Havumbuwe ko telefone za Google Pixel 4 zishobora gufungurwa n’amaso n’iyo umuntu yaba ahumirije

Yanditswe na Ferdinand Maniraguha
Kuya 20 Ukwakira 2019 saa 02:13
Yasuwe :
0 0

Google yemeje amakuru yari amaze iminsi avugwa y’uko telefone zayo za Google Pixel 4 zishobora gufungurwa n’amaso y’umuntu n’iyo yaba ahumirije.

Ibyo byateje impungenge mu bakiliya kuko hagize ushaka kuyiba cyangwa kwiba amabanga ayirimo akayitunga ku maso ya nyirayo n’iyo yaba asinziriye irafunguka.

Kuri uyu wa Kabiri, itsinda ry’abanyamakuru ba BBC ryagerageje porogaramu y’iyo telefone yemerera nyirayo kuyifungura akoresheje amaso ye (Face Unlock). Bakoresheje abantu batandukanye, iyo bafataga umuntu usinziriye amaso ye bakayatunga kuri iyo telefone yahitaga ifunguka.

Ibyo bihabanye n’ibyo Google yatangaje isohora ubwo bwoko bushya bwa telefone kuko yo yatangaje ko nyiri telefone iyifungura iyo amaso ye afunguye.

Inzobere mu by’umutekano w’ikoranabuhanga, Graham Cluley yabwiye BBC ko ari ikibazo gikomeye niba telefone ishobora gufunguka n’iyo amaso ya nyirayo yaba asinziriye.

Yagize ati “Niba umuntu ashobora gufungura telefone yawe usinziriye ni ikibazo gikomeye ku mutekano kuko undi muntu nk’umwana wawe cyangwa umufasha ashobora kuyifungura usinziriye, apfa kuyigutunga ku maso.Urumva ko nta kwizera umutekano w’amabanga yanjye yaba abitse kuri telefone”.

Zimwe mu mbuga za Internet zikorana na Google nazo zatangaje ko ari byo koko, ko iyo telefone ishobora gufungurwa n’amaso n’iyo nyirayo yaba asinziriye.

Bagiriye inama abakiliya bashaka umutekano wisumbuye wa telefone zabo gukoresha uburyo busanzwe bwo kuzifunga.

Icyakora Google yatangaje ko iyo porogaramu ikoresha amaso y’umukiliya muri telefone zayo, idashobora kwemera gufunguka uyitunze ku mafoto cyangwa abantu bambaye ibipfuka mu maso.

Yatangaje ko bagiye gukomeza kuvugurura porogaramu yabo kugira ngo umutekano wa telefone za Google Pixel 4 wiyongere.

Iyi telefone izamurikwa ku mugaragaro tariki 15 Ukwakira ariko abakiliya ba mbere batangiye kwemererwa kuzitumiza guhera tariki 15 Ukwakira uyu mwaka.

Google yemeje amakuru yari amaze iminsi avugwa y’uko telefone zayo za Google Pixel 4 zishobora gufungurwa n’amaso y’umuntu n’iyo yaba ahumirije

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza