Drones zirimo iy’Abanyafurika zagurukijwe mu mwitozo utegura irushanwa ryazo mu Rwanda (Amafoto na Video)

Yanditswe na Ishimwe Israel
Kuya 4 Gashyantare 2020 saa 05:20
Yasuwe :
0 0

Indege zitagira abapilote [drones] z’ibigo bikomeye ku Isi zagurukijwe ku nkombe y’Ikiyaga cya Kivu mu Karere ka Karongi, mu mwitozo wabanjirije irushanwa rya drones riteganyijwe kubera mu Rwanda.

Iri rushanwa ryiswe Lake Kivu Challenge rigamije kwerekana ikoranabuhanga rigezweho mu iterambere ryo gutwara drones. U Rwanda rwabaye igihugu cya mbere muri Afurika kizaryakira kuva ku wa 8 Gashyantare 2020.

Amarushanwa yo kugurutsa indege za drones azamenyekanisha serivisi nshya, amakuru agezweho mu kohereza no kwakira ibintu bitandukanye, guhanga imirimo n’amahirwe yo kwihutisha iterambere, no kubaka ubumenyi bujyanye n’imirimo yo mu kinyejana cya 21.

Ibigo 11 nibyo bizaryitabira ndetse kuri uyu wa Kabiri, tariki ya 4 Gashyantare 2020, bimwe muri byo byakoze umwitozo wo kugurutsa drones.

Umuyobozi wa Banki y’Isi ushinzwe Ibijyanye n’Ubwikorezi muri Afurika y’Uburasirazuba, Ben Eijbergen, yashimiye abagize uruhare mu gutegura irushanwa.

Ati “Intego nkuru ni ukureba ikoranabuhanga rigezweho. Ntituri hano kureba drone ishobora kugenda yihuse ahubwo ni ukureba ikoranabuhanga rikenewe mu kunoza ibyo zikora.’’

Umunyamabanga Mukuru w’Ishyirahamwe ry’Indege za Gisivili mu Muryango wa Afurika Yunze Ubumwe (AFCAC), Tefera Mekonnen, yavuze ko amahirwe ari mu ikoreshwa rya drone akwiye kubyazwa umusaruro.

Ati “Tugomba kureba uko ikoranabuhanga rya drones rikoreshwa, kungukira byinshi mu byo zikora ku buzima bw’abaturage.’’

U Rwanda rwashimwe uko rukomeje kwimakaza iterambere ry’ikoranabuhanga.

Umuyobozi w’Akarere ka Karongi, Mukarutesi Vestine, yavuze ko hari byinshi irushanwa rya Lake Kivu Challenge rizasigira igihugu.

Yagize ati “Turishimye cyane ko mwemeye kuza mu gihugu cyacu. Bizadusigira ubumenyi bwinshi, ku buryo twakora ubushakashatsi bwimbitse mu gukoresha drones.’’

Mbere yo kugurutsa drones, abitabiriye iki gikorwa bahawe amabwiriza y’ibyo kwirinda birimo kutanywa itabi, kuzimya telefoni kugira ngo bidateza ikibazo izo ndege.

Muri drones zagurukijwe harimo iya Germany Drone yo mu Budage, Hojung solutions – Remo-M yo muri Koreya y’Epfo; Avy; Phoenix Wings yo mu Budage na Wingcopter.

Buri tsinda ryahabwaga umwanya wo kugurutsa indege nyuma yo gusuzuma ikirere no kureba ko nta kibazo gifite. Urugendo rwa drone rwagenzurwaga n’inzobere mu by’ingendo zo mu kirere harebwa ko zubahiriza amabwiriza.

Abapilote bahabwaga umwanya wo kubanza gutegura urugendo no gusuzuma ko ikirere kimeze neza mbere y’uko indege ihaguruka; zagurukijwe hakurikijwe amategeko mpuzamahanga.

-  Drone y’Abanyafurika ikoze mu migano mu zagurukijwe

Indege idakenera umupilote yakozwe n’abanyeshuri bo muri Tanzania, Bornlove Nkitha na Digna Gasper, iri mu zamuritswe muri iki gikorwa.

Ni drone ifite ibice biyigize bikoze mu migano. Yavuye mu mushinga abanyeshuri bakoze basoza amasomo ya kaminuza mu mwaka ushize.

Digna yabwiye IGIHE ko bitabiriye uyu mwitozo ku nshuro ya kabiri kuko no mu mwaka ushize, bari ku Kiyaga cya Victoria muri Tanzania.

Ati "Intego dufite ni iyo kwagura ikoranabuhanga dukoresha kugira ngo rikomeze kugirira benshi umumaro.’’

Iyi drone yakozwe ku bufatanye bw’aba banyeshuri na OpenMap Development Tanzania (OMDTZ), yagurutse hejuru y’Ikiyaga cya Kivu nkuko izindi zabigenzaga, igera muri metero 100 zo mu kirere igaruka ku butaka [ahari ikibuga cyabugenewe] mu minota ibiri.

Bornlove Nkitha na Digna Gasper bareba ikoranabuhanga ribafasha kugenzura drone yabo

Mu Ukwakira 2016, Perezida Paul Kagame yatangije ikoreshwa rya drones nk’uburyo bushya u Rwanda rukoresha mu kugeza amaraso ku bitaro binyuranye byo mu gihugu, mu gufasha abayakeneye ku buryo bwihuse kandi vuba.

Uyu ni umushinga wa Minisiteri y’ubuzima mu Rwanda na sosiyete ya Zipline, watangiye ushyirirwa mu bikorwa mu Murenge wa Shyogwe mu karere ka Muhanga, mu Ntara y’Amajyepfo. U Rwanda kandi rwatangiye gukoresha drones mu bindi bitari ubuvuzi, nko mu buhinzi.

Lake Kivu challenge biteganyijwe ko uzayegukana azahabwa ibihumbi £40, agera kuri miliyoni 50 Frw. Irushanwa rizibanda mu byiciro bitatu bigaragaza uko ikoranabuhanga rya drones ryakwifashishwa mu kugeza serivisi z’ibanze nk’ubuvuzi ku baturage.

Aya marushanwa azakurikira Inama Nyafurika kuri drones, izahuriza hamwe abayobozi mu ikoranabuhanga rya drones kuri uyu wa 5 Gashyantare 2020. Izigirwamo imikoreshereze yazo muri Afurika mu bihe biri imbere.

Zipline izasangiza abazitabira “Africa Drone Forum’’ urugendo rwayo rw’imyaka itatu itanga serivisi z’ubuvuzi mu Rwanda na Ghana.

Digna Gasper (usa n’uwunamye) na Bon Love Nkitha (ibumoso) bakoze drone mu migano bitegura kuyigurukiriza i Karongi
Iyi drone yakozwe n'abanyeshuri bo muri Tanzania ubwo yafataga ikirere
Ni drone ikoze mu migano, ikagira n'ibindi bice bituma izamuka mu kirere
Iyi ndege yakozwe hagamijwe kuyifashisha mu bijyanye no gufata amafoto
Digna Gasper na Bornlove Nkitha basubira mu byicaro byabo nyuma yo kugurutsa indege mu rugendo rwagenze neza
Hashyizweho televiziyo nini zafashaga abantu kureba uko drone zigenzurwa harebwa niba zitarenze ahabugenewe
Umuyobozi wa Banki y’Isi ushinzwe Ibijyanye n’Ubwikorezi muri Afurika y’Uburasirazuba, Ben Eijbergen, yasabye ko ibihugu bya Afurika bigira amategeko ahamye yorohereza imikorere y'ingendo za drones
Umunyamabanga Mukuru w’Ishyirahamwe ry’Indege za Gisivili mu Muryango wa Afurika Yunze Ubumwe (AFCAC), Tefera Mekonnen, yashimye u Rwanda rwakiriye iki gikorwa
Umuyobozi w’Akarere ka Karongi, Mukarutesi Vestine, ni we watangije umwitozo wo kugurutsa drones
Ishoramari rya drones riri kuzamuka kuko kuri ubu rihagaze agaciro ka miliyari $127
Phoenix Wings yo mu Budage ni yo drone mu zamuritswe itwara ibilo byinshi, ibigera ku 10. Ifite ubushobozi bwo kugenda metero 23 ku isegonda ku butumburuke bwa metero 400
Ni igikorwa cyitabiriwe n'abantu batandukanye
Abagize itsinda rya Remo-M yo muri Koreya y’Epfo bari bafite akanyamuneza nyuma yo kugurutsa drone yabo
Bornlove Nkitha w'imyaka 26 ari mu banyeshuri bo muri Tanzania bakoze drone
Hojung Solutions iri mu bigo bizitabira irushanwa rya drones riteganyijwe kubera mu Rwanda
Uyu mwitozo wo kugurutsa drone uri mu bikorwa byabanjirije Inama Nyafurika yiga ku iterambere ryazo itegerejwe mu Rwanda
Wingcopter na yo ntiyahatanzwe
Drones zagurukijwe mu mwitozo utegura irushanwa ryazo mu Rwanda ryiswe Lake Kivu Challenge
Buri kigo cyari cyitwaje ibikoresho byacyo bigifasha kugurutsa drone neza
Aho indege zagurukiraga nta bantu bahakandagiraga usibye ababyemerewe. Abitabiriye iki gikorwa bari bagenewe aho bahagarara bakitegereza bataharenga
Drone zagurutswaga n'abashoferi b'abanyamwuga
Yagerageje gutahana ifoto azajya yibukiraho urwibutso yasigiwe n'igeragezwa ry'ingendo za drones i Karongi
Indege zigurutswa hakurikijwe amategeko mpuzamahanga azigenga n'ikirere cy'igihugu zikoreramo
Izi drones zagurukirijwe ku nkombe y'Ikiyaga cya Kivu mu Karere ka Karongi
Hari hateganyijwe ahantu haboneye indege zihagurukira, zikanahagwa neza
Buri wese yashakaga gufata ifoto y'urwibutso asigarana igaragaza drone iguruka n'uko igwa

Amafoto: Dushimimana Ami Pacifique

Video: Kazungu Armand


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .