Bimwe mu bikoresho bya pulasitiki bikoreshwa rimwe byakumiriwe mu Rwanda

Yanditswe na Habimana James
Kuya 12 Gashyantare 2020 saa 01:36
Yasuwe :
0 0

Minisitiri w’Ibidukikije, Dr Jeanne d’Arc Mujawamariya, yavuze ko guhera uyu munsi bimwe mu bikoresho bya pulasitiki birimo amasahane, imiheha n’izindi pulasitiki zikoreshwa inshuro imwe nk’ibipfunyikwamo ibiribwa cyangwa ibindi bintu, bibujijwe kongera gukoreshwa mu Rwanda.

Ibi bikoresho birimo imiheha ya pulasitiki, ibikoresho byifashishwa mu kuvanga, amakanya, ibiyiko, ibikombe n’amasahani bikoreshwa inshuro imwe, ibipurizo n’ububiko cyangwa ibitwarwamo impapuro bikoze muri pulasitiki.

Izi ngamba zatangarijwe mu kiganiro n’itangazamakuru, iyi Minisiteri y’ibidukikije ifatanyije n’Ikigo cy’Igihugu gishinzwe kurengera ibidukikije (REMA) byagiranye n’abanyamakuru.

Hasobanurwaga ku gutangiza ubukangurambaga ku icibwa ry’ibikoresho bya pulasitike bikoreshwa inshuro imwe bikajugunywa.

Imibare igaragaza ko uyu munsi hakorwa toni hafi miliyoni 300 za pulasitiki buri mwaka, hakiyongeraho miliyari eshanu z’amasashi ya pulasitiki n’amacupa abarirwa muri za miliyari.

Kimwe cya kabiri cya pulasitiki zikoreshwa rimwe zirajugunywa zigahinduka umwanda.

Bivugwa ko bikomeje uku, pulasitiki zikorwa zizikuba inshuro eshatu mu 2050.

Kuva mu 2008, u Rwanda rwabaye igihugu cyaciye ikoreshwa ry’amasashi hirya no hino mu gihugu.

Naho kuva mu 2019, rushyiraho itegeko N°17/2019 ryo ku wa 10/08/2019, ryerekeye kubuza ikorwa, itumizwa mu mahanga, ikoreshwa n’icuruzwa ry’amasashi n’ibikoresho bikozwe muri pulasitiki bikoreshwa inshuro imwe.

Iri tegeko ryavuguruye iryari risanzwe kugira ngo rigene ibyerekeye izi pulasitiki zindi zitari zararebwe n’itegeko rya 2008 kuko byagaragaye ko na zo zitera ihumana ry’ibidukikije.

Ibi byatumye zimwe muri pulasitiki zibuzwa n’iri tegeko kongera gukoreshwa mu Rwanda.

Minisiteri y’ibidukikije yabwiye abanyamakuru ko iri tegeko ribuza itumizwa mu mahanga, ikorwa, icuruzwa n’ikoreshwa ry’amasashi yose n’izindi pulasitiki zikoreshwa inshuro imwe nk’ibipfunyikwamo ibiribwa cyangwa ibindi bintu.

Ibi birimo imiheha ya pulasitiki, ibikoresho byifashishwa mu kuvanga, amakanya, ibiyiko, ibikombe n’amasahani bikoreshwa inshuro imwe, ibipurizo n’ububiko cyangwa ibitwarwamo impapuro bikoze muri pulasitiki.

Ivuga ko zimwe mu ngaruka ziterwa n’ikoresha rya Pulasitiki zikorerwa gukoreshwa inshuro imwe, harimo gutera umwanda ku nkengero z’imihanda no mu mazi, gufunga inzira z’amazi, kugabanya ubushobozi by’amazi bwo kwinjira mu butaka, bityo bigatuma habaho imyuzure.

Inyinshi muri pulasitiki zikoreshwa inshuro imwe zikorwa mu mavuta ya peteroli zikaba zitabora burundu, ahubwo zikagaragara mu bidukikije nk’uduce duto duto tugira uruhare mu gutera umwanda, kwanduza ibiribwa n’ibindi.

Ubushakashatsi bwakozwe mu 2017, bwemeje ko impfu nyinshi z’inyamaswa zo mu mazi n’inyoni ziterwa no kurya pulasitiki. Uduce twa pulasitiki zitashangutse twasanzwe muri izi nyamaswa.

Minisitiri Dr Mujawamariya yagize ati “Guhera uyu munsi bimwe mu bikoresho bya pulasitiki birimo amasahane, imiheha n’izindi pulasitike zikoreshwa inshuro imwe nk’ibipfunyikwamo ibiribwa cyangwa ibindi bintu, bibujijwe kongera gukoreshwa mu Rwanda.”

“Nta muntu tubujije kugura ibintu bipfunyitse muri pulasitiki, ishati zipfunyitse, amazi ari mu icupa n’ibindi, kubera ko izo nganda ntizirabona izisimbura ibi bikoresho kugeza igihe zizaba zabisimbuye, icyo tubujije ni ugupfunyika umugati muri pulasitiki, imbuto muri pulasitiki, inyama muri pulasitiki, isombe n’ibindi kuko ibyo bifite ibisimbura izo pulasitiki.”

Minisiteri y’Ibidukikije ivuga ko pulasitiki zikoreshwa n’inganda mu gupfunyika zisonewe gupfunyikishwa gusa ibicuruzwa bikorerwa mu ruganda rwabiherewe uruhushya, ariko zigomba gushyirwaho ikimenyetso kigaragara n’uruganda ruzipfunyikisha ibicuruzwa byarwo.

Ivuga ko ikorwa, itumizwa mu mahanga, ikoreshwa cyangwa icuruzwa ry’ibikoresho bikozwe muri pulasitiki ibora mu miterere isanzwe, bikorwa iyo byabanje gusabirwa uruhushya ku rwego rubifitiye ububasha (REMA), ariko hagaragajwe ko hari impamvu zihariye. Uruhushya rusabwa mu nyadiko.

Bimwe mu bihano biteganyijwe

Minisiteri y’Ibidukikije ivuga ko bimwe mu bihano bihabwa umuntu wese ukora amasashi n’ibikoresho bikozwe muri pulasitiki bikoreshwa inshuro imwe, ahanishwa gufungirwa ibikorwa, kwamburwa ayo masashi n’ibyo bikoresho no kwishyura ihazabu yo mu rwego rw’ubutegetsi ingana na miliyoni 10 mu mafaranga y’u Rwanda.

Harimo kandi kwishyura ihazabu yo mu rwego rw’ubutegetsi ingana inshuro 10 z’agaciro k’ayo masashi n’ibyo bikoresho bikozwe muri pulasitiki bikoreshwa rimwe n’ibindi bihano.

Umuyobozi Mukuru wa REMA, Eng Colette Ruhamya, yagize ati “Ibi bikoresho abantu bakwiye kujya babyitondera cyane kubishyiramo ibintu bishyushye, yego nta kintu kitagira ingaruka ku bidukikije ariko ushaka uko wagabanya za ngaruka.”

Avuga ko mbere haciwe amasashi ariko ubu hatewe intambwe mu kureba n’ibindi bikoresho bikoreshwa inshuro imwe byacibwa.

Dr Mujawamariya (iburyo) yavuze ko ikoreshwa rya bimwe mu bikoresho bya pulasitiki ribujijwe
Dr Mujawamariya yasabye abantu gucika ku bikoresho bya pulasitiki birimo n'imiheha
Abanyamakuru bahawe umwanya wo kubaza ibibazo kuri iki cyemezo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .