Patriots BBC yagarukanye mu Rwanda ishema, yizeza Abanyarwanda kuzitwara neza no mu cyindi cyiciro cya BAL (Amafoto)

Yanditswe na Eric Tony Ukurikiyimfura
Kuya 22 Ukwakira 2019 saa 07:53
Yasuwe :
0 0

Patriots BBC iheruka kwitwara neza mu mu mikino y’ijonjora rya mbere ryo gushaka itike yo gukina imikino nyafurika ya Basketball Africa League (BAL) izaba mu mwaka utaha, yagarutse i Kigali ku mugoroba wo kuri uyu wa Kabiri.

Ahagana saa 20:00 ni bwo abakinnyi ba Patriots BBC basohotse mu kibuga cy’indege cya Kigali i Kanombe barangajwe imbere na Visi kapiteni Makiadi Onge Michael.

Abagize iyi kipe yasoje imikino yo mu itsinda D yaberaga muri Tanzania, iri ku mwanya wa mbere nyuma yo gutsinda imikino yose bahuyemo na Dynamo BBC yo mu Burundi, Hawassa BBC yo muri Ethiopia, JKT yo muri Tanzania na City Oilers yo muri Uganda, bagarutse bafite akanyamuneza, mu mipira y’umweru iriho abaterankunga babo bakuru muri iyi mikino nka Visit Rwanda na Banki ya Kigali PLC.

Akigera i Kigali, Umutoza wa Patriots BBC, Umunya-Kenya Henry Mwinuka, yavuze ko yashimishijwe n’uburyo ikipe ye yitwaye mu mikino bakinnye, avuga ko kuri ubu bagiye kuruhuka gato, ubundi bagatangira kwitegura ijonjora rya kabiri rizatangira mu mpera z’ukwezi gutaha.

Mwinuka yavuze ko yashimishijwe n’imikinire y’abakinnyi bashya iyi kipe yari yajyanye muri iyi mikino, barimo Blakenely George Wilbert ukomoka muri Amerika, Gasana Kenneth na Nijimbere Guibert, avuga ko hari abandi bashobora kongeramo dore ko na Hagumintwari Steve yavunitse urutoki.

Ati” Turishimye bitewe n’umusaruro twabonye. Twagerageje gukora cyane nko ku mukino wa gatatu aho JKT yari iri ku kibuga cyayo, ifite n’abafana ariko tubyitwaramo neza. Ku mukino wa nyuma twari dufite Kenny, George na Guibert bari bahagaze neza turatsinda. Nishimira kubagira mu ikipe yanjye.”

“ Sinzi niba tuzongeramo abandi bakinnyi kuko icyiciro gitaha kizaba kitoroshye. Tugiye kwitegura nk’ibisanzwe kuko dufite nk’ukwezi mbere y’uko iyo mikino itangira. Steve azamara hanze nk’ibyumweru bitatu ubundi atangire kwitoza.”

Kapiteni wa Patriots BBC, Mugabe Aristide na we yavuze ko bagiye kwitegura mu buryo burushijeho kugira ngo bazitwara neza mu ijonjora rya kabiri.

Ati” Turishimye kuba twarabashije kubona intsinzi zose tugasoreza ku munsi wa mbere. City Oilers ni ikipe ikomeye ariko byasabaga ko hatsinda uwiteguye neza. Ubwo duheruka guhura bari badutsinze, twari dufite inyota yo kubatsinda.”

“Icyiciro cya kabiri tugiye gukina ntabwo cyoroshye kuko buri wese azaba ashaka kugera mu makipe 12 ya nyuma. Ntabwo tugiye kujenjeka, tugiye kubona hafi ukwezi wo kwitegura kugira ngo tuzabe tumeze neza.”

Patriots BBC yazamutse iyoboye itsinda D ryakiniraga i Dar es Salaam ifite amanota umunani mu mikino ine, ikomezanya mu cyindi cyiciro na City Oilers yo muri Uganda, yo yari ifite amanota atandatu kuko yatsinzwe umukino yahuyemo n’iyi kipe iharagariye u Rwanda.

Amakipe yombi agiye mu cyiciro cyizahuza ayitwaye neza mu matsinda atandatu agize ijonjora rya mbere. Iyi mikino izatangira mu mpera z’ukwezi gutaha, isozwe mu Ukuboza 2019.

Makiadi Ongea Michael ni we wasohotse mbere mu kibuga cy'indege cya Kigali
Yari akurikiwe na kapiteni w'iyi kipe, Mugabe Aristide
Kenneth Gasana ni umwe mu bakinnyi batatu bashya bafashije Patriots BBC kwitwara neza mu ijonjora ribanza
Blakeney George ukomoka muri Amerika na we ni umukinnyi mushya iyi kipe ifite
Niyimugabo Sunny asohoka mu kibuga cy'indege cya Kigali i Kanombe
Nijimbere Guibert na we ni mushya Patriots BBC yajyanye muri iri rushanwa
Ndayisaba Dieudonné ni umwe mu bitwaye neza ku ruhande rwa Patriots BBC muri iyi mikino
Umutoza wungirije wa Patriots BBC, Mukurarinda Jean Claude
Henry Mwinuka yishimiye uko abakinnyi be bitwaye muri Tanzania
Patriots BBC yageze i Kigali ifite akanyamuneza
Kasongo Aubin Junior
Nijimbere Guibert ni umwe mu bakinnyi bato bari muri Patriots BBC
Hagumintwari Steve apfutse ikiganza nyuma yo kuvunika urutoki
Hakizimana Lionel yasohotse mu kibuga cy’indege amwenyura, yakirwa n'umugore we wari umutegereje
Hagumintwari Steve wavunitse urutoki, ashobora kumara ibyumweru bitatu ataratangira imyitozo yuzuye
Ruzigande Ally yizeye gukomeza kwitwara neza muri iyi mikino ya BAL

Amafoto: Uwihanganye Hardi


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza