Ibitanda mu ndege: Air New Zealand igiye gutangiza ingendo z’indege zizajya zifasha abashaka kuryama

Yanditswe na Ferdinand Maniraguha
Kuya 27 Gashyantare 2020 saa 01:42
Yasuwe :
0 0

Sosiyete ikora ingendo z’indege, Air New Zealand yatangaje ko igiye gutangiza ingendo zihariye, aho abashaka kuryama bazajya bagenerwa ibitanda byihariye mu ndege bakaruhuka cyane cyane ku ngendo zigana mu byerekezo bya kure.

Iyo sosiyete yavuze ko nubwo ari agashya, bizatwara igihe kirenga umwaka ngo ibyo bitanda bibe byamaze kugezwa mu ndege zayo.

Kuri uyu wa Gatatu, Air New Zealand yatangaje ko yamaze kwandika ishinganisha ibitanda byayo mbere yo gutangira kubikoresha mu ndege. Ubu buryo bwiswe Economy Skynest, buzaba bufite ibitanda bitandatu muri buri ndege bya santimetero 200 z’uburebure na santimetero 58 z’ubugari.

Kuri buri gitanda hazajya haba hariho umusego, amashuka, utwuma dutuma utumva urusaku, ndetse n’umwenda ukingira uburiri (rideaux). Air New Zealand yatangaje ko igitekereza niba izongeraho n’ibindi bikoresho nk’aho gucomeka telefone, n’itara ritanga urumuri ruhagije ku buryo umuntu yabasha gusoma.

Ushinzwe ibikorwa byo kwamamaza muri Air New Zealand, Mike Tod yavuze ko ubwo buryo bw’ibitanda buzaba bugenewe cyane cyane abakiliya bajya mu byerekezo birebire aho bibasaba amasaha menshi mu ndege, nk’urugendo rwa Auckland –New York izatangiza umwaka utaha ruzajya rufata amasaha 17 n’iminota 40.

Ikiguzi cya Skynet ntikiramenyekana ariko ubuyobozi bwa Air New Zealand bwatangaje ko kizajya kiba kiri ukwacyo, ntaho gihuriye n’itike y’indege isanzwe nk’uko The Guardian yabitangaje.

Hari n’ubundi buryo buzajya bukoreshwa, aho uri mu ndege ashaka kuryama ashobora kubisaba akishyura, akagenda akaryama amasaha cyangwa iminota mike. Air New Zealand yatangaje ko abakozi bo mu ndege bazajya baba bari hafi ku buryo mu gihe umuntu umwe abyutse, bahita bategura uburiri ku buryo undi ushaka kuryama abukoresha.

Haracyategerejwe uburenganzira kugira ibyo bitanda bitangire gushyirwa mu ndege za Air New Zealand.

Mu gihe ubu buryo buzaba bwemejwe, iyo sosiyete ivuga ko izahita itangira kubugurisha no ku zindi sosiyete z’indege.

Air New Zealand siyo ya mbere itangiye kuzana udushya tugamihe gushimisha abakiliya bayo mu ngendo kuko nk’umwaka ushize, sosiyete Collins Aerospace ikora iby’indege yatangije uburyo bw’uko mu gihe indege ihagurutse, hafi y’amadirishya n’inzugi zayo hazajya hihindura nk’akabari , abakiliya bakagenda baganira bafata n’icyo kunywa.

Ibitanda bizajya biba bigerekeranye
Buri gitanda kizajya kigira amashuka yacyo n'utundi twangombwa
Buri ndege izajya iba irimo ibitanda bitandatu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .