Patriots BBC yatsinze City Oilers isoza imikino y’ijonjora rya mbere idatsinzwe

Yanditswe na Eric Tony Ukurikiyimfura
Kuya 21 Ukwakira 2019 saa 07:43
Yasuwe :
0 0

Patriots BBC ihagarariye u Rwanda, yasoje imikino y’icyiciro cya mbere cy’amajonjora y’irushanwa rya Basketball Africa League (BAL) rizaba mu mwaka utaha idatsinzwe, ni nyuma yo gutsinda umukino wa kane yahuyemo na City Oilers yo muri Uganda ku manota 74-63 kuri iki Cyumweru.

Wari umukino wa nyuma iyi kipe ifite igikombe cya Shampiyona y’u Rwanda yatsinze nyuma yo guhigika Dynamo yo mu Burundi, Hawassa BBC yo muri Ethiopia na JKT BBC yo muri Tanzania.

Muri iri tsinda D riherereye mu gice cy’Iburasirazuba, ryakiniraga muri Tanzania, Patriots BBC na City Oilers yo muri Uganda, zari zihanganiye umwanya wa mbere nyuma y’uko zombi zitsinze imikino itatu ibanza.

Makiadi Ongea Michael na Nijimbere Guibert bagize uruhare rukomeye mu ntsinzi Patriots BBC yabonye imbere y’iyi kipe yo muri Uganda, buri umwe atsinda amanota 14 mu gihe Kenneth Gasana yatsinzemo 13.

City Oilers iri mu makipe akomeye muri aka karere, ariko ntibyabujije Patriots BBC kuyitsinda ku kinyuranyo cy’amanota umunani mu gace ka mbere (18-10).

Mu gace ka kabiri, City Oilers yagoye Patriots BBC mu buryo bukomeye, aho ibifashijwemo n’abarimo Ndikumana Landry watsinze amanota 22 mu mukino, yakuyemo amanota arindwi, hagasigaramo ikinyuranyo cy’inota rimwe mbere y’uko bajya kuruhuka ari 32-31.

Patriots BBC yongeye kuzamura ikinyuranyo cy’amanota mu gace ka gatatu, kigera kuri 13 (58-45) mu gihe umukino warangiye harimo 11 (74-63).

Nyuma yo gusoza imikino y’ijonjora rya mbere nta n’umwe ikipe ye itakaje, Umutoza wa Patriots BBC, Henry Mwinuka, yavuze ko bibaha imbaraga zo kwitwara neza mu cyiciro gikurikira.

Ati” Nishimiye uburyo abahungu banjye bakinnye uyu munsi. Twakosoye amakosa yose twakoze ejo hashize kandi twugarira neza. Intsinzi enye zikurikiranya ziraduha icyizere n’imbaraga tuzajyana mu cyiciro gikurikiraho.”

Undi mukino wabaye muri iri tsinda, warangiye Dynamo BBC yo mu Burundi itsinzwe JKT yo muri Tanzania amanota 88-68.

Patriots na BBC City Oilers zatsindiye gukomeza mu cyindi cyiciro kizakinwa mu kwezi gutaha kugeza mu Ukuboza 2019.

Opong ni umwe mu bakinnyi ba City Oilers bigaragaje muri uyu mukino
Nijimbere Guibert yongeye kwigaragaza ku ruhande rwa Patriots BBC
Umutoza wa Patriots BBC, Henry Mwinuka yishimiye ko ikipe ye isoje imikino yo mu itsinda D idatsinzwe
Byari ibyishimo kuri Patriots BBC n'Abanyarwanda baba muri Tanzania baje kuyishyigikira
Patriots BBC yatsindiye gukomeza mu rindi jonjora rizaba mu kwezi gutaha kugeza mu Ukuboza 2019

Amafoto: FIBA


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza