00:00:00 IGIHE NETWORK KN KINYARWANDA EN ENGLISH FR FRANCAIS

Rurageretse hagati ya Apple na Spotify bapfa inyungu y’umurengera icibwa abakoresha porogaramu z’umuziki

Yanditswe na IGIHE
Kuya 2 Gicurasi 2021 saa 02:42
Yasuwe :
0 0

Sosiyete ya Apple ishobora guhanwa kubwo kurenga ku mategeko y’Umuryango w’Ubumwe bw’u Burayi, izamura ibiciro ku bakoresha porogaramu zayo bikabangamira abakiliya.

Komisiyo y’uwo muryango ishinzwe ubugenzuzi yatangaje ko hari abakiliya benshi bamaze igihe binubira amafaranga bacibwa kugira ngo babashe gukoresha porogaramu zikinirwaho umuziki mu bikoresho bya Apple nka telefone n’ibindi.

Ikirego cyatanzwe mu myaka ibiri ishize gitangwa na Spotify, porogaramu yifashishwa na benshi kumva umuziki bihitiyemo. Iyo sosiyete yatangaje ko Apple iri kwica isoko kuko porogaramu yose ikinirwaho umuziki, iyo isabye gushyirwa muri App Store icibwa inyungu y’umurengera, bigatuma n’abakiliya binuba.

Ibi birego biramutse bihamye Apple, BBC yatangaje ko yabihanirwa cyane kandi igasabwa guhindura imikorere.

Porogaramu zikina umuziki zikoreshwa n’abifashisha ibikoresho bya Apple, zisabwa kwishyura iyo sosiyete 30 % by’ayo zaciye umukiliya. Spotify yatanze ikirego ivuga ko ayo mafaranga ari menshi.

Komisiyo ya EU ishinzwe ubugenzuzi yagaragaje ko ibyo Apple ikora biri kwica isoko ry’abakora porogaramu zikinirwaho umuziki, bikagira n’ingaruka ku bifashisha ibikoresho byifashiha iOS ya Apple, aribo bakiliya. Ibyo bihabanye n’amabwiriza ya EU.

Apple yahise nayo isohora itangazo, ivuga ko Spotify itakabaye ibarega mu gihe na 99% by’amafaranga yinjije nta nyungu Apple irayabonera.

Bavuze ko ikigaragara, Spotify ishaka kwikubira inyungu zose ziva muri porogaramu yayo, ariko ikirengagiza ko kugira ngo abakiliya bayibone hari abandi baba babigizemo uruhare bakwiriye gushimirwa.

Hashize igihe bamwe mu bakora porogaramu zifashishwa na Apple binubira uburyo inyungu bacibwa ihanitse. Byatumye iyo sosiyete igabanya, ishyiraho inyungu ya 15 % ku bafite porogaramu zinjiza munsi ya miliyoni y’amadolari ku mwaka.

Epic Games yakoze umukino uzwi nka Fortnite nayo iheruka kurega Apple igaragaza ko bacibwa amafaranga menshi, basaba ko 30 % bishyura Apple kuri buri mukiliya babonye agabanywa.

Byarangiye Apple ivanye uwo mukino muri App Store nubwo rukigeretse mu nkiko hagati y’izo sosiyete zombi. Urubanza rwazo ruzasubukurwa mu cyumweru gitaha.

Porogaramu zicurangirwaho umuziki zirimo Spotify zishinja Apple guca inyungu z'umurengera

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .