U Rwanda rugeze he rukumira imyuka yangiza ikirere n’ibikoresho bikonjesha ikoreshwamo?

Yanditswe na Evariste Nsengimana
Kuya 17 Werurwe 2020 saa 09:08
Yasuwe :
0 0

Mu 2016 nibwo u Rwanda rwashyize umukono ku masezerano avuguruye ya Montréal yerekeye gukumira ibintu byangiza akayunguruzo k’imirasire y’izuba, atangira kubahirizwa mu 2017.

Aya masezerano agamije ko ibinyabutabire bya Hydrofluorocarbons (HFCs), akenshi bituruka mu byuma bikonjesha nka za frigo, ibitanga ubuhehere bizwi nka ‘Air Conditioner’ n’ibindi byacika burundu ku Isi, guhagarika ikora n’ikoreshwa ry’iyi myuka bikaba bishobora kugabanya dogere 0.5 ku gipimo mpuzandengo cy’izamuka ry’ubushyuhe bw’Isi mu myaka 100.

Umuyobozi Mukuru w’Ikigo cy’Igihugu gishinzwe Ubuziranenge (RSB), Murenzi Raymond, aheruka kubwira IGIHE ko ikigo ayobora gifatanya n’igishinzwe kubungabunga ibidukikije (REMA) mu gukumira ko iyo myuka ikomeza kwinjira mu gihugu.

Ati “Ubu rero iyo myuka iza muri ibyo byuma bikonjesha cyangwa se iza mu kubisana ntikinjira mu Rwanda kuko itemewe. Byumvikane ko ubu turimo kuyirwanya ndetse n’aho iri turimo kugenda dusobanurira abayifite ingaruka zayo kugira ngo aho ikoreshwa izagere igihe twihaye yarashize burundu.”

Umuyobozi ushinzwe amabwiriza n’ubuziranenge muri REMA, Uwera Martine, yabwiye IGIHE ko hari imyuka imwe yamaze guhagarikwa burundu kwinjizwa ku butaka bw’u Rwanda.

Ati “Ibyuma bikoresha umwuka [Gaz] witwa R22 birakumiriwe kwinjizwa ariko umwuka wo urinjizwa habanje gusaba uruhusa muri REMA. Hari ibindi byaciwe burundu byakoreshaga uwitwa R12 na R11. Ibyo yaba ibikoresho cyangwa umwuka bikoresha nta na kimwe cyemerewe kwinjira ku isoko ry’u Rwanda.”

Yasobanuye ko impamvu uyu mwuka wa R22 ucyinjira mu gihugu mu gihe ibikoresho bikonjesha biwukenera byakumiriwe ari uko hari ibyinjijwe mbere kandi bigifite igihe cyo gukoreshwa.

Ati “Tugomba kuba twabihagaritse burundu bitarenze 2030. Ubwo rero urumva, ntabwo umwuka bikoresha twahagarika kuwinjiza burundu. Tugomba kugera icyo gihe uwo mwuka tuwinjiza mu gihugu ku kigero cya 0%.”

Uyu muyobozi yasobanuye ko hazashyirwaho gahunda yo guca burundu ibikoresho bikoresha uwo mwuka byinjijwe mbere mu gihugu ku buryo bizagera mu 2030, ababisanganywe nabo batakibikoresha.

Ati “Ubu abantu bari kugura frigo n’ibindi byuma bitanga ubuhehere, turi kubashishikariza gukoresha izikoresha imyuka igezweho ku rwego mpuzamahanga. Ubu zamaze kugera ku isoko nta mpungenge n’imwe ihari, twe dufite n’icyizere ko tuzanagera icyo gihe abantu baramaze gutangira gukoresha izigezweho.”

Kuba ubusanzwe ibyuma byinshi bikonjesha bimara igihe kitarenze imyaka 20, uyu muyobozi avuga ko bitanga icyizere ko bizagera mu 2030 nta muntu ugikoresha ibi byuma byahagaritswe kwinjira mu gihugu mu 2009.

REMA ivuga ko hari inyigo igiye gukora izagaragaza ingano y’ibikoresho bikonjesha, bikoresha umwuka uhumanya biri ku butaka bw’u Rwanda.

U Rwanda rukomeje gukaza ingamba zo gukumira imyuka ihumanya ikirere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza