Patriots BBC yabonye itike yo gukomeza mu cyiciro cya kabiri cya BAL

Yanditswe na Eric Tony Ukurikiyimfura
Kuya 20 Ukwakira 2019 saa 07:54
Yasuwe :
0 0

Patriots BBC ihagarariye u Rwanda, yabonye itike yo gukomeza mu cyiciro cya kabiri cy’amajonjora y’irushanwa rya Basketball Africa League (BAL) rizaba mu mwaka utaha, ni nyuma yo gutsinda umukino yahuyemo na JKT yo muri Tanzania ku manota 79-65 kuri uyu wa Gatandatu.

Wari umukino wa gatatu iyi kipe ifite igikombe cya Shampiyona y’u Rwanda yatsinze nyuma yo gutsinda uwa Dynamo na Hawassa BBC.

Muri iyi mikino yo mu itsinda D riherereye mu gice cy’Iburasirazuba, iri kubera muri Tanzania, Patriots BBC yasabwaga gutsinda uyu mukino wabaye kuri uyu wa Gatandatu kugira ngo yizere kuzamukana na City Oilers yo muri Uganda, na yo yamaze gutsinda imikino yayo itatu ibanza.

Ndayisaba Dieudonné yagize uruhare rukomeye mu ntsinzi Patriots BBC yabonye imbere y’iyi kipe yo muri Tanzania, atsinda amanota 20 ndetse asama imipira umunani iva ku nkangara.

JKT BBC yari imbere y’abafana bayo kuko yakiniraga mu rugo, yayoboye agace ka mbere n’amanota 19-15, ibifashijwemo n’abarimo kapiteni wayo Baraka Athumani na Jonas Mushi.

Agace ka kabiri karangiye Patriots BBC ari yo iyoboye ku kinyuranyo cy’amanota atatu gusa (36-33) mbere y’uko ikizamura kikagera ku manota 10 mu gace ka gatatu (58-48).

Makiadi Ongea Michael, Blakeney George na Gasana Kenneth bafashije Patriots BBC kuzamura amanota mu gace ka nyuma, umukino urangiye harimo ikinyuranyo cya 14 (79-65).

Nyuma yo kubona itike yo gukomeza mu cyiciro cya kabiri, Ndayisaba Dieudonné watsinze amanota menshi muri uyu mukino, yavuze ko ari umukino utaboroheye.

Ati” Wari umukino ukomeye kuko wihutaga cyane. Byadusabye ko twongera kuganira hagati yacu, twishyira hamwe kandi birangira dutsinze. Twagombaga kugarira neza, tukabasatira. Twishimiye ko dukomeje mu cyindi cyiciro.”

Undi mukino wabaye muri iri tsinda, warangiye Dynamo BBC yo mu Burundi itsinze Hawassa yo muri Ethiopia amanota 90-43.

Patriots na BBC City Oilers zatsindiye gukomeza mu cyindi cyiciro, zirahurira mu mukino wo kwishakamo ikipe izamuka ari iya mbere kuri iki Cyumweru guhera saa 16:30.

Patriots BBC yatsindiye gukomeza mu cyiciro cya kabiri cyo gushaka itike y'imikino ya Basketball Africa League

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza