00:00:00 IGIHE NETWORK KN KINYARWANDA EN ENGLISH FR FRANCAIS

Djokovic ashobora kwirukanwa muri Australia

Yanditswe na Eric Tony Ukurikiyimfura
Kuya 14 January 2022 saa 10:59
Yasuwe :

Guverinoma ya Australia yimye visa Novak Djokovic ku nshuro ya kabiri ndetse ashobora kwirukanwa ku butaka bw’iki gihugu kuko atikingije COVID-19.

Icyemezo cyo kwima Novak Djokovic visa ku nshuro ya kabiri, cyafashwe na Minisitiri Alex Hawke ushinzwe Abinjira n’Abasohoka muri Australia.

Alex Hawke yavuze ko “yakoresheje ububasha bwe mu nyungu rusange.”

Byari byitezwe ko Djokovic usanzwe ari nimero ya mbere ku Isi muri Tennis, ashobora gukina Australian Open izatangira ku wa Mbere, ariko kuri ubu ashobora kwirukanwa muri Australia.

Gusa, uyu mukinnyi w’imyaka 34 ashobora kandi kongera gutanga ikirego asaba kurenganurwa nk’uko byagenze ubwo yimwaga visa ku nshuro ya mbere mu cyumweru gishize.

Mu gihe yakwirukanwa ku butaka bwa Australia, Djokovic ashobora gufatirwa ibihano by’imyaka itatu atongeye kubona visa yo kwinjira muri icyo gihugu.

Uyu mukinnyi umaze kwegukana Australian Open inshuro icyenda, yashakaga kuyitwara kugira ngo bimufashe kuba umukinnyi wa mbere ukoze amateka yo kwegukana Grand Slam 21.

Ubwo yageraga muri Australia bwa mbere ku wa 6 Mutarama 2022, yahise ashyirwa muri hoteli i Melbourne kugira ngo abanze gusobanura uburyo yabonyemo umwihariko wo kwitabira irushanwa kandi atarikingije COVID-19.

Ku wa Mbere tariki ya 10 Mutarama 2022, umucamanza yategetse ko Djokovic arekurwa kuko icyemezo yahawe n’abaganga gifite agaciro, aho byagaragajwe ko yanduye COVID-19 ku wa 16 Ukuboza 2021 bityo atari kubasha kwikingiza.

Icyongeye gukoma Djokovic mu nkokora ni amakuru yagaragajwe ko yagiye muri Espagne na Serbia mu minsi 14 mbere y’uko ajya muri Australia kandi bitemewe.

Mu itangazo yashyize hanze ku wa Gatatu, uyu mukinnyi yemeye ko atubahirije amabwiriza yo kwishyira mu kato, akajya kuganira n’umunyamakuru wa L’Equipe yo mu Bufaransa nyuma y’iminsi ibiri amenye ko arwaye ndetse yavuze ko umukozi we yakoze ikosa ryo gutanga amakuru atari yo ubwo yuzuzaga urupapuro rwo kwinjira muri Australia.

Novak Djokovic ashobora kwirukanwa muri Australia nyuma yo kwimwa visa bwa kabiri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .