Ingano y’umwuka wa CO2 Umunyarwanda yohereza mu kirere

Yanditswe na IGIHE
Kuya 5 Mutarama 2020 saa 02:45
Yasuwe :
0 0

Ubushakashatsi bwagaragaje ko nibura umwuka wangiza ikirere, dioxyde de carbone (CO2), Umwongereza azagira uruhare mu kohereza mu kirere mu byumweru bibiri bya mbere bya 2020, uzaba ungana n’uwo umuturage wo mu bihugu birindwi bya Afurika birimo n’u Rwanda azagira uruhare mu kohereza mu gihe cy’umwaka wose.

Ubushakashatsi bwakozwe na Oxfam bwatangajwe kuri iki Cyumweru, bwagaragaje umuntu umwe mu Bwongereza bizamufata iminsi itanu kugira ngo agire uruhare mu bikorwa bituma haboneka CO2 mu gihe iyo ngano y’uyu mwuka ku muntu uri mu Rwanda bizamufata umwaka.

Ku Cyumweru gitaha tariki ya 12 Mutarama, nibura Umwongereza azaba amaze kohereza mu kirere umwuka wa CO2 ungana n’uzoherezwa umwaka wose n’umuturage wo mu bihugu birimo Madagascar, Malawi, Ethiopia, Uganda, Guinea na Burkina Faso.

Ubu bushakashatsi bwagaragaje ingano y’uyu mwuka woherezwa mu kirere ku batuye mu Rwanda ari toni 0.09, Malawi ni 0.19, Burkina Faso zigeze kuri toni 0.25 ku mwaka.

Bwagaragaje ko umuturage wo muri Nigeria agira uruhare mu bikorwa byohereza mu kirere uyu mwuka uhumanya ungana na toni 0.49 buri mwaka naho uwo mu Buhinde akaba ari 1.68.

Ikigereranyo rusange ku Isi kiri kuri toni 4.7 ku muntu buri mwaka. Mu Bwongereza honyine, umuturage abarirwa toni 8.3.

Abongereza benshi bavuze ko hakwiye kugira byinshi bikorwa mu kurwanya ikibazo cy’imihindagurikire y’ikirere cyane mu kugabanya umwuka uhumanya woherezwa mu kirere.

Ubwiyongere mu kirere bw’uyu mwuka wa CO2 bugira ingaruka ku bidukikije zirimo ubushyuhe bukabije ku Isi, imyuzure n’ibindi.

Mu myaka 100 ishize, ibikorwa bya muntu byongereye ubushyuhe ku Isi ho dogere celcius 2.5. Uko kwiyongera k’ubushyuhe ku Isi kwagiye gutera ibibazo bitandukanye birimo ihindagurika ry’ibihe, imyuzure ya hato na hato, kuzimira kw’inyamaswa n’ibimera bitandukanye n’ibindi.

Mu myaka myinshi ishize, ibikorwa bya muntu byakomeje kugira uruhare mu iyangirika ry’urusobe rw’ibinyabuzima ndetse n’ihindagurika ry’imiterere y’Isi.

Ahari ubutayu bwa Sahara hahoze ibyatsi, amazi ndetse n’amashyamba nkuko byatangajwe n’Umushakashatsi Dr Curt Stager wo muri Kaminuza ya Smith College, nyamara byaje guhindurwa n’imyuzure, agace gasigara kambaye ubusa.

Kubera ubushyuhe, ibikorwa bya muntu n’ibindi, amoko 1000 y’inyamswa yarimutse ajya gushaka ahandi aba, andi menshi yo yarazimiye.

Mu myaka 15 iri imbere, isunzu ry’umusozi wa Kilimanjaro rizwiho urubura rizaba ryambaye ubusa. Ubushakashatsi bwagaragaje ko ubushyuhe bw’Isi buri gutuma urubura kuri uwo musozi rushonga bidasanzwe.

Uyu mwuka wa CO2 ugira ingaruka nyinshi ku buzima bwa muntu. Zirimo kurwara umutwe, kugira umunaniro, kubura ibitotsi, kugira ibibazo by’ubuhumekero kimwe no gututubikana ndetse wongera uburyo umutima utera umuntu akaba yarwara indwara y’umuvuduko ukabije w’amaraso cyangwa se akaba yajya muri Coma mu buryo butunguranye kubera kubura umwuka mwiza.

Ubushakashatsi buherutse kugaragaza ko ingaruka z’imihindagurikire y’ibihe ku bukungu bw’u Rwanda zishobora kugera ku kigero cya 4.5% by’umusaruro mbumbe w’igihugu mu mwaka wa 2030.

Ubu bushakashatsi bwakozwe n’itsinda ry’ibihugu 19 bihuriye ku kuba bisangiye ingaruka bigirwaho n’imihindagurikire y’ikirere (V20), bwerekanye ko ingaruka z’imihindagurikire y’ibihe ku buzima bw’abanyarwanda zishobora kurushaho gukomera harimo ukwiyongera kwa Malaria ndetse n’ibyorezo bituruka ku bukonje ndetse n’ubushyuhe bw’ikirere.

Ubushakashatsi bw’Ikigo cy’Igihugu cyo kubungabunga Ibidukikije (REMA) bwo muri Gicurasi 2018, ku bitera ihumana ry’umwuka n’iyangirika ry’ikirere, bwagaragaje ko ibintu biza ku isonga mu guhumanya umwuka uhumekwa mu Rwanda harimo umwotsi w’imodoka, imyotsi y’amakara n’inkwi n’ibindi.

Bwanerekanye ko uduce duto duto tutabonwa n’amaso twivanga n’umwuka uhumekwa, tubangamiye bikomeye ubuzima bw’abaturarwanda bishobora gutera indwara z’ubuhumekero n’umutima.

Bwanagaragaje ko mu bice bituwe hari ubwo naho ikigero cy’utwo tuvungukira kirenga urugero rwemewe, ahanini kubera imyuka ikomoka ku gukoresha ibicanwa bikomoka ku biti no gutwika ibyatsi, ibiyorero n’amashyamba.

Hari ibice bimwe na bimwe byagaragayemo ko mu mpeshyi muri metero kibe imwe y’umwuka usangamo hagati ya mikorogarama (microgram) 100 na 150 z’utwo tuvungukira mu gihe ikigero cyemewe kitagomba kurenga mikorogarama 35 kuri meterokibe y’umwuka.

Mu guhangana n’ingaruka ziterwa n’ihindagurika ry’ibihe n’iyangirika ry’ikirere, u Rwanda rwashyizeho ingamba nyinshi zitandukanye zirimo gutera ibiti byinshi bitanga umwuka mwiza aho kuri ubu ari ku buso bungana na 30% bw’igihugu.

Harimo kandi gukumira imodoka zisohora imyuka ihumanya ihumanya binyuze mu isuzuma zikorerwa no kwimakaza ikoreshwa ry’ingufu zidahumanya. Ibi bijyanye n’uko ubu ku isoko ry’u Rwanda hagejejwe imodoka na moto zikoresha amashanyarazi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .