Microsoft igiye kugura porogaramu ya Discord

Yanditswe na Dufitumukiza Salathiel
Kuya 23 Werurwe 2021 saa 10:04
Yasuwe :
0 0

Ikigo cy’ikoranabuhanga cy’Abanyamerika,Microsoft, kiri mu biganiro byo kugura porogaramu ya Discord ikoreshwa mu itumanaho n’imikino y’amashusho, kuri miliyari zirenga 10$.

Bloomberg yatangaje ko amakuru yahawe na bamwe mu bazi iby’iryo gura, bavuze ko riri gukorwa mu ibanga rikomeye ariko mu baguzi bahabwa amahirwe menshi yo kwegukana iyo porogaramu harimo Microsoft.

Uretse ayo makuru yatanzwe n’abafite aho bahuriye n’icyo gikorwa, haba abayobozi ba Microsoft cyangwa aba Discord ntacyo barabitangazaho.

Porogaramu ya Discord ikoreshwa n’abarenga miliyoni 100 buri kwezi, yifashishwa mu itumanaho ry’amajwi n’amashusho, kohererezanya ubutumwa bw’amashusho, ubw’amajwi, ubw’inyandiko ndetse igakinirwaho n’imikino y’amashusho byose ku buntu.

Amakuru avuga ko Microsoft yaba ishaka kwigarurira iyo porogaramu mu kwagura uburyo bwo kubona abakiliya benshi, cyane ko muri ibi bihe Isi yugarijwe n’icyorezo byagaragaye ko benshi bakenera imikino y’amashusho bishimisha, cyangwa bayihugiraho iyo batari mu kazi.

Iyo yaba yiyongeye kuri ZeniMax Media Inc icyo kigo giheruka kugura kuri miliyari 7.5$, nayo itanga serivisi z’imikino y’amashusho.

Nanone kandi kuko ingamba zafashwe mu kwirinda ikwirakwizwa ry’icyorezo harimo kudahuriza abantu benshi hamwe, Discord yakwifashishwa nk’uburyo bw’ikoranabuhanga buhuriza hamwe abari mu birori, imihango runaka cyangwa inama.

Icyo kigo binavugwa ko gishaka kwigwizaho uburyo bwinshi bwahuza abari hirya no hino mu Isi, ari nayo mpamvu mu mpera z’umwaka ushize cyashakaga kugura imigabane y’urubuga rw’Abashinwa,Tik Tok, muri Amerika.

Microsoft y’abaherwe Bill Gates na Paul Allen imaze igihe igura n’izindi mbuga nkoranyambaga nka LinkedIn yaguze mu 2016 kuri miliyari 26.2$;ndetse muri Gashyantare 2021 byavuzwe ko iri mu biganiro byo kugura urwa Pinterest rubikwaho rukanashakirwaho amakuru hifashishijwe amashusho. Miliyari 51$ nizo zizashorwamo.

Abandi bavugwa kuba mu biganiro byo kwegukana Discord barimo Epic Games Inc ya Tim Sweeney na Mark Rein, ndetse na Amazon y’umuherwe Jeff Bezos.

Microsoft irashaka kugura porogaramu ya Discord kuri miliyari ziranga 10$ (ifoto: VentureBeat)

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .