Mugisha Moïse yegukanye agace ka kane, akoza imitwe y’intoki kuri Grand Prix Chantal Biya

Yanditswe na Eric Tony Ukurikiyimfura
Kuya 21 Ugushyingo 2020 saa 05:15
Yasuwe :
0 0

Umunyarwanda Mugisha Moïse yegukanye Agace ka Kane ka Grand Prix Chantal Biya kakinwe kuri uyu wa Gatandatu, yiyongerera amahirwe yo gutwara iri siganwa.

Muri aka gace kabanziriza aka nyuma kakinwe, abasiganwa bahagurukiye i Zoétélé berekeza muri Nkpwang- Meyomessala ku ntera y’ibilometero 116,4 .

Mugisha Moïse yegukanye aka gace akoresheje amasaha abiri, iminota 46 n’amasegonda 33, asiga amasegonda atanu Umunya-Slovakia Kubiš Lukáš mu gihe Uhiriwe Byiza Renus yabaye uwa gatatu yasizwe amasegonda 11.

Mu bakinnyi 10 ba mbere, hajemo kandi Munyaneza Didier wabaye uwa munani anganya ibihe na Uhiriwe kimwe na Mugisha Samuel wabaye uwa 12.

Ku rutonde rusange, Mugisha Moïse yashyizemo ikinyuranyo cy’amasegonda 39 hagati ye na Kubiš Lukáš, aho amaze gukoresha amasaha 12, iminota 15 n’amasegonda 29 mu gihe Umunya-Cameroun Kamzong Clovis wa SNH Vôlo Club, arushwa amasegonda 45.

Mu gace ka nyuma kazakinwa ku Cyumweru, abakinnyi bazava i Sangmelima berekeza i Yaoundé ku ntera y’ibilometero 166,2.

Grand Prix Chantal Biya iri kuba ku nshuro ya 20 iri ku bipimo bya 2.2 ku ngengabihe y’Ishyirahamwe ry’Umukino w’Amagare ku Isi (UCI), izasozwa ku wa 22 Ugushyingo 2020, nyuma yo kuzenguruka ibilometero 699,4.

Yitabiriwe n’amakipe icyenda arimo iy’u Rwanda, Repubulika Iharanira Demokarasi ya Congo, Benin, Côte d’Ivoire, Burkina Faso, Sénégal, Mali, Dukla Banska Bystrica yo muri Slovaquie na SNH Vélo Club yo muri Cameroun.

Ubwo Team Rwanda yaherukaga kwitabira Grand Prix Chantal Biya mu mwaka ushize, Munyaneza Didier ni we Munyarwanda waje hafi, aho yasoreje ku mwanya wa kane, anatahana umwambaro w’umukinnyi muto wigaragaje mu irushanwa.

Mugisha Moïse ni we ukiri imbere ku rutonde rusange mu Irushanwa rya Grand Prix Chantal Biya
Mugisha Moïse mu mwambaro w'umuhondo na bagenzi be bahagarariye Team Rwanda bafite amahirwe yo kwegukana Grand Prix Chantal Biya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .