00:00:00 IGIHE NETWORK KN KINYARWANDA EN ENGLISH FR FRANCAIS

Umuryango Mpuzamahanga urengera inyamaswa zo mu gasozi wemerewe kugira icyicaro mu Rwanda

Yanditswe na Kanamugire Emmanuel
Kuya 5 January 2022 saa 12:06
Yasuwe :

Umuryango Mpuzamahanga ubungabunga inyamaswa zo mu gasozi (Wildlife Conservation Society: WCS) wemerewe kugira icyicaro cyo ku rwego rw’Akarere mu Rwanda.

Wildlife Conservation Society ni umuryango mpuzamahanga wigenga, udaharanira inyungu, ufite mu nshingano kubungabunga inyamaswa zo mu gasozi no gucunga Pariki hirya no hino ku isi.

Ufite icyicaro muri imwe muri Pariki nini muri Leta Zunze Ubumwe za Amerika (Bronx Zoo) i New York. Washinzwe mu 1895, icyo gihe ukaba waritwaga New York Zoological Society (NYZS) uza guhindura izina mu 1993.

Iteka rya Perezida ryemerera WCS kugira icyicaro mu Rwanda ryasohotse mu igazeti ya leta yo ku wa 31 Ukuboza 2021.

"WCS" uzaba wemerewe kugira ibikorwaremezo mu gihugu birimo inyubako, ubutaka, ibikoresho, ibiro, laboratwari n’ibindi byafasha mu kuzuza inshingano nk’uko bikubiye mu masezerano yashyizweho umukono n’impande zombi.

Ayo masezerano kandi agena ko ibikoresho umuryango WCS uzakenera mu kazi ka buri munsi bizaba byemerewe gusonerwa imisoro ndetse Guverinoma ikaworohereza kubonera Visa abakozi mpuzamahanga bawo bazaba bakorera mu Rwanda.

Abo bakozi n’imiryango yabo bazaba bafite ubudahangarwa n’andi mahirwe kimwe n’abandi bo ku rwego rwabo bakorera ku butaka bw’u Rwanda.

Mu Rwanda watangiye kuhakorera mu 1987 utanga ubufasha mu kigo cyahoze cyitwa ORTPN cyari gishinzwe ubukerarugendo no kubungabunga pariki z’igihugu mu by’ubushakashatsi mu kubungabunga ibinyabuzima, guhugura abaturage baturiye Pariki y’Ibirunga mu bijyanye no gutangira ibikorwa bibyara inyungu.

Nyuma ya Jenoside wimuye ibikorwa muri Pariki y’Ibirunga bijya muri Nyungwe bihagarikwa kuva aho iyi pariki yeguriwe sosiyete yigenga iyicunga.

Umuyobozi wa Wildlife Conservation Society mu Rwanda, Ngango Joseph, yabwiye IGIHE ko kuri ubu bafitanye umushinga na Minisiteri y’Ibidukikije ugamije kurwanya ingaruka zikomoka ku mihindagurikire y’ibihe.

Uyu mushinga uzakorera muri Pariki ya Nyungwe, Gishwati- Mukura no mu Birunga. Abazituriye bazafashwa guhanga imirimo ibyara inyungu binyuze mu bworozi bw’inzuki n’ubukorikori ndetse no gutera ibiti mu gace ka Congo-Nil.

Kuba uyu muryango wemerewe icyicaro mu Rwanda bizafasha mu gushyira mu bikorwa imishinga iteye kimwe n’iyakorewe mu bindi bihugu mu rwego rwo guhangana n’ingaruka z’ihindagurika ry’ibihe.

Yakomeje agira ati “Ikindi ni uburyo bwo gutekereza ko u Rwanda rwaba ruri hagati bikaba byafasha mu kugeza ibikorwa muri RDC, Tanzania, mu bihugu byo mu Majyepfo ya Afurika nka Mozambique no kugeza muri Madagascar.”

Mu bindi uyu muryango ukora harimo ubushakashatsi ku bibangamiye urusobe rw’ibinyabuzima, ibikorwa ndengamipaka bigamije kubungabunga no kwita ku binyabuzima, gushakira umuti ibibazo bibangamiye umutungo kamere ahari ubucucike bw’abaturage n’ibindi.

Ucunga pariki nini zo muri Amerika zirimo Central Park Zoo, New York Aquarium, Prospect Park Zoo na Queens Zoo zisurwa nibura n’abagera kuri miliyoni 4 buri mwaka.

Mu binyabuzima Umuryango WCS watangiye gutabariza harimo n'uducurama

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .