00:00:00 IGIHE NETWORK KN KINYARWANDA EN ENGLISH FR FRANCAIS

Canal+ yagaragaje icyifuzo cyo gushyira televiziyo zose zo mu Rwanda ku muyoboro wayo

Yanditswe na Akayezu Jean de Dieu
Kuya 4 Gicurasi 2021 saa 07:39
Yasuwe :
0 0

Ubuyobozi bwa Sosiyete icuruza ibijyanye n’amashusho ya Televiziyo, Canal+, ishami ry’u Rwanda bwatangaje ko bufite gahunda y’uko nibura televiziyo zose zo mu Rwanda zizashyirwa ku muyoboro wayo kugira ngo zirusheho kwagura umubare w’abazireba.

Byatangajwe n’Umuyobozi wa Canal+ mu Rwanda, Sophie Tchatchoua mu muhango wo kumurika Pacis TV ya Kiliziya Gatolika , nayo yahise yiyongera ku mubare w’izizajya ziboneka kuri uyu muyoboro wa Canal+.

Pacis TV yaje yiyongera ku zindi zisanzwe zigaragara kuri Canal+ zirimo BTN Tv, Isango Tv, Authentic Tv, Genesis Tv, KC2, Flash Tv , TV1, Televiziyo y’Igihugu (RTV) na Tv10.

Tchatchoua yavuze ko kugeza ubu bagize televiziyo 10 zo mu Rwanda ziboneka ku muyoboro wabo ariko hari gahunda y’uko n’izindi zisigaye bazakorana nazo.

Ati “Hari abaturage batabashaga gukurikira Pacis Tv mu bihe bya Covid-19, twumvise tugomba kugira uruhare mu guha abantu ubushobozi bwo gukurikirana Pacis TV by’umwihariko gahunda zayo za Gikirisitu.”

Yakomeje agira ati “Ubu ibaye shene ya 10 hano mu Rwanda igiye kuri Canal+, twifuza ko televiziyo zose zo mu Rwanda zajya zigaragara kuri Canal+ ariko atari aho gusa ahubwo no mu bihugu byose bikoresha ururimi rw’Igifaransa muri Afurika.”

Tchatchoua yavuze ko bizafasha mu kugaragaza ibyiza bikorerwa mu Rwanda no kubimenyekanisha muri Afurika yose ikoresha Igifaransa n’Abanyarwanda batuye muri ibyo bihugu bakabasha kumenya ibibera iwabo.

Padiri Mukuru wa Paruwasi Remera ari naho Pacis TV yatangiriye, Ntagungira Jean Bosco, yavuze ko ubufatanye na Canal+ buziye igihe kuko hari ahantu hatandukanye iyi televiziyo itageraga ariko kuri ubu abantu bakaba bagiye kujya bayibona.

Ati “Tuzagera mu bihugu byinshi na cya gice cy’abanyarwanda bakoresha satellite nabo tuzabasha kubageraho bityo ubutumwa bwiza dutanga bukomeze kugera kuri benshi.”

Kugaragara kuri Canal+ iri mu bihugu birenga 20 muri Afurika ni uburyo bukomeye bwo kugeza ubutumwa bwa televiziyo nyarwanda kure.

kubera ikoresha Satellite, bigiye kongera aho televiziyo zo mu Rwanda zigeza ibyo zitangaza.

Sophie Tchatchoua yavuze ko bafite icyifuzo cy'uko televiziyo zose zo mu Rwanda zijya kuri Canal+
Umuyobozi wa Canal+ mu Rwanda, Sophie Tchatchoua (hagati) ubwo yari yitabiriye ibirori byo gutangiza Pacis TV
Cardinal Kambanda yashimye ubufatanye bwa Kiliziya Gatolika na Canal+
Minisitiri Gatabazi Jean Mari Vianney, Antoine Cardinal Kambanda n'Intumwa ya Papa mu Rwanda, Musenyeri Andrzej Józwowicz

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .