Kevin Durrant mu bakinnyi bane ba Brooklyn Nets banduye Coronavirus

Yanditswe na Eric Tony Ukurikiyimfura
Kuya 18 Werurwe 2020 saa 10:35
Yasuwe :
0 0

Abakinnyi bane b’ikipe ya Brooklyn Nets yo muri Shampiyona ya Basketball muri Amerika, NBA, barimo Kevin Durrant wabaye MVP mu 2014, banduye icyorezo cya Coronavirus.

Mu itangazo yashyize hanze, ikipe ya Brooklyn Nets yemeje ko hari abakinnyi bayo bane banduye Coronavirus, ariko ntiyatangaza amazina yabo.

Kevin Durrant wabaye umukinnyi w’umwaka muri NBA mu 2014, yemereye The Athletic ko ari umwe muri abo bane banduye iki cyorezo cyibasiye Isi.

Brooklyn Nets yatangaje ko abakinnyi batatu batagaragaza ibimenyetso mu gihe undi umwe, we agaragaza ibimenyeso bya Coronavirus.

Iyi kipe iheruka mu kibuga tariki ya 10 Werurwe ihura na Los Angeles Lakers mbere y’uko umwaka w’imikino wa Shampiyona ya NBA uba uhagaritswe ku munsi wakurikiyeho.

Brooklyn Nets yavuze ko ikomeje gukorana n’inzego z’ubuzima mu kumenya abaheruka guhura n’abo bakinnyi mu gihe yasabye “abakinnyi bayo bose n’abandi bagize ikipe kuguma mu kato, no gukorana bya hafi n’inzego z’ubuvuzi.”

Kevin Durrant amaze iminsi adakina kubera imvune yagize tariki ya 10 Kamena 2019 mu mukino wa gatanu wa NBA Finals.

Yavuye muri Golden State kuri miliyoni 164$ ku masezerano y’imyaka ine, ariko akaba ataratangira gukinira Brooklyn Nets.

Kwandura kw’abakinnyi bane ba Brooklyn Nets byatumye abakinnyi barindwi bakina muri Shampiyona ya NBA ari bo bamaze kugaragaraho Coronavirus.

Abandi banduye iki cyorezo ni Rudy Gobert na Donovan Mitchell bakinira Utah Jazz ndetse na Christian Wood wa Detroit Pistons.

Kevin Durrant ari mu bakinnyi bane ba Brooklyn Nets banduye Coronavirus
Durrant yageze muri Brookyln Nets avuye muri Golden State Warriors

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .