwa na Kigali International Fashion Week, yavuze ko amarembo afunguye ku banyarwanda bifuza kugira ibyo bamenyekanisha yizeza umusanzu ukomeye mu guteza imbere abakora ibijyanye n’imideli mu Rwanda.

Abateguye Kigali International Fashion Week batangaje ko iki gikorwa batangije cyo kugeza hanze y’u Rwanda ibi birori, nibigenda neza i Burayi, hazarebwa uko byagezwa no ku yindi migabane nka Amerika, Aziya n’ahandi hatandukanye ku Isi.

Umuyobozi wa Kigali International Fashion Week, John Bunyeshuri
Abateguye Kigali International Fashion Week n'abafatanyabikorwa babo mu kiganiro n'abanyamakuru
Umuyobozi ushinzwe ibikorwa muri Kigali Fashion Week, Mutimura Tarzan
Umuyobozi wa BerexInvest Corporation ikorera mu Bubiligi, yasinye amasezerano y'ubufatanyabikorwa na Kigali International Fashion Week, Dieudonne Ntasinzira
Umunyamabanga muri Kigali Fashion Week, Uwimana Claudine

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza