Urugendo rwa Ashish Thakkar winjiye mu bucuruzi ku myaka 15, ubu ageze ku ruganda rwa Mara Phones

Yanditswe na IGIHE
Kuya 17 Gashyantare 2020 saa 09:32
Yasuwe :
0 0

Byari mu mpeshyi yo mu mwaka wa 1972 ubwo umunyagitugu wayoboye Uganda, Idi Amin Dada yatunguraga isi avuga ko Imana yamubonekeye mu nzozi, ikamusaba kwirukana abakomoka ku mugabane wa Aziya bose bari muri Uganda.

Idi Amin yabyutse atanga iminsi 90 bose bakaba bamuviriye mu gihugu. Hafi ibihumbi 50 by’abaturage bafite inkomoko muri Aziya barirukanwe. Abenshi bafashe inzira igana mu Bwongereza.

Mu bahungiyeyo icyo gihe harimo Jagdish na Sarla ababyeyi b’umunyemari Ashish Thakkar washinze Mara Phones, uruganda rwa mbere rukora telefone muri Afurika, arushinga mu Rwanda.

Igisekuru cya Thakkar cyavuye mu Burengerazuba bw’u Buhinde muri Leta ya Gujarat mu myaka ya 1890, kiza gutura muri Afurika y’Iburasirazuba.

Nyuma yo kwirukanwa muri Uganda, ababyeyi ba Thakkar bagiye mu Bwongereza ari naho uwo munyemari yavukiye mu mujyi wa Leicester mu 1981.

Mu kiganiro yagiranye n’ikinyamakuru Le Point cyo mu Bufaransa, Ashish Thakkar yagize ati “Ndi igisekuru cya kane mu muryango wanjye guhera ugeze muri Afurika y’Iburasirazuba. Twubatse sosiyete ya Mara Group duhereye ku busa none ubu ni sosiyete y’icyitegererezo muri Afurika.”

Umuryango wa Thakkar waje kuva mu Bwongereza ugaruka muri Afurika y’Iburasirazuba, kuri iyi nshuro baza mu Rwanda.

Muri Jenoside yakorewe Abatutsi mu 1994, byinshi mu byo uwo muryango wari umaze kugeraho byarasenywe basubira hasi cyane.

Yavuye mu ishuri atangira ubushabitsi

Ku myaka 15, nibwo Thakkar yatangiye ubucuruzi nyuma yo kugira amahirwe akabona inguzanyo y’amadolari 5000.

Yagize ati “Ubwo ababyeyi banjye banyuraga mu byabaye muri Uganda, nari ntaravuka. Icyakora nyuma y’ibyo babayemo mu Rwanda nkumva n’ibyo babayemo mbere, byampaye imbaraga zo kugira icyo nkora.”

Yahise ahagarika ishuri, atangira ubucuruzi hagati ya Dubai na Afurika y’Iburasirazuba. Ubucuruzi bwe nta bundi, kwari ukuzana ibikoresho by’ikoranabuhanga byakoreshejwe akabicuruza mu mujyi wa Kampala muri Uganda mu iduka rito ababyeyi be bari barashinze, dore ko baje gusubira muri Uganda bakahaba nk’impunzi.

Mu byo yacuruzaga habaga harimo mudasobwa n’ibikoresho byose bijyana nazo, telefone n’ibindi. Ni ubucuruzi bwamuhiriye dore ko icyo gihe benshi batari bakamenye neza iby’ubucuruzi bw’ibikoresho by’ikoranabuhanga.

Mu mwaka wa 2013, Thakkar yahuye n’umuherwe w’umunyamerika ufite inkomoko mu Bwongereza, Bob Diamond, akaba yarahoze ari mukuru wa banki ya Barclays. Bamaze kuganira bafatanyije gushinga Atlas Mara, sosiyete y’ishoramari mu mabanki ku mugabane wa Afurika.

Mu gihe gito, abo banyemari babashije kubona miliyoni 325 z’amadolari, bahita bandikisha sosiyete yabo ku isoko ry’imari n’imigabane ry’i Londres.

Ibintu byaje kugenda nabi, basanga ubyuryo binjiye mu kibuga cyo muri Afurika butaratekerejweho neza, maze batangira guhomba.

Thakkar avuga ko kubera gufungura amashami mu bihugu badasobanukiwe neza imikorere, byabahombeje cyane kugeza ubwo ibikorwa bya sosiyete Atlas Mara biguye ku kigero cya 84 %. Ubu Atlas Mara iri mu biganiro byo kuguranisha imigabane yayo muri Equity Group yo muri Kenya.

Icyo gihombo cyagarutsweho mu gitabo cya Ashish Thakkar yise ‘The Lion Awakes : Adventures in Africa’s Economic Miracle’. Muri icyo gitabo agira ati “Uko twafataga Afurika turi hanze yayo bitandukanye n’ibihabera. Kuhakorera ubucuruzi ni ibintu bigoye rwose.”

Yakomeje agira ati “Sosiyete zo hanze y’umugabane zakomeje guhabwa ikaze muri Afurika, twe nka sosiyete nyafurika bikaturakaza. Ntabwo twitaga ku kuba tugiye gushinga ubucuruzi busa nk’ubw’uwo uvuye hanze y’umugabane nyamara ari we ufite amahirwe menshi.”

“Nk’umugabane, ibikorwa byacu n’ubwinshi bihagaze neza. Dufite miliyari y’abaturage ariko turacyagabanyijemo ibihugu 54. Ni abantu mugomba gukorana ariko b’imico n’imyumvire bitandukanye.”

Uyu mugabo avuga ko ibintu byarushijeho kuba bibi mu 2013 ubwo yatandukanaga n’uwahoze ari umugore we Meera Manek bikagera mu rukiko baburana imitungo.

Uko yatangije uruganda rwa telefone zigezweho mu Rwanda

Mu myaka mike, Ashish Thakkar yafashe umwanzuro wo gutangiza uruganda rwa mbere rukora telefone zigezweho ku mugabane wa Afurika.

Abajijwe uko byaje, yagize ati “Icya mbere ni ukureba uko guhererekanya amafaranga binyuze kuri telefone bihagaze muri Afurika , no gutekereza amahirwe ari kuri uwo mugabane kubera ikoreshwa ry’ikoranabuhanga. Kuri ubu abanyafurika bagomba guhitamo hagati ya telefone ihendutse cyangwa telefone yujuje ubuziranenge. Hashingiwe ku kuboneka kwa internet ya telefone na porogaramu z’ingirakamaro, telefone igezweho ishobora gufasha mu guhanga imirimo kandi igateza imbere guhanga udushya.”

Yongeyeho ati “Muri iryo hanga ry’umurimo no gukoresha ibyahanzwe, niko umugabane wa Afurika uba uri gutera imbere.”

Uruganda rwa Mara Phones ruherereye mu cyanya cyahariwe inganda i Masoro mu karere ka Gasabo.

Byafashe imyaka itanu kugira ngo Ashish Thakkar we na Bob Diamond babashe gutangiza imirimo yo kubaka urwo ruganda mu Rwanda, bafashijwe na Leta y’u Rwanda. Ni umushinga wa miliyoni 22 z’amayero.

Ubwo Perezida Kagame na Ashish Thakkar bafunguraga uruganda rwa Mara Phone mu Ukwakira umwaka ushize

Urwo ruganda rufite ubushobozi bwo gukora telefone igihumbi buri munsi, nkuko byatangajwe na Eddy Sebera umuyobozi Mukuru w’urwo ruganda. Kugeza ubu urwo ruganda rusohora ubwoko bubiri bwa telefone, aribwo Mara X na Mara Z, bukoresha Android. Ni telefone zifite batiri zirambana umuriro n’ububiko bunini.

Buri telefone iba ikozwe n’udukoresho tw’ikoranabuhanga dusaga igihumbi twose dukorerwa muri urwo ruganda.

Ashish Thakkar avuga ko Mara Phones ari rwo ruganda rwa mbere muri Afurika rukora telefone ibiyigize byose byakorewe kuri uwo mugabane, mu gihe izindi nganda zisanzwe zo ziteranya ibyakorewe ahandi.

Thakkar ati “U Burayi ntibukora telefone zigezweho, Leta Zunze Ubumwe za Amerika ntizikora telefone ndetse no mu Burasirazuba bwo hagati ntazo bakora. Dufate nka Apple ikorerwa mu Bushinwa, Samsung ni iyo muri Korea, Huawei ni iyo mu Bushinwa.”

Yongeyeho ati “Mara Phones ni inyafurika , ibyo bigaha amahirwe menshi abanyaburayi cyangwa abanyamerika bagira impungenge ku bijyanye n’ubutasi n’umutekano wabo. Nibura telefone zacu zifite uwo mwihariko.”

Thakkar avuga ko bishimishije uburyo Guverinoma zo muri Afurika zagiye zihindura imyumvire muri iyi myaka ishize, zigaha rugari ivuka ry’ishoramari by’umwihariko muri Afurika yo munsi y’ubutayu bwa Sahara, aho Banki y’Isi igaragaza ko buri mwaka havuga sosiyete ziciriritse ibihumbi 500.

Kugeza ubu muri Afurika hari izindi sosiyete ziteranya telefone zigezweho nka Elikia muri Congo, Kunfabo ya Fadima Diawara muri Guinée na Nile X zikorwa na sosiyete yo mu Misiri ya Sico.

Icyakora ibigize izo telefone zose bikorerwa mu Bushinwa ku nkunga y’icyo gihugu.

Abajijwe uko bazahangana n’izo telefone nshya zihendutse muri Afurika, Thakkar yagize ati “Biroroshye kubizana muri Afurika ariko dutekereje gutyo nta na kimwe twazikorera ubwacu. Afurika igomba gutekereza guhanga ibyayo kuko mu gihe uri kwigana iby’abandi, muba mukiri inyuma cyane.”

Kuba barahisemo u Rwanda, Ashish Thakkar yavuze ko ari igihugu gikataje mu guteza imbere ibyakorewe muri Afurika kandi gifite amarembo akinguye ku bashoramari.

Ati “U Rwanda ubu rurajwe ishinga no guteza imbere ibyakorewe mu Rwanda. Ni igihugu giha ikaze ubucuruzi, gifunguriye amarembo umugabane wose hamwe na Guverinoma isobanukiwe ibiba hirya no hino ku isi n’ubuyobozi bwiza. Ni igihugu gishaka kuba igicumbi cy’ikoranabuhanga, birigaragaza hose.”

Uyu munyemari yagaragaje ko telefone za Mara Phones zoherezwa mu bihugu 53. Muri byo, inyinshi zigurishwa mu Budage, u Butaliyani, muri Leta Zunze Ubumwe za Amerika no mu Bufaransa.

Thakkar avuga ko bashaka ko telefone za Mara Phones zigaragara mu maduka menshi acuruza telefone.

Mara Group yafunguye urundi ruganda rumeze nk’urw’i Kigali i Durban muri Afurika y’Epfo. Inzozi za Ashish Thakkar ni ugukomeza guteza imbere ibijyanye n’ikoranabuhanga, akagira uruhare muri Afurika n’isi muri rusange.

Thakkar ubwo hatahwaga uruganda rwa Mara Phones i Kigali
Thakkar avuga ko icyamuteye gushora imari mu Rwanda ari ubuyobozi bwiza buhari bworohereza ishoramari
Aha Perezida Kagame yasobanurirwaga imikorere ya Mara Phones, uruganda rwa mbere rukora telefone muri Afurika
Ibikoresho byose Mara Phones ikoresha mu guteranya telefone bikorerwa muri Afurika
Perezida Kagame hagati ya Ashish Takkar (iburyo) na Bob Diamond ubwo BPR Atlas Mara yamurikaga ibirango bishya mu 2016

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .