Imikino ihuza abantu benshi izasubukurwa mu Ukwakira

Yanditswe na Eric Tony Ukurikiyimfura
Kuya 18 Nzeri 2020 saa 11:40
Yasuwe :
0 0

Minisiteri ya Siporo yatangaje ko imyitozo y’imikino ihuza abantu benshi mu Rwanda, izasubukurwa mu ntangiriro z’Ukwakira kugira ngo amakipe azaserukira igihugu atangire kwitegura.

Kimwe n’ibindi bikorwa bitandukanye bihuza abantu benshi, imikino n’amarushanwa byahagaritswe mu Rwanda kuva muri Werurwe kubera icyorezo cya Coronavirus.

Guhera muri Kamena, nibwo imwe mu mikino yatangiye gukomorerwa, hakorwa imyitozo kuri siporo zikorwa abantu bategeranye, ariko hubarizwa amabwiriza yo kwirinda ikwirakwira ry’icyorezo cya Coronavirus. Amarushanwa yo akaba atemewe.

Mu kiganiro n’itangazamakuru cyabaye kuri uyu wa Gatanu, Umunyamabanga Uhoraho muri Minisiteri ya Siporo, Shema Maboko Didier, yavuze ko biteganyijwe ko imyitozo y’indi mikino izakomorerwa mu ntangiriro z’ukwezi gutaha.

Ati “Nk’uko nigeze kubikomozaho muri buri mukino twashyizeho ingamba, ubu turi kureba ingamba buri federasiyo yashyizeho mu gihe imikino yaba iri kuba.”

“Tugomba kugira uko amakipe yacu yitegura kandi akagenda mu marushanwa mpuzamahanga yiteguye neza. Bitarenze intangiriro z’ukwa 10 imikino n’amarushanwa biraza gutangira, amakipe yitegure imikino mpuzamahanga. “

“Hari federasiyo zimaze kuduha gahunda zitandukanye nka FERWAFA, Federasiyo ya Basket n’iz’iyindi mikino mu buryo bazakurikiza amabwiriza atandukanye.”

Basketball ishobora kuba umukino wa mbere usubukuye mbere y’iy’indi mu Rwanda, ni nyuma y’uko mu cyumweru gishize hemejwe ko Shampiyona mu bagabo n’abagore, izaba hagati ya tariki ya 18 na 24 Ukwakira, abakinnyi bose baba bamwe.

Imyitozo y’amakipe izatangira ku wa 25 Nzeri kugeza ku wa 15 Ukwakira, umunsi ukurikiyeho abakinnyi bajye hamwe mu mwiherero, aho bazabanza gupimwa icyorezo cya Coronavirus.

Minisiteri ya Siporo iherutse gutangaza ko guhera ku wa 20 Nzeri, siporo rusange ya Kigali Car Free Day, izongera gusubukurwa nyuma y’amezi asaga atandatu, igakorwa abantu bubahiriza amabwiriza yo kwirinda Coronavirus arimo gusiga intera ya metero ebyiri hagati y’umuntu umwe n’undi.

Kugeza ubu siporo zakomorewe ni izikorwa abantu bategeranye zirimo uwo kunyonga igare, gutwara imodoka, Tennis, Golf, kugenda n’amaguru (Hiking), imikino ngororamubiri, Cricket, Boxing (Iteramakofe), Imikino Njyarugamba (Karate, Kung Fu, Taekwondo, Judo), Skating, Kumasha, Badminton, Aerobic, na Gymnastics.

Mu ngamba zafashwe na menshi mu mashyirahamwe y’imikino harimo ko imikino izasubukurwa ibera mu muhezo mu gihe n’abakinnyi bazajya babanza gupimwa.

Umunyamabanga Uhoraho muri Minisiteri ya Siporo, Shema Maboko Didier, yavuze ko imikino ihuza abantu benshi izasubukurwa mu ntangiriro z'Ukwakira
Umupira w'amaguru uri mu mikino itaremererwa gusubukura kuva muri Werurwe uhagaritswe kubera icyorezo cya Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .