Uhiriwe Byiza Renus na Ingabire begukanye Rwanda Cycling Cup 2019, Benediction ihiga andi makipe

Yanditswe na Eric Tony Ukurikiyimfura
Kuya 7 Ukuboza 2019 saa 06:52
Yasuwe :
0 0

Nyuma y’amezi atanu yari amaze akinwa, amarushanwa ya Rwanda Cycling Cup 2019 yasojwe kuri uyu wa Gatandatu, aho yegukanywe na Uhiriwe Byiza Renus ubwo hakinwaga isiganwa rya Kigali-Rwamagana-Kigali ryasorejwe Kimironko, rigatsindwa na Munyaneza Didier bakinana muri Benediction Excel Energy.

Iri siganwa rya munani ryasoje andi yose y’uyu mwaka yateguwe na FERWACY agaterwa inkunga na Cogebanque n’uruganda rw’ibinyobwa rwa SKOL, ryahagurukiye Kimironko, abakinnyi barekeza i Rwamagana, aho bageze bagahindukira, bagaruka i Kigali.

Nyuma yo gukora intera y’ibilometero 100.6 yari igenewe abagore, abagabo bazengurutse indi ntera y’ibilometero 13.4 inshuro ebyiri (berekeza i Masoro mu cyanya cy’inganda) mu gihe ingimbi zo zayizengurutse inshuro imwe.

Munyaneza Didier wa Benediction Excel Energy, waherukaga kwegukana Farmers Race yiyongeraga kuri Kivu Race, ni we watwaye n’iri siganwa rya nyuma, aho yakoresheje amasaha atatu, iminota 20 n’amasegonda 55.

Areruya Joseph wakiniraga Les Amis Sportis y’iwabo i Rwamagana, yakoresheje imbaraga nyinshi atanga ku murongo Manizabayo Eric, aho bombi basizwe amasegonda 57 na Munyaneza.

Mu bagore, uwa mbere yabaye Ingabire Diane wegukanye agace ka kane yikurikiranya, ni nyuma yo gukoresha amasaha atatu, iminota 14 n’amasegonda 14.

Bagenzi be bakinana muri Benediction Club, Mukundente Géneviève yabaye uwa kabiri arushwa isegonda rimwe mu gihe Nzayisenga Valentine yabaye uwa gatatu arushwa amanota icyenda.

Mu ngimbi, iri siganwa rya nyuma ryatwawe na Hategekimana Jean Bosco wa Les Amis Sportifs, wakoresheje amasaha atatu, iminota irindwi n’amasegonda 16, arusha amasegonda 17 Kwizera Innocent wa Kigali Cycling Club wabaye uwa kabiri.

Rwanda Cycling Cup 2019 yatangiye muri Nyakanga, aho irushanwa rya mbere ryabereye i Musanze ‘Northern Challenge’ ryegukanywe na Uwizeyimana Bonaventure wa Benediction Excel Energy.

Nkurunziza Yves wa Benediction Excel Energy yatwaye Tour de Kigali muri Kanama, Mugisha Moïse wa Skol Fly Cycling Club atwara Rwamagana Circuit mu gihe Munyaneza Didier ‘Mbappé’ na we wa Benediction yatwaye Kivu Race, amasiganwa yombi yakinwe muri Nzeri.

Mugisha Samuel yegukanye Criterium Byemayire Lambert i Huye mu Ukwakira, Uhiriwe Byiza Rénus wa Benediction yegukana Muhanga Circuit mu ntangiriro z’ukwezi gushize mu gihe Munyaneza Didier ‘Mbappé’ yatwaye Farmers Circuit yakiniwe i Musanze mu mpera z’ukwezi gushize n’iri siganwa rya nyuma.

Nyuma yo guteranya amanota yose y’amasiganwa, Uhiriwe Byiza Renus wa Benediction Excel Energy, yatwaye Rwanda Cycling Cup mu bagabo, Ingabire Diane wa Benediction Club ayitwara mu bagore mu gihe Hategekimana Jean Bosco wa Les Amis Sportifs, yayitwaye mu ngimbi.

Benediction Excel Energy yatwaye igikombe cya 2019 mu bagabo, Benediction Club igitwara mu bagore mu gihe icy’ingimbi cyatwawe na Les Amis Sportifs y’i Rwamagana, iterwa inkunga na Cogebanque.

Iyamuremye Antoine ushinzwe iyamamazabikorwa muri Cogebanque, yavuze ko bishimiye uko aya masiganwa yagenze mu Mijyi itandukanye yanyuzemo, aho babonye amahirwe yo kuvugana n’abakiriya babo, bareba uko serivisi babaha zirimo Gisubizo Loan Express na Mortgage, bazakira.

Ishyirahamwe ry’Umukino w’amagare mu Rwanda (FERWACY) ryashimiye SKOL na Cogebanque zagize uruhare rukomeye muri aya marushanwa nk’abafatanyabikorwa.

Cycling Cup ni amarushanwa ngarukamwaka ategurwa na Ferwacy kuva mu 2015. Yashyizweho mu rwego rwo kongerera imyitozo n’ubunararibonye abakinnyi by’umwihariko abadakina mu Ikipe y’Igihugu batitabira amasiganwa menshi mpuzamahanga.

Ay’umwaka utaha azatangira muri Gashyantare, mbere gato ya Tour du Rwanda 2020.

Nyuma yo gusoza uyu mwaka w’amagare mu Rwanda, abakinnyi bakinira ikipe y’Igihugu bagiye gukomeza kwitegura La Tropicale Amissa Bongo izaba muri Mutarama 2020 ndetse na Tour du Rwanda 2020 izatangira mu mpera za Gashyantare.

Isiganwa rya nyuma rya Rwanda Cycling Cup 2019 ryahagurukiye Kimironko
Isiganwa ryerekeje i Rwamagana
Areruya ayoboye igikundi cy'abakinnyi ubwo isiganwa ryajyaga i Rwamagana
Imanizabayo Eric Karadiyo ari mu bari bayoboye isiganwa
Nyuma yo kugera i Rwamagana, abakinnyi bahise bagaruka i Kigali
Mugisha Samuel aganira na Uwizeye Jean Claude ubwo basiganwaga
Ingabire Diane yatsinze agace ka nyuma mu bagore
Hategekimana Jean Bosco wa Les Amis Sportifs atsinda gace ka nyuma mu ngimbi
Munyaneza wari wasize bagenzi be, yageze ku murongo ari kubyina
Munyaneza Didier Mbappé yatsinze agace ka nyuma ka Rwanda Cycling Cup 2019
Areruya Joseph yabaye uwa kabiri atsinze Manizabayo Eric
Ibihembo byahawe abitwaye neza
Hategekimana Jean Bosco wa Les Amis Sportifs ahemberwa agace yegukanye
Ingabire Diane watsinze agace ka nyuma mu bagore
Munyaneza Didier yabaye uwa mbere kandi mu batarengeje imyaka 23
Umuyobozi wa Tekinike wa FERWACY, Murenzi Emmanuel asoza Rwanda Cycling Cup 2019
SKOL na Cogebanque zashimiwe na FERWACY ku ruhare rwazo muri Rwanda Cycling Cup
Iyamuremye Antoine ushinzwe Iyamamazabikorwa muri Cogebanque afata ifoto n'igihembo bahawe
Umuyobozi wa SKOL Ivan Wulffaert na Iyamuremye Antoine ushinzwe Iyamamazabikorwa muri Cogebanque
Ingabire Diane wa Benediction Club yatwaye Rwanda Cycling Cup mu bagore
Hategekimana Jean Bosco wa Les Amis Sportifs yatwaye Rwanda Cycling Cup 2019 mu ngimbi
Uhiriwe Byiza Renus yegukanye Rwanda Cycling Cup 2019
Benediction Club yahize andi makipe mu bagore
Les Amis Sportifs iterwa inkunga na Cogebanque yabaye ikipe ya mbere mu ngimbi muri Rwanda Cycling Cup 2019
Benediction Excel Energy yitwaye neza mu bagabo muri Rwanda Cycling Cup 2019

Amafoto: Niyonzima Moïse


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza