Abarimo Miss Kalimpinya bakoze ikoranabuhanga ryifashishwa n’amahoteli hirindwa Covid-19

Yanditswe na Dufitumukiza Salathiel
Kuya 30 Mata 2021 saa 01:00
Yasuwe :
0 0

Queen Kalimpinya wabaye igisonga cya Gatatu cya Nyampinga w’u Rwanda mu 2017, yifatanyije na bagenzi be babiri bakora ikoranabuhanga ryiswe “Oderfene” rizafasha amahoteli na za resitora guhangana na COVID-19, ari nako abazigana bahabwa serivisi yihuse.

Igitekerezo cyabo bakigize bagamije gufasha abagana za resitora na hoteli kujya basaba bakanahabwa serivisi n’ibindi bashaka batagombye kujya kuvugana n’abakozi baho cyangwa ngo bafate ku rupapuro ruriho urutonde rw’ibihari n’ibiciro byabyo (menu) cyane ko byanaba intandaro yo gukwirakwiza icyorezo.

Ni muri urwo rwego Miss Kalimpinya wize iby’Ishoramari, Rushita Alfene wize iby’Ikoranabuhanga na Bisamaza Ismaïl wize ibya Politiki mpuzamahanga bishyize hamwe bakora application bise “Ordefene” ifasha umukiliya kubona ibiribwa n’ibinyobwa biteguye, agahitamo ibyo atumiza, maze akabishyikirizwa aho ari.

Mu kiganiro Rushita Alfene uhagarariye iryo tsinda yagiranye na IGIHE yavuze ko basanze “ikintu cya mbere umuntu akenera ageze muri resitora na hoteli ni menu” maze batangira kureba uko yashyirwa mu ikoranabuhanga.

Yagie ati “Twahisemo kubishyira mu ikoranabuhanga ku buryo umukiliya abasha gufotora (scan) QR Code akabona menu y’iyo resitora cyangwa hoteli, akaba yatumiza ibyo ashaka yagaragaje n’ameza yicayeho, cyangwa icyumba arimo. Icyo gihe byakirwa n’ubishinzwe, ndetse akabona n’igihe bikenewe, na we akagaragaza ko bije umukiliya akabona ko babimuzaniye.”

Gukoresha Orderfene “bisaba kuba ufite telefoni igezweho [smartphone]” na resitora cyangwa hoteli ugiyemo ikaba ifite QR code y’iyo application. Ugera ku meza yawe ukahasanga urupapuro ruriho ya code, maze ukayifotora na camera ya telefoni bagahita bakwereka menu ugasaba ibyo ukeneye. Haba ibiryo, ibinyobwa cyangwa izindi serivisi zo mu cyumba cya hoteli wabasha kuzihasabira.

Kuva Oderfene yatangira gukoreshwa muri Kanama 2020, iratanga icyizere cyo kudatenguha abayikoresha mu gihe internet yaba ikora neza, cyane ko basigaye banayitangana Wifi nyuma y’uko abayikoresheje bwa mbere batenguhwaga na internet.

Icyongereza n’Igifaransa ni zo ndimi zikoreshwa kuri iyo application kugeza ubu, ariko hari gahunda yo kuzashyiramo n’Ikinyarwanda kugira ngo hatagira uhura n’imbogamizi z’ururimi mu gihe ashaka kuyikoresha.

Orderfene ifasha umukiliya n’umucuruzi gutanga no guhabwa serivisi mu buryo bwihuse, bunoze kandi bujyanye n’igihe.

Rushita Alfene, Bisamaza Ismail na Queen Kalimpinya ni bo bahuje ibitekerezo bakora Orderfene yitezweho gufasha hoteli na resitora gutanga serivisi byihuse kandi bijyanye n'igihe
Ibyo umukiliya atumije ahita yerekwa n'ikiguzi cyabyo
Iyo umaze gufotora QR code baguha ikaze ukabona ibihari kuri telefoni yawe
Umukiliya winjiye muri hoteli cyangwa resitora afotora iyi QR code maze akabona menu kuri telefoni ye akaba yatumiza ibyo akeneye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .