00:00:00 IGIHE NETWORK KN KINYARWANDA EN ENGLISH FR FRANCAIS

U Bufaransa: Umushoramari yahisemo kwikorera iperereza ku bamwibye kuko Polisi yananiwe

Yanditswe na Dufitumukiza Salathiel
Kuya 28 Mata 2021 saa 07:30
Yasuwe :
0 0

Umushoramari w’Umufaransa, Sébastien Pagani, yafashe umwanzuro wo kwikurikiranira abagerageje kwiba ibihumbi 325,9$ mu ishoramari rye baturutse muri Hongrie, kuko abona polisi ntacyo ibikoraho.

Pagani yabwiye AFP ko umukozi ushinzwe icungamutungo muri sosiyete ye yitwa Avon yandikiwe n’umuntu kuri email isa n’aho ari iye (Pagani), maze aramubaza ati “Ese Bertrand yaguhamagaye?”. Aho hari kuwa 8 Mata 2021.

Mu minota mike, uwo mukozi yahise ahamagarwa n’umugabo amubwira ko ari we witwa Bertrand, amusaba ko amwoherereza byihuse ibihumbi 27 by’amayero (325.911$) ngo yo kugura indi sosiyete muri Hongrie. Barakomeje barandikirana kuri email ariko amubuza kugira undi muntu yabibwira.

Pagani yavuze ko abo batekamutwe bari bazi neza imikorere ya sosiyete ye ku buryo bayobeje uwo mukozi akayohereza.

Ku munsi wakurikiyeho umukozi wa banki yohererejwemo ayo mafaranga yabimenyesheje Pagani agwa mu kantu, ariko ku bw’amahirwe birakurikiranywa aragaruzwa.

Pagani yahise asaba uwo mucungamutungo we gukomeza kwandikirana n’abo bantu kugira ngo amenye aho baherereye abakurikirane, kuko polisi yo yavuze ko “ikurikirana ibyo ishobora gukora mu buryo bwubahiriza amategeko”.

Ubu uwo munyemari yamaze gushyira ikoranabuhanga rishya muri mudasobwa ye kugira ngo batongera kumwiba amakuru, ndetse yatangiye gukoresha uburyo bwose bushoboka ngo amenye aho abo batekamutwe baherereye yifashishije ikoranabuhanga.

Yagize ati “Sinshaka kubareka ngo bagende gutyo gusa. Sinshobora kwihanganira abo batekamutwe, kandi mu gihe mbona abakabikurikiranye badakora akazi kabo ndabyikorera.”

Polisi y’icyo gihugu yavuze ko gukurikirana icyo kibazo bigoye cyane kuko bisaba imikoranire mpuzamahanga no kuba ifite amakuru ahagije ku buryo abo batekamutwe bakoresheje bahisha imyirondoro yabo.

Ibitero by'ikoranabuhanga n'ubutekamutwe byakajije umurego muri ibi bihe by'icyorezo cya COVID-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .