Verizon yatangije ishakiro rya OneSearch riha umwihariko umutekano w’abakoresha internet

Yanditswe na IGIHE
Kuya 17 Mutarama 2020 saa 01:58
Yasuwe :
0 0

Ntabwo bitangaje kumva ko uko usura imbuga zitandukanye kuri internet, ayo makuru yose abikwa ndetse akagenzurwa, kimwe n’uburyo ushakisha ibintu kuri Google.

Niyo mpamvu uzabona hamwe unyura ushakisha niba ukoresha nka telefoni, iyo ugifungura urubuga rwa Google usanga imbuga wasuye kenshi ziyanditse hasi, ku buryo bitagusaba kongera kuzandikamo igihe wifuza kuzisura.

Hari uburyo bukoreshwa mu gushakisha ibintu runaka kuri internet, amayira wanyuze ntabikwe na porogaramu wakoresheje (browser). Uburyo bwari busanzwe ku isoko ni DuckDuckGo, ariko ku wa 14 Mutarama 2020 hari ubundi bwinjiye ku isoko. OneSearch.

Ni uburyo bwakozwe n’ikigo Verizon Media, bushobora kwifashishwa mu gushakisha ibintu binyuranye kuri internet, haba kuri telefoni cyangwa mudasobwa.

Itandukaniro ry’iri shakiro rishya (search engine) ugereranyije n’uburyo busanzwe, ni uko OneSearch ifata amakuru y’uyikoresha mu buryo bwihariye.

OneSearch yo ntabwo ikusanya amakuru y’umuntu unyuze muri iri shakiro ngo ibe yayagaragariza uwo ari we wese, cyangwa ngo igumane ibyo ukunda gushakisha, ku buryo ibigo bidashobora kwifashisha amakuru yawe ngo bikwamamazeho ibintu runaka bitewe n’ibyo babonye ukunda gushakisha.

Mu gushakisha ibyo umuntu akeneye, OneSearch ivuga ko izajya itanga “ibisubizo bidafite ikindi cyagize uruhare mu kubigena.”

Iki kigo kinavuga ko ibintu byose umuntu ashakisha bizajya birindwa, ku buryo niba ukoresha OneSearch umuntu adashobora kugukurikirana ngo amenye ngo ukunda kureba ibi cyangwa ukunda gusura imbuga runaka.

Iri shakiro rinatanga uburyo bwisumbuye bw’umutekano buzwi nka “Advanced Privacy Mode”, aho imbuga wasuye, nyuma y’isaha imwe zisiba mu ishakiro ryawe.

Nk’uko Verizon yabitangaje, ubu buryo buzafasha cyane mu kurinda amakuru y’umuntu wifashisha nka telefoni cyangwa mudasobwa agashakisha ikintu runaka kuri internet, nyuma undi muntu akaza kuyifashisha cyangwa icyo washakishaga ukagisangiza abandi.

Iri shakiro rya OneSearch naryo rizaba ryemera amatangazo yohererezwa abantu bari kuri internet, ariko azajya atangwa hashingiwe ku kintu runaka ushakishije, aho gushingira ku bintu ukunze gushakisha cyangwa imbuga ukunda gusura.

OneSearch ni kimwe mu bishya bihanzwe na Verizon Media, aho ije isanga ibindi bikorwa birimo ibinyamakuru HuffPost, TechCrunch na Yahoo. Ni imbuga Verison ivuga ko zisurwa n’abantu bagera kuri miliyoni 900 buri kwezi.

Umutekano w’abakoresha internet ni ikintu cyakunze gutindwaho cyane, bitewe ahanini n’uburyo ibigo bikomeye nka Facebook, Google na Amazon birimo gushinjwa gukoresha nabi amakuru y’ababikoresha.

Ni mu gihe ayo makuru usanga abyazwa umusaruro mu buryo bw’ubucuruzi, ibintu bikomeje gutuma nka Facebook ihora mu nkiko.

OneSearch yashyizeho umwihariko ku mutekano w'abakoresha internet mu gushakisha ibintu binyuranye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .