Imyaka 14 mu mvune n’ubukene ku mashini Kabayiza yitezeho gutanga amashanyarazi (Video)

Yanditswe na Ferdinand Maniraguha
Kuya 1 Werurwe 2018 saa 11:55
Yasuwe :
0 0

Imyaka 11 mu nzozi z’igitekerezo yabonaga mu mutwe we ariko ntawe yabasha kugisobanurira, kongeraho imyaka itatu amaze agishyira mu bikorwa ariko bamwe bamwita umusazi, Kabayiza Ephrem noneho afite icyizere ko mu kwezi kumwe imashini ye ikora nk’umutima yifashishije amazi izatangira gutanga ingufu z’amashanyarazi.

Izo nzozi azihera mbere gato y’umwaka wa 1996 ubwo yigaga mu mashuri abanza. Ntiyabashije kurenga aho ngo akomeze andi mashuri ariko duke yavanyemo nitwo tumugejeje ku mashini ishobora gutanga amashanyarazi mu minsi ya vuba, igafasha igihugu kugabanya amafaranga gikoresha gishakisha ingufu z’amashanyarazi ndetse n’abanyarwanda bagera kuri 60 % bakabasha kubona umuriro ku buryo bworoshye.

Mu minota 50 mu modoka uvuye rwagati mu mujyi wa Kigali uba usesekaye mu murenge wa Kanombe, Akagali ka Karama ahazwi nka Gakorokombe hepfo ya Radari mu Busanza, aho Kabayiza n’umuryango we batuye.

Ahagana saa cyenda z’igicamunsi nibwo umunyamakuru mu rugo rwa Kabayiza. Ku irembo iwe usanganirwa n’akayaga gaturuka mu gashyamba kari munsi y’urugo n’amajwi y’abana b’abaturanyi bakina dore ko atuye mu rusisiro.

Ntabwo umurebye n’inzu atuyemo, wahita utekereza ko ari we ufite inzozi zo gucanira igihugu no guhangana n’abahanga ku isi mu by’ingufu z’amashanyarazi.
Tukigerayo yaduhaye ikaze. Twinjiye mu nzu ye tuzi ko agiye kutwicaza mu cyumba cy’abashyitsi ariko siko byagenze kuko icyakabaye uruganiriro yagihinduye ‘ikanikiro’ ari naryo yatujyanyemo.

Uruganiriro rwe nirwo rurimo imashini ye ikozwe n’imbaho, ibyuma n’amatiyo. Uwize imiterere n’imikorere y’umutima, ntabwo ashidikanya akibona imashini ya Kabayiza kuko ya mijyana n’imigarura berekana iyo wiga ibigize umutima w’umuntu, ni nka byo byuzuye ku mashini ye.

Kabayiza avuga ko igitekerezo cye yagikuye mu byo yize mu mashuri abanza. Yibuka ko yiga bamwigishije ko amazi yo ku isi ariyo atuma imvura ibaho bigakora igisa n’uruziga rwisubiramo.Yagendeye kandi ku birenge by’umuntu, uburyo kimwe kigenda kiva aho kigenzi cyacyo kivuye bigafasha umuntu kugira aho agera.

Imashini ya Kabayiza ayitezeho kubyaza amazi amashanyarazi mu buryo butandukanye n'ubwari busanzwe bwo gukoresha ingomero

Amaze gutekereza ibyo, yaje gusanga bizamugora gukora imashini ikora nkabyo, yibuka ko hari n’ibyo yize bijyanye n’uko umutima ukora, aho wakira amaraso yanduye ukayasukura akaba ariyo yongera kwifashishwa mu mubiri.

Ni Imashini yishakamo ingufu ikabyara ingufu

Imashini ya Kabayiza hejuru ifite ahantu hazashyirwa ikigega kizajya gisukwamo amazi. Icyo kigega gicometseho amatiyo imbere akoze mu buryo bwa gihanga azajya agemurira utundi tugega duto turi munsi.

Ayo matiyo abiri akoze mu buryo imwe izajya yifungura ikamanura amazi mu tugega two hasi, indi igahita yifunga, zikagenda bihana umwanya bityo bityo.

Utwo tugega two hasi natwo turimo ibice bibiri bitandukanyijwe n’agapira (chambre à air). Mu gihe agapira kamwe kuzuyemo amazi, bizajya byisunika bigana hasi ahari imijyana ari nayo izajya ikwirakwiza amazi mu bindi bice by’imashini.

Uko amazi amanukana ingufu muri iyo mashini, hari inziga zitandukanye zirimo inini n’intoya zizajya zikaraga zigatuma ‘dynamo’ yayo ishyuha ari nayo atezeho kujya ibyaza ubwo bushyuhe ingufu z’amashanyarazi.

Iyi mashini imaze kugendaho miliyoni zisaga enye

Ya mazi yinjiye, hari andi matiyo yakoze azajya ayasohorera mu kindi kigega gito kiri ahagana hasi, gikoze mu buryo kizajya cyongera kuyasubiza hejuru muri cya kigega kinini, agatangira urugendo bundi bushya.

Ni ibintu Kabayiza asobanura ubona abyumva ariko bikagora uwo abisobanurira dore ko nta mazi aratangira gushyiramo ngo byigaragaze kuko hari bimwe mu bikoresho bikibura.

Uko abimazemo imyaka myinshi, niko avuga ko bimaze kumutwara ingufu n’amafaranga agera muri miliyoni enye n’igice.

Yaba imbaho akoresha, inziga z’ibyuma zikaraga, imipira (amatiyo) byose nta na kimwe yikorera.

Yagize ati “Biriya bikoresho byose hari ibiba biciye intoboro, hari ibiba bikoze mu buryo bw’inziga, hari n’ibyo ngenda nsudirisha cyangwa ncurisha by’ibyuma. Hari n’ibikoze muri plasitique byose binsaba ko ngomba kuva hano, nkagenda mbyikoreye mu Gakinjiro ka Gisozi cyangwa mu Gakinjiro ko mu mujyi kugira ngo mbashe kubicurisha.”

Yongeyeho ati “Rimwe na rimwe nta mafaranga mba mfite ariko nkumva ntakwiye kwica umwanya wanjye ku busa. Niba ngize amahirwe nkaba mfite umwanya mba ngomba kuwukoresha.”

Kuba akora ibyo atize, ntabwo bimuca intege kuko ngo yumva afite ishyaka ryo gukorera igihugu ikintu kizagifasha kugabanya amafaranga gitanga ngo kibone umuriro w’amashanyarazi.

Iryo shyaka ryatumye areka ubucuruzi yakoraga atangira kwibanda kuri uwo mushinga afatanya no gutunga urugo. Ni umushinga abona igihumbi, akawushoraho magana atanu andi akayahahiramo umuryango.

Inzobere zamubwiye ko umushinga we ushoboka

Kabayiza arabizi ko utazi ubwenge ashima ubwe kandi ko nta mugabo umwe.
Akimara gukora igishushanyo mbonera cy’umushinga we, yagishyikirije inzobere zirimo izo mu kigo gishinzwe ingufu n’amashanyarazi (REG).

Yagezeyo azisobanuriye zimubwira ko umushinga we ushoboka, gusa zimwohereza ku zindi nzobere zo muri Kaminuza y’u Rwanda mu yahoze ari KIST nazo zemeza ko ari umushinga mwiza, ko uramutse ukunze wafasha igihugu.

Iyi mashini Kabayiza yayikoze agendeye ku mikorere y'umutima

Izo nzobere zo muri KIST yazisabye ko bafatanya, ngo zimubwira ko byashoboka aramutse afite ingengo y’imari yo kuwushyira mu bikorwa.

Kubera ko iyi ngengo y’imari ntayo yari afite, yigiriye inama yo kujya kuwandikisha mu kigo cy’Igihugu gishinzwe Iterambere ngo hatazagira uwiyitira, ubundi akomeza urugamba rwo kwirya akimara awushyira mu bikorwa.

Abonye ibihumbi 500 Frw ukwezi kumwe imashini ye yaba ikora

Kabayiza avuga ko iyo ataza guhura n’imbogamiri zirimo kubura amafaranaga aba yararangije umushinga we kera.

Yagize ati “Nkeneye nibura amafaranga ibihumbi 500 kugira ngo umushinga wanjye nywurangize.Ndamutse nyabonye ntabwo byatwara ukwezi ntararangiza imashini y’ibanze.”

Hari benshi bamwise umusazi akibitangira, abandi bamubwira ko yabireka kuko ntacyo bizamugezaho ariko yemeza ko azaruhuka ageze ku cyo yatekereje.

Ati “Icyamfashije kudacika intege, ni intego mfite ko nubwo ibyo ndi gukora bishobora kumfasha ubwanjye, ariko nshimishwa no kuba n’igihugu ubwacyo gishobora kubiboneramo inyungu.”

Nubwo imashini ari gukora ari imwe, Kabayiza yiteze ko nibasha gukora bizamufungurira amarembo yo gushakisha inkunga yo gukora izindi. Yifuza ko n’uwashaka kumutera ingabo mu bitugu yamubona kuri nimero ye ya telefone (0785831842).

Kabayiza avuga ko abonye ubufasha iyi mashini yaba yuzuye mu kwezi kumwe
Kabayiza asobanura imikorere y'imashini ye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .