Hegitari zisaga 285 zigizwe n’ibiti bivangwa n’imyaka

Yanditswe na

Ange de la Victoire Dusabemungu

Kuya 19 Nzeri 2012 saa 05:18
Yasuwe :
0 0

Umuyobozi ushinzwe imirimo yo gutera ibiti n’amashyamba mu ishami rishinzwe amashyamba mu Rwanda aratangaza ko kugeza ubu, ubuso buteweho ibiti bivangwa n’imyaka mu Rwanda bugeze kuri hegitari 285,046.9.
Mu kiganiro na IGIHE Bakundukize Dismas, yadutangarije ko ubusanzwe ubuso bw’amashyamba muri rusange buhagaze hafi ku kigereranyo cya 24% by’ubuso bwose bw’igihugu.
Muri 24% harimo ha 285,046.9 z’ibiti bivangwa n’imyaka aribyo bingana na 10, 8%. Mu kerekezo u Rwanda rwihaye akaba ari ukugira (...)

Umuyobozi ushinzwe imirimo yo gutera ibiti n’amashyamba mu ishami rishinzwe amashyamba mu Rwanda aratangaza ko kugeza ubu, ubuso buteweho ibiti bivangwa n’imyaka mu Rwanda bugeze kuri hegitari 285,046.9.

Mu kiganiro na IGIHE Bakundukize Dismas, yadutangarije ko ubusanzwe ubuso bw’amashyamba muri rusange buhagaze hafi ku kigereranyo cya 24% by’ubuso bwose bw’igihugu.

Muri 24% harimo ha 285,046.9 z’ibiti bivangwa n’imyaka aribyo bingana na 10, 8%. Mu kerekezo u Rwanda rwihaye akaba ari ukugira 30% by’ubuso bw’u Rwanda buteweho ibiti n’amashyamba.

Bakundukize yadutangarije ko ubuso bubarwa igihe waba ufashe ibiti byose ukabihuriza hamwe, kuko usanga ahanini intera biba biteweho aba ari nini kurusha ibiti bitewe mu ishyamba risanzwe (Forêt classic)

Bakundukize agira ati ”Itandukaniro riri hagati y’ubu bwoko bw’ibiti ni uko bitandukanira ku ntera aho usanga ibiti bivangwa n’imyaka biterwa ku ntera nini kugira ngo amazi n’izuba bigere ku myaka, mu gihe usanga ishyamba ricucitse riba rigizwe n’ibiti byinshi kandi byihariye usanga ridahitisha urumuri ngo rube rwagera hasi”.

Bakundukize yongeraho ko bitewe n’imiterere y’ibyo biti bitabangamira imyaka kuburyo bidacuranwa nayo imyunyu ngugu ifasha ibihingwa kubaho, kandi igikomeye ni uburyo biterwa kuko byo bisaba umwihariko.

Bakundukize agaragaza ko ibiti bivangwa n’imyaka bifite akamaro kenshi, nko kurumbura ubutaka, kuko amababi n’amashami abikomoka ashobora kuba ifumbire mu murima; ibiti birwanya isuri kuko bigira uruhare mu gufata ubutaka amazi agacengera mu butaka aho gutemba.

Ibi biti kandi ngo bishobora gutanga imbaho, bigatanga inkwi zo gucana, imihembezo, ubwatsi bw’amatungo, indabo zivamo ubuki, ni ho urusobe rw’ibinyabuzima nk’inyoni bitura, ibiti bivangwa n’imyaka biba umutako bikanagabanya ibyuka bihumanya ikirere.

Bakundukize yongeraho ko ibi biti kandi bituma umuhinzi mworozi atavunika ajya kwangiza andi mashyamba igihe yaba ashaka inkwi zo gucana cyangwa imishingiriro yo guhembeza imyaka ye.

Ibiti bindi Abanyarwanda bakangurirwa gutera, ni ibiti by’isombe, ibiti byera imbuto nk’avoka, n’ibindi.

Ariko abaturage ntibaracengerwamo neza n’uburyo ibiti bivangwa n’imyaka.

Bakundukize ati ”Umuturage yumvako azatera ishyamba nyaryo igiti ku kindi, nyamara hari uburyo yagateye ibiti bivangwa n’imyaka bikazatuma abona ibiti akabona n’imyaka mu murima we”.

Ikindi kibazo ni ingengo y’imari nto yo kubonera abaturage ingemwe n’ubukene bw’abaturage bwo gukora ingemwe ku giti cyabo, cyangwa kugura aho ziba zakozwe.

Amakuru dukesha Ikigo cy’Igihugu gishinzwe umutungo kamere, avuga ko hagenda haboneka abafatanyabikorwa harimo imishinga ya Leta n’imishinga yigenga igenda igira uruhare mu kongera ubuso buteyeho ibiti byaba ibivangwa n’imyaka cyangwa amashyamba muri rusange.

Nk’uko Bakundukize abisaba ngo Abanyarwanda barasabwa kwimenyekanisha niba bashaka gutera ibiti kugira ngo na Leta ifatanyije n’abafatanyabikorwa ibashe kuba yamenya umubare nyawo wabashaka gutera ibiti, bityo kandi n’ingengo y’imali ibigendaho ikaba yateganywa hakiri kare, aho kuza kwaka ingemwe igihe cyararenze.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .