U Bushinwa, Amerika na UAE bigiye kohereza ibigendajuru kuri Mars

Yanditswe na Umwali Zhuri
Kuya 13 Nyakanga 2020 saa 11:45
Yasuwe :
0 0

Leta Zunze Ubumwe za Amerika, u Bushinwa na Leta Zunze Ubumwe z’Abarabu ni ibihugu biteganya kohereza ibigendajuru kuri Mars mu minsi iri imbere, bizaba byitezweho gukora ubushakashatsi kuri uyu mubumbe bivugwa ko ushobora guturwaho mu gihe kiri imbere.

Buri gihugu kizohereza ikigendajuru mu butumwa bwihariye, nka Leta Zunze Ubumwe za Amerika zizohereza ikigendajuru kuri Mars binyuze muri gahunda ya Nasa, Ikigo cyayo gikora ubushakashatsi ku isanzure, kizaba kigiye gukora ubukashatsi kuri uyu mubumbe kugira ngo harebwe niba ubuzima bushoboka.

Icyo kigendajuru byitezwe ko kizava kuri uwo mubumbe gikuyeyo itaka rihabarizwa kugira ngo rikorweho ubushakashatsi, bikazaba ari ku nshuro ya mbere ubutaka buvuye kuri Mars bugeze ku Isi.

U Bushinwa nabwo burateganya kubyaza umusaruro isanzure kurusha ibindi bihugu binyuze mu mugambi wabwo wo kubaka mu isanzure igice gikorerwamo ubushakashatsi, kikanagenzura ibyogajuru.

Buherutse kohereza mu kirere “Chang-Zheng 5B”, rockette ishobora kuzamura ibyogajuru yikoreye toni 22. Iyi rockette u Bushinwa bwohereje izafasha kandi mu mushinga wa Chang’e 5 wo kugera ku kwezi mu mpera za 2020. U Bushinwa kandi buri kwiga uburyo bwatangira kugerageza amahirwe yo kugera ku mubumbe wa Mars.

Leta Zunze Ubumwe z’Abarabu nazo muri uku kwezi zizohereza kuri Mars icyogajuru cya mbere kizahaguruka ku Isi ku wa 15 Nyakanga 2020, mu butumwa bwahawe izina “Hope” cyangwa se “Icyizere” mu Kinyarwanda.

Ni umushinga umaze igihe kuko watangiye gutegurwa mu 2014, abahanga bazagenzura urwo rugendo batangira kwitoza, ndetse n’icyogajuru gitangira guteranywa, hakorwa n’amasuzuma atandukanye hitegurwa ibibazo by’ikirere bishobora kuzavuka mu nzira.

Intego y’ingenzi ni ukugera kuri Mars hanyuma abahanga mu by’isanzure bakagenzura ibijyanye n’ikirere cyaho. Barashaka kuzamenya impamvu kuri uyu mubumbe haba ikibazo cy’umwuka wa hydrogène na oxygène mu gihe uyu mubumbe ufite byinshi uhuriyeho n’isi dutuye.

Ibizava muri ubwo bushakashatsi bizahabwa ibigo 200 bikora ubushakashatsi mu by’isanzure birimo na NASA, kugira ngo bizitabweho mu zindi ngendo zigana kuri uyu mubumbe.

Icyogajuru kizoherezwa kuri Mars kizaba gifite camera zakozwe n’Abayapani zifite ubushobozi buhambaye bwo gufata amakuru n’amashusho y’umukungugu ugaragara kuri Mars.

Inkuru wasoma: Byatwara igihe kingana iki umuntu kuva ku Isi ajya kuri Mars?

Abahanga bakomeje ubushakashatsi kuri Mars bashaka kureba niba ubuzima bushoboka kuri uyu mubumbe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .