00:00:00 IGIHE NETWORK KN KINYARWANDA EN ENGLISH FR FRANCAIS

Uruhare rwa siporo mu bumwe n’ubwiyunge nyuma ya Jenoside

Yanditswe na Eric Tony Ukurikiyimfura
Kuya 12 Mata 2021 saa 01:58
Yasuwe :
0 0

Siporo ifite imbaraga zo kwimakaza amahoro n’ubumwe mu batuye igihugu ndetse ni kimwe mu byafashije u Rwanda kugera ku bumwe n’ubwiyunge nyuma ya Jenoside yakorewe Abatutsi mu 1994.

Abatutsi barenga miliyoni imwe bishwe mu gihe cy’iminsi 100 gusa icyo gihe.

Siporo ntiyafashije gusa mu bumwe n’ubwiyunge kuko yagize uruhare mu irokoka rya bamwe no komora ibikomere by’abarokotse Jenoside.

Mu buhamya bwe, Murangwa Eugène wari umunyezamu wa Rayon Sports, akunda kugaruka ku buryo yarokowe n’uko abashakaga kumwicana na mugenzi we, basanze azwi muri iyo kipe bakamubabarira.

Avuga kandi uburyo mugenzi we bakinanaga, Munyurangabo Longin, yabitayeho ubwo bahigwaga ndetse yishuye Interahamwe amafaranga ye kugira ngo zitabica.

Ati “Mugenzi wanjye twakinanaga, Munyurangabo Longin, yakoze ku buryo njye n’inshuti zanjye twari kumwe dukomeza kuba ahantu hatekanye, adushakira ibyo kurya.”

Uretse uyu, hari abandi nka Sinzi Tharcisse ufite umukandara w’umukara na Dan ya gatandatu (yari afite dan ya kabiri mu gihe cya Jenoside) mu mukino wa Karate, warokotse ndetse abasha no kurokora Abatutsi 118 yifashishije ubumenyi afite muri uwo mukino.

Niyonshuti Adrien kuri ubu utoza Ikipe y’Amagare ya SACA, aherutse kubwira IGIHE ko umukino w’Amagare byamufashije gukira ibikomere yatewe na Jenoside.

Muri uyu mwaka, u Rwanda ruri kwibuka ku nshuro ya 27 Jenoside yakorewe Abatutsi. Muri siporo, buri mwaka hategurwa ibikorwa by’imikino n’amarushanwa agamije kwibuka by’umwihariko abari aba-sportifs bishwe muri Jenoside, bikunze kuba muri Kamena.

Umunyamabanga w’Ishyirahamwe ry’Umukino wa Rugby mu Rwanda, Uwitonze Félix, yavuze ko imikino yafashije Abanyarwanda kwiyubaka nyuma y’urugendo rutari rworoshye nyuma ya Jenoside.

Ati “Ntirwari urugendo rworoshye, ariko ubumwe n’ubwiyunge byagezweho kandi umusaruro ugaragarira buri wese.”

Yakomeje agira ati “Kuva mu 2002 [ubwo Rugby yatangiraga mu Rwanda], twaharaniye guteza imbere kandi dukomeje guteza imbere ubumwe n’ubwiyunge mu Banyarwanda binyuze muri siporo ya Rugby. Byose bihera mu kubaka icyizere, ubucuti no gusangira ubunararibonye haba mu kibuga no hanze yacyo.”

Byiringiro Audifax yabaye umukinnyi wa Cricket ndetse kuri ubu akaba ari Visi Perezida w’Ishyirahamwe Nyarwanda ry’uwo mukino, yarokotse Jenoside ariko si ko byagenze kuri se n’abavandimwe be babiri. Yabwiye The New Times ko Cricket yatangiye gukina mu 2007, yagize uruhare mu gusohoka mu gahinda yatewe n’ibyabaye ku muryango we.

Ati “Nagiye muri Cricket biturutse ku nshuti zanjye zo ku ishuri, ariko nakwemeza ko byahinduye ubuzima bwanjye. Mbere y’aho, nahoraga nigunze nta cyizere mfite ku hazaza.”

Yakomeje agira ati “Igitangaje kuri siporo, ifite ubushozi yihariye bwo guhuza no gutuma abantu bose bibonanamo. Hamwe na Cricket, numvise nisanze mu bandi kandi kuva icyo gihe natangiye kwishima n’ahazaza hanjye ntangira kuhabona.”

Mu mupira w’amaguru, Rayon Sports na Kiyovu Sports ziri mu makipe yakozweho cyane na Jenoside, umubare munini w’abari abakinnyi bazo, abatoza, abayobozi n’abafana baricwa.

Gusa kuri ubu, abafana bose bahurira hamwe, bagasangira ibyishimo iyo ikipe yabo yatsinzwe nk’uko byagarutsweho na Habyarimana Claude ufana Rayon Sports.

Ati “Umupira w’amaguru wafashije mu kongera guhuza abantu bagira ubumwe nyuma y’ibyabaye mu 1994. Byaba byiza haramutse hashyizweho gahunda nyinshi za siporo kandi zigashyirwa mu murongo w’ubumwe no guteza imbere ubwiyunge.”

Ngabire Jeannette ufana Kiyovu Sports, yavuze ko nubwo haba hari uguhangana hagati yabo n’abafana Rayon Sports, ariko urukundo rw’umupira w’amaguru rubahuza nk’umuntu umwe.

Yavuze ko yifuzaga ko uwo mwuka wo gusangira ibyishimo by’umukino utaranga abari mu Rwanda gusa, ahubwo ukagera no ku Isi yose kugira ngo “ibyabaye mu Rwanda bitazongera kubaho ukundi.”

Ubwo yasuraga Urwibutso rwa Jenoside rwa Murambi mu 2019, Umuyobozi w’Ishyirahamwe rya Komite Olempike zo mu karere ka Gatanu ka Afurika (ANOCA Zone 5), William F. Blick, yavuze ko “Kuza mu Rwanda ugasura inzibutso, umenya byinshi kuri Jenoside. Ariko icy’ingenzi cyane, umenya byinshi ku kwihangana kw’Abanyarwanda.”

Nyuma y’imyaka 27 Jenoside yakorewe Abatutsi ibaye, Abanyarwanda basabwa kubakira ku mateka igihugu cyanyuzemo, bakarwanya abagifite ingengabitekerezo yaJenoside birinda ko ibyabaye bitazasubira.

Mu 2019, u Rwanda rwakiriye imikino ya ANOCA Zone V Youth Games yahuje ibihugu 11, yari igamije gukangurira urubyiruko kwirinda Jenoside
Abasaga 270 bitabiriye imikino ya ANOCA mu 2019 basuye urwibutso rwa Jenoside rwa Murambi
William Blick uyobora ANOCA Zone V yitegereza amwe mu mateka u Rwanda rwanyuzemo mu 1994 /Ifoto yafashwe mu 2019 na Komite Olempike y'u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .